اكىمدىكتە ءۇي كەزەگىندە تۇرعاندارعا باسپانا ۇسىنۋ تالابى وزگەردى - وتباسى بانك
بۇل قادامدار تۇرعىن ءۇي-كوممۋنالدىق ينفراقۇرىلىمدى دامىتۋدىڭ 2023-2029-جىلدارعا ارنالعان تۇجىرىمداماسى اياسىندا قامتىلعان، دەپ حابارلايدى قازاقپارات ءتىلشىسى.
«%10 باستالاتىن العاشقى جارنا بولعان جاعدايدا، نەسيەلەر جىلدىق %2 جانە %5 مولشەرلەمەسىمەن بەرىلەدى. نەسيە مەرزىمى 20 جىلعا دەيىن بولادى»، - دەلىنگەن وتباسى بانك مالىمەتىندە.
جەرگىلىكتى اتقارۋشى ورگانداردا باسپانا الۋ كەزەگىندە تۇرعان ازاماتتاردىڭ كەلەسى ساناتتارى جىلدىق %2 مولشەرلەمەسىمەن جەڭىلدەتىلگەن نەسيە الۋعا ءوتىنىش بەرە الادى:
1. ءبىرىنشى جانە ەكىنشى توپتاعى مۇگەدەكتەر؛
2. مۇمكىندىگى شەكتەۋلى بالالارى بار نەمەسە ولاردى تاربيەلەپ وتىرعان وتباسىلار؛
3. جەتىم بالالار مەن اتا-اناسىنىڭ قامقورلىعىنسىز قالعان بالالار؛
4. «التىن القا»، «كۇمىس القا» القالارىمەن ماراپاتتالعان نەمەسە بۇرىن «باتىر انا» اتاعىن العان، سونداي-اق I جانە II دارەجەلى «انا داڭقى» وردەندەرىمەن ماراپاتتالعان كوپبالالى وتباسىلار، كوپبالالى انالار. قازىر وسى ءتورت سانات بويىنشا 227 مىڭ قازاقستاندىق باسپانا كەزەگىندە تۇر. ونىڭ ىشىندە 51 مىڭى 1 جانە 2-توپتاعى مۇگەدەكتەر.
«ەگەر مۇمكىندىگى شەكتەۋلى ازاماتتىڭ كىرىسى بولماسا نەمەسە جەتكىلىكسىز بولسا، وندا ول قوسىمشا قارىز الۋشىلاردى تارتا الادى. ال بۇرىن بۇل ماقساتقا تەك جاقىن تۋىستارى - كۇيەۋى نەمەسە ايەلىنە، سونداي-اق كامەلەتتىك جاسقا تولعان بالالارىنا عانا كەپىلگەر رەتىندە قاتىسۋعا رۇقسات بەرىلەتىن. 1 جانە 2-توپتاعى مۇگەدەكتىگى بار ازاماتتاردى قولداۋ جانە ولاردىڭ باسپانا ماسەلەسىن شەشۋگە كومەكتەسۋ ماقساتىندا قوسىمشا قارىز الۋشىلاردىڭ ءتىزىمى كەڭەيتىلدى. ەندى ولار كەپىلگەر رەتىندە تۋعان اتا-اناسىن، اسىراپ العان اتا-اناسىن، اسىراپ العان بالالارىن، ءبىر اتا-انادان تۋعان جانە ءبىر اتا-انادان تۋماعان اعا-ىنىلەرى مەن اپا-سىڭلىلەرىن، سونداي-اق اتاسى، اجەسى، نەمەرەلەرىن تارتا الادى. پاتەر ساتىپ الۋ شارتى تىكەلەي مەملەكەتتىك باعدارلاماعا قاتىسۋشىمەن جاسالاتىن بولادى»، - دەلىنگەن بانك اقپاراتىندا.
