قازاقى تازىلار العاش رەت الەمدىك كورمەگە قاتىسادى
ونىڭ اياسىندا ۇيىمداستىرىلاتىن «World Dog Show-2023» يتتەر كورمەسىنە قازاقستاننان ەكى تازى قاتىسادى، دەپ حابارلايدى قازاقپارات.
قازاقستان كينولوگتارى وداعىنان ءمالىم ەتكەندەي، قازاقى تازىلار مۇنداي دۇنيەجۇزىلىك چەمپيوناتقا تاريحتا تۇڭعىش رەت قاتىسقالى وتىر. وعان ەلىمىزدىڭ ءتولتۋما ءيت تۇقىمدارىن حالىقارالىق ارەناعا تانىتۋ جۇمىستارىن بەلسەندى جۇرگىزىپ كەلە جاتقان قازاقستان كينولوگتارى وداعى مۇرىندىق بولعان.
شۆەيتساريا ۇلتتىق كينولوگيالىق قوعامى قازاقستان كينولوگتارى وداعىنىڭ ءوتىنىشىن قاراستىرا كەلىپ، تازىنى جەنيەۆادا وتەتىن الەم چەمپيوناتىنا قاتىساتىن ءيت تۇقىمدارىنىڭ تىزىمىنە قوستى.
قازاقى تازى تاريحتا العاش رەت ەۋروپالىق وداق ەلدەرىنىڭ دۇنيەجۇزىلىك كورمەسىنە قاتىساتىن بولدى. وسى جولدا ۇلكەن جۇمىس اتقارىلدى. ءبىز بەلگياداعى FCI- مەن ارادا (حالىقارالىق كينولوگيالىق فەدەراتسيا) ءبىرقاتار كەلىسسوز جۇرگىزدىك. بيىل ءساۋىر ايىندا قازاقستان كينولوگتارى وداعىنىڭ ءوتىنىشى بويىنشا، «Kazakh Tazy» تۇڭعىش رەت حالىقارالىق كينولوگيا فەدەراتسياسىندا ءيت تۇقىمدارىنىڭ نومەنكلاتۋرالىق تىزىمىنە ەنگىزىلدى. ءبىزدىڭ ۇسىنىسىمىز FCI تاراپىنان قولداۋ تاپقانىنا وتە قۋانىشتىمىز، - دەيدى قازاقستان كينولوگتارى وداعىنىڭ پرەزيدەنتى باۋىرجان سەرىكقالي.
سونداي-اق 21-22- تامىز كۇندەرى وتەتىن حالىقارالىق كينولوگيا فەدەراتسياسىنىڭ باس اسسامبلەياسىندا قازاقستاندى وسى ۇيىمنىڭ تولىق قۇقىلى مۇشەسى رەتىندە تانۋ ماسەلەسى قاراستىرىلاتىنى ايتىلىپ وتىر.
ايتا كەتەيىك، 2022-جىلى مەملەكەت باسشىسى قاسىم-جومارت توقايەۆ ءتيىستى ورگاندارعا ۇلتتىق ءيت تۇقىمدارى - قازاقى تازى مەن توبەتتى ساقتاۋ جانە قالپىنا كەلتىرۋ، سونداي-اق ونى ءتولتۋما قازاقى ءيت تۇقىمدارى رەتىندە حالىقارالىق دەڭگەيدە تانىتۋدى تاپسىرعان بولاتىن. بۇل ماسەلەنى ق ر پرەزيدەنتى ءىس باسقارماسى ءوز قاراۋىنا الىپ، جۇيەلى شەشىم قابلداۋ ءۇشىن مەملەكەتتىك ورگاندار جۇمىسىن ۇيلەستىرۋمەن اينالىستى. پرەزيدەنت تاپسىرماسى بويىنشا ءتيىستى جۇمىس توبى قۇرىلىپ، ەكولوگيا جانە تابيعي رەسۋرستار مينيسترلىگى وكىلەتتى ورگان رەتىندە ايقىندالدى.
قازاقى تازى مەن توبەت تۇقىمدارىن حالىقارالىق ارەنادا تانىتۋ ءۇشىن شتاب-پاتەرى بەلگيادا ورنالاسقان حالىقارالىق كينولوگيا فەدەراتسياسىنا ءوتىنىش جىبەرىلدى. باستى تالاپ - ەلىمىزدىڭ كينولوگيا قاۋىمداستىعىن وسى ۇيىمنىڭ تولىق قۇقىلى مۇشەسى رەتىندە تىركەۋ. ەلىمىزدىڭ اتىنان FCI- مەن ارادا قازاقستان كينولوگتارى وداعى قارىم-قاتىناس جۇرگىزەدى.
