باقىتتى بالا بايقاۋى: ديماش قۇدايبەرگەننىڭ فاناتتارى قاتىسۋشىلارعا ارنايى سىي ازىرلەدى
«Baqytty Bala» بايقاۋى بيىل بەسىنشى رەت ۇيىمداستىرىلىپ جاتىر. وعان الەمنىڭ 5 ەلىنەن كەلگەن 10-16 جاس ارالىعىنداعى 20 جاس ءوسپىرىم ىرىكتەلدى. ءبىر ەرەكشەلىگى - ديماش قۇدايبەرگەننىڭ فاناتتارى قاتىسۋشىلاردى بولەك ماراپاتتايدى.
«Baqytty Bala» - ادەمى فەستيۆال. ۋاقىت زۋ ەتىپ وتە شىقتى. بيىل بەسىنشى رەت ۇيىمداستىرىلدى. قۋانارلىعى - الەمنىڭ تۇكپىر-تۇكپىرىندە قاتىسۋعا نيەت بىلدىرگەن بالالار سانى ارتىپ كەلەدى. بيىل دا 250 دەن استام ءوتىنىش ءتۇستى. ولاردىڭ اراسىنان ىرىكتەۋ جۇرگىزىلدى. بارلىعى 20 بالانى تاۋەلسىز ساراپشى تاڭدادى. ءبارى دە تالانتتى، جانىپ تۇر. ءبىزدىڭ ماقسات - بالالاردى دوستاستىرۋ، ءار ەلدەن كەلگەن بالالاردىڭ ونەر، ءبىلىم كوكجيەگىن كەڭەيتۋ. بۇل جولى اكىمدىك بەلگىلەگەن سىيلىقتان وزگە ديماشتىڭ تىڭدارماندارى دا سىي ازىرلەدى.
«كورەرمەن كوزايىمى» سەكىلدى بىرنەشە نوميناتسيا تابىستالادى. قازىلار القاسى مەن كورەرمەن ۇسىنىسى ەسكەرىلەدى»، - دەدى ءادىلقازىلار القاسىنىڭ مۇشەسى قانات ايتبايەۆ. ونىڭ ايتۋىنشا، ەلىمىزدىڭ ونەرلى بالالارى ديماش قۇدايبەرگەننىڭ نازارىنان تىس قالمايدى. ول ۇنەمى باقىلاپ، ۇناعانىن وتباسىمەن ءبولىسىپ وتىرادى.
«ديماش ءوزى كونسەرتتەرىنە شاقىرىپ، ساحناعا الىپ شىققاندى جاقسى كورەدى. بالالاردىڭ جەتىستىكتەرىن باقىلاپ، شەتەلدە ونەر كورسەتكەندەرىنە قۋانىپ وتىرادى. مەيلى ول بۇل بايقاۋعا قاتىسپاسا دا. ۆيدەوسىن كورسەتەدى. جاقسى ونەر كورسەتكەن بالالاردىڭ بارلىعى دا ءبىزدىڭ كوز قىرىمىزدا بولادى»، - دەدى قانات ايتبايەۆ.
بيىل ىرىكتەۋ كەزەڭىنە يسپانيا، ۇلى بريتانيا، ماسكەۋ، ۋكراينا، وزبەكستان، قىرعىزستان، ءازىربايجان، تاتارستان، ماۆريكي، مولدوۆا، كورەيا، بولگاريا، گەرمانيا، نيدەرلاند ەلدەرىنەن جانە قازاقستاننىڭ بارلىق قالاسى مەن وبلىسىنان وتىنىمدەر قابىلداندى. قازىلار القاسىنىڭ ءتوراعاسى ديماش قۇدايبەرگەننىڭ ۇستازى - مارات ءايتىموۆ. سونىمەن بىرگە قانات ايتبايەۆ، وزبەكستاننان نادەجدا گولەندەر، استانادان راسۋل ۋسمانوۆ، رۋحيا بايدۇكەنوۆا بار.
«مەن ديماش قۇدايبەرگەننىڭ فاناتىمىن. وسى بايقاۋعا ارنايى كەلدىم. مەن سۇيىكتى ءانشىمنىڭ تۋعان جەرىن، بايقاۋدى كورگىم كەلىپ ەدى. بيىل ءساتى ءتۇستى. بۇعان دەيىن الماتىداعى كونسەرتىندە بولدىم. سول كەزدە قازاقستانعا العاش كەلگەن ەدىم. جالپى ءوزىم الەمنىڭ قاي تۇكپىرىندە بولسا دا ديماشتىڭ كونسەرتىنە باراتىن اداممىن. ال تۋعان جەرى بىزگە دە ىستىق»، - دەدى ديماشتىڭ جانكۇيەرى كسەنيا زابولوتنيكوۆا.
