پوليتسەيلەر مەكتەپتەگى بەينەباقىلاۋ كامەرالارىن تىكەلەي قاداعالاي الادى

استانا. قازاقپارات - ءبىلىم بەرۋ ۇيىمدارىنداعى بەينەباقىلاۋ كامەرالارى پوليتسيا ورگاندارىنىڭ جۇيەسىنە تىكەلەي قوسىلادى.

بۇل تۋرالى ىشكى ىستەر ءمينيسترىنىڭ ءبىرىنشى ورىنباسارى مارات قوجايەۆ ءمالىم ەتتى، دەپ حابارلايدى قازاقپارات ءتىلشىسى.

«بالالاردىڭ قاۋىپسىزدىگىن قامتاماسىز ەتۋ بويىنشا قاجەتتى شارالار قابىلدانىپ جاتىر. بەينەباقىلاۋ جۇيەلەرىن جەدەل باسقارۋ ورتالىقتارىنا قوسۋ بويىنشا تەحنيكالىق كومەك كورسەتىلدى. قاراجاتتى ۇنەمدەۋ ماقساتىندا سيفرلىق دامۋ مينيسترلىگىمەن بىرلەسىپ، مەملەكەتتىك ورگانداردىڭ ءبىرىڭعاي جەلىسى بويىنشا بايلانىس ارنالارىن ۇيىمداستىرۋ ماسەلەلەسى پىسىقتالۋ ۇستىندە. كۇزەت مەكەمەلەرىمەن شارتتار جاساسۋدى جەدەلدەتۋ ءۇشىن وقۋ-اعارتۋ مينيسترلىگىنە تالاپتارعا سايكەس كەلەتىن ۇيىمداردىڭ ءتىزىمى بەرىلدى»، - دەدى مارات قوجايەۆ ۇكىمەت وتىرىسىندا.

ونىڭ ايتۋىنشا، توتەنشە جاعدايلار مينيسترلىگىمەن بىرلەسىپ، بالالار مەن مۇعالىمدەرگە توتەنشە جاعدايلار كەزىندە (ءورت، جەر سىلكىنىسى، سۋ تاسقىنى، تەراكت جانە ت. ب) ارەكەت ەتۋ پراكتيكاسى ۇيرەتىلەدى.

«سونىمەن قاتار بالالاردىڭ قاۋىپسىزدىك دەڭگەيىن ارتتىرۋ ءۇشىن جەرگىلىكتى اتقارۋشى ورگاندارعا كەمشىلىكتەردى جويۋ ماسەلەسى دە تۇر. مەكتەپتەردى ءتيىستى قاۋىپسىزدىك جۇيەلەرمەن جابدىقتاۋدى جانە بەينەباقىلاۋ كامەرالارىن پوليتسيا ورگاندارىنا تىكەلەي قوسۋدى تەز ارادا اياقتاۋ قاجەت»، - دەيدى ول.