بيىل قانداس مارتەبەسىن قانشا ەتنيكالىق قازاق الدى
ەڭبەك جانە حالىقتى الەۋمەتتىك قولداۋ مينيسترلىگىنەن ءمالىم ەتكەندەي، جالپى 1991-جىلدان بەرى رەسپۋبليكاعا 1 ميلليون 120,7 مىڭ ەتنيكالىق قازاق ورالدى.
جىل باسىنان قانداستاردىڭ 55,2 پايىز - وزبەكستاننان، 19,2 پايىز - قىتايدان، 9,8 پايىز - موڭعوليادان ، 8,6 پايىز - رەسەيدەن، 5 پايىز - تۇرىكمەنستاننان جانە 2,3 پايىز باسقا ەلدەردەن كەلدى.
ولاردىڭ اراسىندا ەڭبەككە قابىلەتتى جاستاعى ازاماتتار سانى 63 پايىز، ەڭبەككە قابىلەتتى جاستان كىشىلەر 28,4 پايىز جانە زەينەتكەرلەر 8,6 پايىز قۇرايدى.
ەڭبەككە قابىلەتتى جاستاعى قانداستار اراسىنان 16 پايىز جوعارى ءبىلىمى بار، 36 پايىز ورتا كاسىبي ءبىلىمدى، 39,9 پايىز جالپى ورتا ءبىلىمدى.
قونىس اۋدارۋشىلار رەسپۋبليكانىڭ ءتۇرلى وڭىرىنە تۇراقتاندى.
ەلدە قانداستاردى قونىستاندىرۋ ءۇشىن ەڭبەك كۇشى تاپشى وڭىرلەر انىقتالعانىن ايتا كەتەيىك، ولار: اقمولا، اباي، قوستاناي، پاۆلودار، شىعىس جانە سولتۇستىك قازاقستان وبلىستارى.
وسى وڭىرلەرگە قونىستانعان قانداستارعا سۋبسيديا تۇرىندە مەملەكەتتىك قولداۋ شارالارى ۇسىنىلادى - ءبىر مەزگىلدە وتاعاسىنا جانە وتباسىنىڭ ءاربىر مۇشەسىنە 70 ا ە ك (241,5 مىڭ تەڭگە) مولشەرىندە؛ تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە - ءبىر جىل ىشىندە 15 تەن 30 ا ە ك (51,7 دەن 103,5 مىڭ تەڭگەگە دەيىن) مولشەرىندە.
جىل باسىنان 653 قانداسقا ءتۇرلى قولداۋ شارالارى كورسەتىلگەن. اتاپ ايتقاندا، 431 ادام تۇراقتى جۇمىسقا ورنالاستىرىلدى، 653 ادام ءبىرجولعى سۋبسيديا الدى، ال 334 قانداسقا تۇرعىن ءۇي شىعىندارى سۋبسيديالاندى.
«سونىمەن قاتار ەرىكتى قونىس اۋدارۋدىڭ تيىمدىلىگىن ارتتىرۋ ماقساتىندا ازاماتتاردى سولتۇستىك وڭىرلەرگە قونىس اۋدارۋعا قاتىساتىن جۇمىس بەرۋشىلەردى قولداۋ بويىنشا ينستيتۋتسيونالدىق شارالار قابىلداندى. تۇرعىن ءۇي ساتىپ الۋ، سالۋ ءۇشىن نەمەسە يپوتەكالىق تۇرعىن ءۇي قارىزدارى بويىنشا باستاپقى جارنانىڭ ءبىر بولىگىن جابۋ ءۇشىن ەكونوميكالىق ۇتقىرلىق سەرتيفيكاتى تۇرعىن ءۇي قۇنىنىڭ 50 پايىز نەمەسە ءبىر وتباسىنا 4 ميلليون تەڭگەگە دەيىن مولشەرىندە ءبىرجولعى وتەۋسىز جانە قايتارىمسىز نەگىزدە ەنگىزىلدى»، - دەلىنگەن مينيسترلىك مالىمەتىندە.
قونىستاندىرۋ وڭىرلەرىندە قانداستاردى قابىلداۋ كۆوتاسى 2023-جىلعا 1925 ادامدى قۇرايدى. 1- تامىزعا دەيىن 1491 ازامات كوشىپ كەلدى.
