ماسكەۋدە قازاقستاندىق جاۋىنگەرلەردىڭ سۇيەگىن تاپسىرۋ ءراسىمى ءوتتى
ولاردى تۆەر وبلىسىنان «پاميات پوكولەني» جانە «فرونتوۆىە دوروگي» ىزدەستىرۋ توپتارى تاپتى. جاۋىنگەرلەردىڭ مەدالوندارىندا ساقتالعان جازبالاردىڭ ارقاسىندا 1903 -جىلى الماتى وبلىسىندا تۋعان فيليپپ پاراسەنكو مەن 1913 -جىلى سولتۇستىك قازاقستان وبلىسىندا تۋعان يۆان سۋرنيندى انىقتاۋ مۇمكىن بولدى. ەكەۋى دە 1942 -جىلى رجيەۆ تۇبىندەگى قاندى شايقاستا قازا تاپقان.
ق ر ر ف ەلشىسى داۋرەن ابايەۆ ءوز سوزىندە قازاقستان قازا بولعان اتا-بابالارىمىزدى ەسكە الىپ، قۇرمەتتەيتىنىن اتاپ ءوتتى.
«سىزدەر ۇلكەن ءىس اتقاردىڭىزدار، سونىمەن قاتار، سوعىس جىلدارىنداعى حالىقتىڭ ەرلىگى تۋرالى تاريحي جادىمىزدى قالپىنا كەلتىرۋ جانە ساقتاۋ ءۇشىن ءالى دە كوپ جۇمىس جاسايتىندارىڭىزعا سەنىمدىمىن»، - دەپ ىزدەستىرۋشىلەرگە العىسىن ءبىلدىردى.
«اتامنىڭ اماناتى» قوعامدىق بىرلەستىگىنىڭ باسقارما ءتوراعاسى مۇرات مولداعاليەۆ بىرلەستىك جۇمىس ىستەگەن بەس جىل ىشىندە سوعىس جىلدارىندا حابارسىز كەتىپ، قازا تاپقان 2,5 مىڭنان استام قازاقستاندىقتىڭ تاعدىرىن انىقتاۋ مۇمكىن بولعانىن ەسكە سالدى. ول يۆان سۋرنيننىڭ تۋىستارى تابىلعانىن، ال فيليپپ پاراسەنكونىڭ تۋىستارى ىزدەستىرىلىپ جاتقانىن ايتتى. جاقىن ارادا جاۋىنگەرلەردىڭ سۇيەگى قازاقستانعا جەتكىزىلىپ، تولىق قۇرمەتپەن جەرلەنەتىن بولادى.
تۆەر وبلىستىق «پاميات پوكولەني» ىزدەستىرۋ-زەرتتەۋ بىرلەستىگىنىڭ جەتەكشىسى ناتاليا نازاروۆا قازاقستان تۋماسى رەتىندە جەرلەستەرىنىڭ سۇيەگىن تاۋىپ، ولاردى تۋعان جەرىنە اقتىق ساپارعا شىعارىپ سالۋ ەرەكشە ماڭىزدى ەكەنىن مويىندادى.
«فرونتوۆىە دوروگي» ىزدەستىرۋ وتريادى كومانديرىنىڭ ورىنباسارى ولەگ داگۋروۆ ىزدەۋشىلەر ءۇشىن نومينالدى مەدالون تابۋدان اسقان باقىت جوق ەكەنىن اتاپ ءوتتى.
«ادام مينومەتپەن اتىلىپ قازا تاپقاندا، ونىڭ مەدالونىنىڭ تولىق ساقتالىپ قالۋى ناعىز عاجايىپ قۇبىلىس. ءبىزدىڭ حالىقتار يىق تىرەسە سوعىسىپ، ۇلكەن شىعىنعا ۇشىرادى. ولاردىڭ ەرلىگىن ۇمىتپاي، ەستە ساقتاعاندارىڭىزعا وتە ريزامىن. قانداي جاعداي بولماسىن، ءبىزدىڭ ەلىمىزدىڭ بولاشاعى جارقىن بولاتىنىنا سەنەمىن» - دەدى ول.
شارا بارىسىندا قازا تاپقانداردى حريستياندىق ءداستۇر بويىنشا اقتىق ساپارعا شىعارىپ سالدى.
قازا تاپقان جاۋىنگەرلەردىڭ سۇيەگىن تابۋ بويىنشا قازاقستاندىق جانە رەسەيلىك ىزدەۋ توپتارىنىڭ بىرلەسكەن جۇمىسى جالعاسادى.
