قىتايدا قازاق بالاسى تۋرالى تۇسىرىلگەن فيلم پروكاتقا شىقتى - شەتەلدەگى قازاق باسپا ءسوزى

حوۆد ايماعىندا «قازاق حالقىنىڭ مادەني مۇراسى» كۇندەرى ءوتتى - «Kaznews»
حوۆد ايماعىندا موڭعوليانىڭ پارلامەنت دەپۋتاتى ش. ادشانىڭ قولداۋىمەن حوۆد ايماعى اكىمدىگى جانە حوۆد سۇمىنىڭ اكىمدىگى تاراپىنان «قازاق حالقىنىڭ مادەني مۇراسى» كۇندەرى ۇيىمداستىرىلدى.
بۇل تۋرالى اپتا سوڭىندا موڭعوليانىڭ «Kaznews» اقپاراتتىق پورتالى حابارلادى.
تامىزدىڭ 9-10- كۇندەرى حوۆد سۇمىنىندا وتكەن اتالمىش شارانىڭ اشىلۋىنا حوۆد ايماعىنىڭ اكىمى، باتىس وڭىرلىك كەڭەسىنىڭ باسشىسى ە. بولورماا قاتىسقان.
موڭعوليالىق باسىلىمنىڭ دەرەگىنشە، حوۆد ايماعى كوپ ۇلتتى ازاماتتار تۇراتىن ەرەكشە ولكە. ءىس-شاراعا وراي قازاق ازاماتتاردى قۇتتىقتاپ، ۇيىمداستىرۋعا قولداۋ بىلدىرگەندەرگە سەرتيفيكات تابىس ەتىلدى.
ايتا كەتەيىك، حوۆد ايماعىندا 90700 دەن استام حالىق تۇرادى. ولاردىڭ 11700 گە جۋىعى، ياعني 13 پايىزىن قازاقتار قۇرايدى ەكەن.
«قازاق حالقى ەجەلدەن ءوزىنىڭ قايتالانباس مۇراسىن، مادەنيەتىن، تۇرمىس-تىرشىلىگىن ساقتاپ كەلەدى. ۇيىمداستىرۋشىلار «قازاق حالقىنىڭ مادەني مۇراسى» كۇندىگى ءىس-شاراسىنىڭ ماتەريالدىق جانە ماتەريالدىق ەمەس مادەني مۇرانى، بىرەگەي مادەنيەتتى ساقتاۋ، تاراتۋ جانە دامىتۋدا ماڭىزى زور بولاتىنىن اتاپ ءوتتى»، دەپ جازادى موڭعوليالىق باسىلىم.
شاراعا كورشىلەس بايان- ولگيي ايماعىنان، قازاقستان رەسپۋبليكاسىنان ارنايى ات باسىن تىرەگەن كوپتەگەن قوناقتار قاتىستى. ۇيىمداستىرۋشىلار بۇل كۇندەرى قازاق حالقىنىڭ ەرەكشەلىكتەرىن كورسەتەتىن قويىلىمدار مەن بايقاۋلار ۇيىمداستىردى.
سونىمەن قاتار وسى اپتادا «Kaznews» تە «دوكتور، پروفەسسور قاۋىمداس ءاشىم ۇلىنىڭ جاڭا كىتابى جارىق كوردى» دەگەن اقپارت جاريالاندى.
دوكتور، پروفەسسور قاۋىمداس ءاشىم ۇلىنىڭ جاڭا كىتابى «كيتاب» باسپاسىندا جارىق كورگەن.
موڭعوليالىق باسىلىمنىڭ دەرەگىنشە، موڭعوليانىڭ ينجەنەر- كونسالتينگشىسى، دوكتور، پروفەسسور قاۋىمداس ءاشىم ۇلىنىڭ جاڭا شىققان كىتابى «سيرەك جەر ەلەمەنتتەرى-2» دەپ اتالادى.
قاۋىمداس ءاشىم ۇلى - موڭعولياداعى سيرەك جەر ەلەمەنتتەرى، ولاردىڭ اشىلۋى، پايدالانىلۋى، رەسۋرستارى، ءوندىرىسى مەن تەحنولوگياسى بويىنشا كوپ جىلدار بويى زەرتتەۋلەر جۇرگىزگەن سيرەك عالىمداردىڭ ءبىرى.