بۇدان بولەك، تۇرعىن ءۇي-كوممۋنالدىق ينفراقۇرىلىمدى دامىتۋدىڭ 2023-2029-جىلدارعا ارنالعان تۇجىرىمداماسى بويىنشا كرەديت الۋ بارىسىندا بارلىق ساناتتار ءۇشىن كىرىسكە شەكتەۋ قويىلمايدى. بۇعان دەيىن مەملەكەتتىك باعدارلامالار بويىنشا وتباسىنىڭ ءاربىر مۇشەسىنىڭ سوڭعى التى ايداعى تابىسى ەڭ تومەنگى كۇنكورىس دەڭگەيىنىڭ 3,1-دەن (%2 مولشەرلەمە بويىنشا نەسيە الۋ ءۇشىن) جانە 3,7 دەن (%5 مولشەرلەمە بويىنشا نەسيە ءۇشىن) اسپاۋى كەرەك دەگەن تالاپ بار بولاتىن. ونىڭ سوماسى 125757 جانە 150098 تەڭگەنى قۇرادى. ماسەلەن، بۇل سوما بەلگىلەنگەن نورمادان كەم دەگەندە 100 تەڭگەگە اسىپ كەتسە، وتباسى جەڭىلدەتىلگەن زاەمنان قاعىلىپ، باسپانا ماسەلەسىن شەشە المايتىن.
«مۇنىمەن قوسا، تۇجىرىمداماعا سايكەس قاتىسۋشىلار كرەديتتىڭ ەڭ جوعارعى سوماسى بويىنشا شەكتەلمەيتىن بولادى. بۇرىن ايماققا بايلانىستى ول 10 ميلليوننان 18 ميلليون تەڭگەگە دەيىن بولاتىن. ەندى كرەديت سوماسى پاتەر قۇنىنا قاراي ەسەپتەلىپ، تۇرعىن ءۇيدىڭ 1 شارشى مەترىنىڭ باعاسى اياسىندا قالىپتاسادى. الەۋمەتتىك تۇرعىن ءۇي 3-4 ساناتقا سايكەس كەلىپ، پاتەردىڭ ماكسيمالدى اۋدانى 80 شارشى مەتردەن اسپايتىن بولادى»، - دەپ ناقتىلادى وتباسى بانكتەن.
ەندى مەملەكەتتىك باعدارلاماعا قاتىسۋ تۋرالى وتىنىمدەر otbasybank.kz جىلجىمايتىن مۇلىك پورتالىندا جىلجىمايتىن مۇلىك وبەكتىلەرى اياسىندا قابىلداناتىن بولادى. بۇل بۇدان بىلاي بۇكىل قازاقستان بويىنشا وتىنىمدەردى جالپىلاما قابىلداۋ بولمايدى دەگەن ءسوز. ياعني مەملەكەتتىك باعدارلامالاردىڭ الەۋەتتى قاتىسۋشىلارى ەندى بىردەن بەلگىلى ءبىر ايماقتاعى ناقتى نىسانداعى ناقتى پاتەردى تاڭداپ ءوتىنىم بەرەتىن بولادى.
ماسەلەن، قازىر جىلدىق %2 مولشەرلەمەمەن زاەم الىپ، ازاماتتار قونىستانا الاتىن نىساندار شىمكەنت پەن اقتوبە قالالارىندا دايىن. بۇل ءبىرىنشى كەزەڭدە مەملەكەتتىك باعدارلاماعا وسى ەكى وبلىستىڭ تۇرعىندارى عانا ءوتىنىش بەرىپ، قاتىسا الادى دەگەن ءسوز. قالعان وڭىرلەردىڭ تۇرعىندارى جەرگىلىكتى اتقارۋشى ورگاندار سالاتىن بەلگىلى ءبىر وڭىردەگى جىلجىمايتىن مۇلىكتىڭ دايىن بولۋ ۋاقىتىنا قاراي باعدارلاماعا قاتىسا الادى.
«بانكتىڭ سايتى مەن الەۋمەتتىك جەلىلەرىندەگى اقپاراتتى قاداعالاپ وتىرۋلارىڭىزدى سۇرايمىز. تۇجىرىمداماعا قاتىسۋشىلاردى تاڭداۋدىڭ نەگىزگى كريتەرييلەرى رەتىندە: تۇرعىن ءۇي كەزەگىنە تۇرۋ ۋاقىتى مەن قابىلدانۋ ساناتى بولادى. ياعني، ۇمىتكەرلەر اراسىنان الەۋەتتى قاتىسۋشىلاردى ىرىكتەۋ كەزىندە ءبىرىنشى كەزەكتە 1 جانە 2-توپتاعى مۇگەدەكتەر مەن مۇمكىندىگى شەكتەۋلى بالالاردى تاربيەلەپ وتىرعان وتباسىلارعا باسىمدىق بەرىلەدى. جىلجىمايتىن مۇلىك ازامات باسپانا كەزەگىندە تۇرعان ايماقتان ساتىپ الىنۋى كەرەك»، - دەلىنگەن حابارلامادا.
