مەكتەپتەردىڭ قانشا پايىزى ليتسەنزيالانعان كۇزەتپەن قامتىلدى

استانا. قازاقپارات - وقۋشىلاردىڭ قاۋىپسىزدىگىن ساقتاۋ ماقساتىندا ەل مەكتەپتەرىندە رۇقساتى بار كۇزەتپەن قامتۋ شارالارى قولعا الىنىپ جاتىر.

كەيبىر وڭىردە ماسەلەگە باسا نازار اۋدارۋ قاجەت. بۇل تۋرالى وقۋ-اعارتۋ ءمينيسترى عاني بەيسەمبايەۆ ءمالىم ەتتى، دەپ حابارلايدى قازاقپارات ءتىلشىسى.

«ءبىلىم بەرۋ ۇيىمدارىندا بالالاردىڭ قاۋىپسىزدىگىن قامتاماسىز ەتۋ ماسەلەسى بويىنشا كەلەسى جۇمىستار جۇرگىزىلدى. الدىمەن مەكتەپتەردى ىشكى ىستەر ورگاندارىنىڭ جەدەل باسقارۋ ورتالىقتارىنا قوسۋ. ۇلتتىق ءبىلىم بەرۋ دەرەكتەر بازاسىنا سايكەس بۇل كورسەتكىش 12-تامىزدا %83 بولدى. ەگەر جىل باسىندا 1673 مەكتەپ قوسىلعان بولسا، قازىر بۇل كورسەتكىش 3103 مەكتەپكە ارتىپ وتىر. الايدا الماتى، اتىراۋ جانە قاراعاندى وبلىستارىنىڭ اكىمدىكتەرى بۇل جۇمىستى باياۋ جۇرگىزىپ جاتىر. سوندىقتان اتالعان وڭىرلەر ءوزىڭىزدىڭ تاپسىرماڭىزعا سايكەس جەدەل باسقارۋ ورتالىقتارىنا قوسىلۋ بويىنشا جۇمىستى 25-تامىزعا دەيىن اياقتاۋى قاجەت»، - دەدى عاني بەيسەمبايەۆ ۇكىمەت وتىرىسىندا.

سونداي-اق مينيستر مەكتەپتەردەگى كۇزەت ماسەلەسىن قوزعادى.

«ليتسەنزيالانعان كۇزەت اگەنتتىكتەرىمەن جاسالعان كەلىسىمشارتتار نەگىزىندە جۇمىس ءجۇرىپ جاتىر. قازىر بۇل باعىتتا %84 جۇمىس جۇرگىزىلدى. دەگەنمەن تۇركىستان جانە الماتى وبلىستارىنىڭ بۇل باعىتتاعى جۇمىسى باياۋ ەكەنىن اتاپ وتكىم كەلەدى. سونىمەن قاتار دابىل تۇيمەلەرىن مەكتەپتەردىڭ %89 ى ورناتتى. ەگەر جىل باسىندا دابىل تۇيمەلەرى بار 1789 مەكتەپ بولسا، بۇگىنگى كۇنى 1,9 ەسە(3327 مەكتەپ) وسكەنىن اتاپ وتكىم كەلەدى.

ونىڭ ايتۋىنشا، تۇركىستان وبلىسى، اقتوبە جانە ب ق و اكىمدىكتەرى اتالعان ماسەلەنى جۇيەلى تۇردە قاتاڭ باقىلاۋدا ۇستاۋى قاجەت.