ول ءوزىنىڭ «قۇرامىندا سيرەك جەر ەلەمەنتتەرى بار كەندى بايىتۋ ءادىسى» ەڭبەگى بويىنشا 1992-جىلى موڭعول حالىق رەسپۋبليكاسىنىڭ جاڭا ونەرتاپقىش اۆتورى اتانعان.
بۇل جولعى جارىق كورگەن تۋىندىعا زەرتتەۋ ناتيجەلەرى بۇرىن سوڭدى جاريالانعان كىتاپ، گازەتتەر مەن جۋرنالدارداعى ماقالالار مەن سۇحباتتاردان باسقا، شەتەلدىك تەحنولوگيالارمەن بايىتىلعان اۋقىمدى جانە ۇزاق مەرزىمدى زەرتتەۋ ماقالالارى كىرەدى.
قازاق بالاسى تۋرالى قىتايدا تۇسىرىلگەن فيلم پروكاتقا شىقتى - CNR
9- تامىزدا شىڭجاڭ-ۇيعىر اۆتونوميالىق ولكەسى پارتيا كوميتەتىنىڭ ۇگىت-ناسيحات ءبولىمى ۇيىمداستىرۋىمەن «تيانشان فيلم» كينوستۋدياسى تۇسىرگەن «قامشى» بالالار فيلمى رەسمي تۇردە پروكاتقا شىقتى.
بۇل تۋرالى وسى اپتادا قىتايدىڭ «ورتالىق حالىق راديوسى» اقپاراتتىق پورتالى حابارلادى.
ايتا كەتەيىك، «قامشى» فيلمىندە قازاقتىڭ جاس بالاسى اڭسار ءوز ارمانىن جۇزەگە اسىرۋ ءۇشىن اتقا ءمىنۋى تۋرالى باياندالادى. سونىمەن بىرگە فيلمدە التايدىڭ اسەم تابيعاتى دا كورسەتىلگەن.
بۇل فيلمدە قازاقتىڭ اتقا ءمىنۋ مادەنيەتى مەن ءتۇرلى ەتنوستاردىڭ ءبىر-بىرىنە كومەكتەسۋى وزەك ەتىلگەن.
«CNR» - ءدىڭ دەرەگىنشە، رەجيسسەر وسى كينودا كوركەم دالا تابيعاتىنىڭ كورىنىستەرىن الۋ ارقىلى ءبىر جىلدىڭ ءتورت ماۋسىمىندا تۇرلەنىپ تۇراتىن التاي ايماعىنىڭ تاڭعاجايىپ كوركەم كورىنىستەرىن كورسەتكەن. فيلمدە كىشكەنتاي اڭساردىڭ ومىرىندەگى قيىندىقتارى مەن ارمان-مۇراتى باياندالعان. سول ارقىلى اڭساردىڭ ات بايگەسىندە باس جۇلدەنى الىپ، ءوزىنىڭ اعا- باۋىرلارىمەن قالاي تاتۋ- ءتاتتى ءومىر ءسۇرىپ، اكە-شەشەسىنىڭ سۇيىسپەنشىلىگىن تۇسىنەدى. باس كەيىپكەردىڭ جاقسى دوستار اراسىنداعى ۋادەدەن اينىماۋى، كوپتىڭ كومەگىندە مەيىرگە بولەنىپ ەسەيىپ، ەرجەتۋى بەينەلەنەدى.
«بۇل فيلمگە كوپتەگەن اۋەسقوي ارتىستەر قاتىسقان. اسىرەسە، كىشكەنتاي ارتىستەردىڭ بىرنەشەۋى التاي، ىلە ايماعىنداعى قاراپايىم وقۋشىلار. ولاردىڭ كىرشىكسىز كوڭىلىمەن سومداعان ويىندارى كينوعا قاراپايىم ءارى جاتىق سۋرەتتەۋلەردى قوستى»، - دەيدى كينونىڭ رەجيسسەرلەرى دۋن شينۋىن مەن شاپاعات مۇرات.
