ەتتەن كەيىن گازدالعان سۋسىن ءىشۋ دۇرىس پا؟ نۋتريسيولوگ جاۋاپ بەردى

استانا. قازاقپارات - قازىر كوپشىلىك ەتتەن كەيىن استى تەز قورىتۋ ءۇشىن ءتاتتى گازدالعان سۋسىندار ىشەدى. بۇل قانشالىقتى دۇرىس؟ ول جايلى نۋتريسيولوگ انار نۇرگۇل دانديباي قىزى جاۋاپ بەردى.

ماماننىڭ ايتۋىنشا، ءتاتتى گازدالعان سۋسىنداردىڭ قۇرامىنداعى قانتتىڭ كوپ مولشەرى كوپتەگەن اۋرۋلاردىڭ پايدا بولۋىنا ىقپال ەتۋى مۇمكىن.

«مۇنداي سۋسىنداردىڭ گازى بار سۋسىن ەكەنىن جانە ونىڭ قۇرامىندا قانت وتە كوپ ەكەنىن بىلەمىز. قازىرگى تاڭدا ونى جاس بالالاردان باستاپ ەرەسەكتەرگە دەيىن ءبارى ىشەدى. گازدى سۋ بىرىنشىدەن ءبىزدىڭ اعزامىزداعى كالتسي، تەمىر سەكىلدى مينەرالداردى شايىپ كەتەدى. ال قۇرامىنداعى قانت مولشەرى اعزامىزداعى ينسۋليننىڭ مولشەرىن ارتتىرىپ جىبەرەدى. قازىر كوپشىلىك ادامنىڭ قانت ديابەتىنە شالدىعۋى دا وسى سەبەپتەن. قازىر قانت ديابەتى جاسارىپ كەلە جاتىر»، - دەيدى نۋتريسيولوگ انار نۇرگۇل.

دارىگەر سونداي-اق ىستىق تاماقتان كەيىن سالقىن سۋسىن ىشۋگە بولمايتىنىن ەسكەرتتى.

«كوپشىلىك قامىر-اۋقاتتان كەيىن ءتاتتى گازدالعان سۋسىن ءىشىپ، ەتتى سىڭىرەمىز دەپ تۇسىنەدى. نەگىزى، ءتاتتى گازدالعان سۋسىن ىشەككە تۇسكەننەن كەيىن ول گازدى سۋ بولعاندىقتان، كەرىسىنشە، ىسىنەدى. وعان قوسا، اعزامىز ىستىق تاماقتان كەيىن سالقىن سۋسىن ىشكەندىكتەن، ءبىزدىڭ ميىمىزداعى تەمپەراتۋرانى رەتتەيتىن ورتالىق»تۇسىنبەي«قالادى. سول سالقىن گازدى سۋسىندى جىلىتۋ ءۇشىن اعزا كوپ ەنەرگيا جۇمسايدى. ونىڭ بىزگە كەلىپ-كەتەر پايداسى جوق»، - دەيدى ول.

انار نۇرگۇل ەتتەن كەيىن سورپا ىشۋگە كەڭەس بەردى.

«ۇلتتىق تاعامىمىز قولمەن جەلىنۋى كەرەك. اتا-بابامىز بىلگەن عوي، ونى قولمەن جەگەن كەزدە ساۋساقتارىمىزدىڭ سەزۋى ارقىلى اسقازانعا تاماق بارا جاتقانى، ول قانداي مولشەردە جانە قانداي تەمپەراتۋرادا بارا جاتقانى جايلى ىشكى اعزامىزعا، ميىمىزعا سيگنال بارادى. بەس ساۋساعىمىزبەن الىپ جەگەن كەزدە اۋىز قۋىسىنان فەرمەنت وتە جاقسى بولىنگەن. سوندىقتان كولاسىز-اق ەت-اۋقات وزدىگىنەن جاقسى قورىتىلعان. ەتپەن بىرگە قامىر جەلىنگەننەن كەيىن قامىردى جاقسى قورىتۋ ءۇشىن ارتىنان سورپا بەرىلگەن. سورپاعا قۇرت، ايران، شالاپ قوسىپ ۇسىنعان. قازىر كەي ادامدار سورپادا حولەستەرين كوپ، ول زيان ەكەن دەپ دۇرىس تۇسىنبەي ءجۇر»، - دەپ قورىتىندىلادى نۋتريسيولوگ.

ەسكە سالايىق، قازاق عالىمدارىنىڭ ايتۋىنشا، ەت جەگەن سوڭ، شاي ىشۋگە بولمايدى. ويتكەنى شايدىڭ قۇرامىنداعى تانين اتتى زات ەتتىڭ قۇرامىنداعى ەڭ پايدالى تەمىر ەلەمەنتىن اسقازانعا تۇسكەن كەزدە «ەرىتىپ جىبەرەتىن» كورىنەدى. سودان ەتتىڭ تۇك پايداسى بولماي قالادى.

«حالقىمىز بۇرىن ەتتەن كەيىن قىمىز ىشكەن. ال قىمىز - تاعامدى قورىتاتىن ناعىز كاتاليزاتور. كۇردەلى تاعامدى تەز ىدىراتادى. ال قازىر ءبىز شاي ىشەتىن بولدىق. ەتتەن كەيىن بىردەن شاي ىشۋگە بولمايدى. ويتكەنى شاي قۇرامىنداعى كوفەين مەن تانين ەتتىڭ ەڭ پايدالى ەلەمەنتى - تەمىردى ىدىراتىپ جىبەرەدى. شاي ىشپەۋ كەرەك دەپ ايتپايمىن. ءىشۋ كەرەك. ءبىراق ەت جەگەن سوڭ، 40 مينۋت نە 1 ساعاتتان كەيىن ىشكەن ءجون. وعان دەيىن تاعام ءسىڭىپ ۇلگەرەدى»، - دەپ تۇسىندىرەدى تاعامتانۋشى مايگۇل قايناربايەۆا.