بالاباقشاعا كەزەككە تۇرۋدىڭ ءبىرىڭعاي بازاسى قۇرىلادى - مينيستر

استانا. قازاقپارات - مەكتەپكە دەيىنگى ۇيىمداردا ورىنداردى بولۋدە اشىقتىقتى قامتاماسىز ەتۋ ماقساتىندا جىل سوڭىنا دەيىن بالاباقشاعا كەزەككە قويۋدىڭ ءبىرىڭعاي دەرەكتەر بازاسى جاسالادى.

بۇل تۋرالى قازاقپارات وقۋ-اعارتۋ مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.

«وتباسىلاردىڭ ومىرلىك ءتۇرلى جاعدايلارىنا بايلانىستى اتا-انالاردىڭ مەكتەپكە دەيىنگى ۇيىمدى تاڭداۋىنىڭ جاڭا جولدارى قاراستىرىلىپ جاتىر. بالالارعا تەڭ جاعداي جاساۋ مۇمكىندىكتەرىن قامتاماسىز ەتۋدەگى تاعى ءبىر ماڭىزدى ماسەلە - حالىقتىڭ الەۋمەتتىك وسال توپتارىنىڭ بالالارىن تەگىن تاماقتاندىرۋ بولىپ تابىلادى»، - دەدى وقۋ-اعارتۋ ءمينيسترى عاني بەيسەمبايەۆ.

سونداي-اق مينيستر اتاپ وتكەندەي، مەملەكەت باسشىسىنىڭ تاپسىرماسى بويىنشا 1-قىركۇيەكتەن باستاپ بالاباقشاعا باراتىن از قامتىلعان وتباسىلاردان شىققان 97 مىڭنان استام بالا تەگىن تاماقپەن قامتىلادى.

ايتا كەتەرلىگى، ەلىمىزدە 2-6 جاس ارالىعىنداعى بالالاردىڭ 89,1 پايىزى مەكتەپكە دەيىنگى تاربيەمەن جانە وقىتۋمەن قامتىلعان.