قازاقستان رەسەي گازىن تاسىمالداۋ ارقىلى تابىس تابادى
«بۇل قازاقستان ءۇشىن ترانزيتتەن قوسىمشا كىرىس الۋمەن بايلانىستى وڭتايلى ءسات. ءبىز گاز قۇبىرى جۇيەمىزدى جاڭعىرتۋعا مۇمكىندىك الامىز. گازدى ىشكى نارىققا جەتكىزۋ قازاقستان ءۇشىن شىعىن ەكەنىن بىلەسىزدر. سوندىقتان دا ترانزيتتەن الىناتىن اتالعان قوسىمشا كىرىس قازاقستانعا جۇكتەمەنى تومەندەتۋگە مۇمكىندىك بەرەدى جانە ينۆەستيتسيالىق جوبالاردى جۇزەگە اسىرۋ ءۇشىن تۇراقتى اقشا كىرىسىن قامتاماسىز ەتەدى. قازىرگى ۋاقىتتا 1,5 تەن 10 ميلليارد تەكشە مەترگە دەيىنگى كولەمدە گاز تاسىمالداۋ ماسەلەسىن تالقىلاپ جاتىرمىز»، - دەدى مينيستر ۇكىمەت وتىرىسىنان كەيىن ب ا ق وكىلدەرىنىڭ ساۋالىنا وراي.
ونىڭ اتاپ وتۋىنشە، مۇنان كەيىن ءبارى دە ەنەرگيا جۇيەسىنىڭ دايىندىعىنا بايلانىستى بولادى.
«دەگەنمەن، مۇنان كەيىن ءبارى دە وزبەك ەنەرگيا جۇيەسىنىڭ، گازپرومداعى رەسەيلىك ارىپتەستەرىمىزدىڭ دايىندىعىنا بايلانىستى بولماق. اتالعان گاز قۇبىرىن جاڭعىرتۋ ءۇشىن قوسىمشا شىعىندار قاجەت بولاتىندىعى تۇسىنىكتى. ءبىراق، بۇل «QazaqGaz كومپانياسىنىڭ جوسپارلى جۇمىسى بولادى»، - دەدى ول.
وسى رەتتە مينيستر گاز ترانزيتىنەن تۇسەتىن كىرىس سوماسىن اتاۋ ەرتە ەكەندىگىن باسا ايتتى.
«ازىرشە سوماسىن ايتا المايمىن. ول ترانزيت كولەمىنە بايلانىستى. ينديكاتيۆتى بالانس انىقتالعاننان كەيىن ترانزيت كولەمىن بىلەمىز جانە قانداي كولەمدە كىرىس الاتىندىعىمىزدى ايتا الامىز. دەگەنمەن، كىرىس بيىلدان باستاپ بولادى»، - دەدى الماسادام ساتقاليەۆ.