اتالعان فيلم قىتايدىڭ بىرنەشە مەملەكەتتىك كينوفەستيۆالىندە جۇلدەلى ورىنداردان كورىنىپ، ەل ىشىندە جاسالعان ۇزدىك كينولاردىڭ قاتارىنا ەنگەن.
شىلدەدە جاڭا ەنەرگەتيكالىق كولىكتەردىڭ ساتىلىمى %31,6 عا ءوستى - «حالىق» گازەتى
وسى شىلدەدە قىتايدا جاڭا ەنەرگەتيكالىق كولىكتەردىڭ ءوندىرىسى مەن ساتىلىمى 805000 جانە 780000 بىرلىكتى قۇراپ، سايكەسىنشە %30,6 جانە %31,6 عا ءوسىپ، نارىقتاعى ۇلەسى %32,7 عا جەتكەنىن كورسەتەدى، دەپ حابارلايدى قىتايدىڭ «حالىق» گازەتى باسىلىمى.
اتالعان ب ا ق- تىڭ دەرەگىنشە، شىلدەدە ىشكى نارىقتا جاڭا ەنەرگەتيكالىق اۆتوموبيلدەردىڭ ساتىلىمى وتكەن جىلدىڭ سايكەس كەزەڭىمەن سالىستىرعاندا %26 عا ءوستى. ال ەكسپورتى 101000 قۇراپ، وتكەن ايداعىدان %29,5 عا جانە وتكەن جىلدىڭ سايكەس كەزەڭىمەن سالىستىرعاندا %87 عا وسكەن.
بايان-ولگي ايماعىندا توعىزقۇمالاقتان VI ازيا چەمپيوناتى وتۋدە - «Kaznews»
2023-جىلعى 4-12- تامىز ارالىعىندا موڭعوليانىڭ بايان-ولگي ايماعىندا توعىزقۇمالاقتان VI ازيا چەمپيوناتى وتۋدە، دەپ حابارلايدى موڭعوليانىڭ «Kaznews» اقپاراتتىق پورتالى.
اتالعان ب ا ق- تىڭ مالىمەتىنشە، جارىسقا 9 ەلدىڭ، اتاپ ايتقاندا موڭعوليا، قازاقستان، قىرعىزستان، بانگلادەش، فيليپپين، رەسەي فەدەراتسياسىنىڭ التاي جانە ساحا رەسپۋبليكالارى، وزبەكستان، تۇركيا، تۇرىكمەنستان قاتارلى ەلدەردىڭ 200 دەن استام سپورتشىسى قاتىسۋدا.
بۇل حالىقارالىق باسەكەنى دۇنيەجۇزىلىك توعىزقۇمالاق فەدەراتسياسى مەن موڭعوليا توعىزقۇمالاق فەدەراتسياسى بىرلەسىپ وتكىزۋدە.
سونداي-اق جارىسقا ق ر مادەنيەت جانە سپورت مينيسترلىگى، سامۇرىق-قازىنا قورى مەن سپورتى دامىتۋ قورى دەمەۋشىلىك قولداۋ كورسەتكەن.
تامدىنىڭ بەسبارماعى - «ءو ز ا»
بەسبارماق كەپەسى - كوپشىلىك جاقسى كورەتىن ۇلتتىق تاعامداردىڭ ءبىرى. بۇل تاعام، اسىرەسە ناۋاي ايماعىندا كوپ دايىندالادى، دەپ حابارلادى «ءو ز ا» اقپاراتتىق اگەنتتىگى.
بۇل اقپاراتپەن بىرگە «بەسبارماق» دايىنداۋمەن اينالىسىپ جۇرگەن قازاق ايەلدەرىنىڭ سۋرەتتەرى قوسا جاريالانعان.
وزبەكستاندىق باسلىمنىڭ كەلتىرگەن مالىمەتىنە سۇيەنسەك، جەرگىلىكتى حالىق مۇندا قوناق قۇرمەتىنە مال سويىپ، بەسبارماقپەن سىيلاۋ داستۇرگە اينالعان. بۇل تاعامنىڭ ەرەكشە ءدامى ونى دايىنداۋ قۇپياسىنا بايلانىستى. ياعني، بۇل تاعامعا كەپتىرىلگەن، تۇزدالعان قوي ەتى - قازانعا اسىلادى.
«سونىمەن قاتار تۇيە، وگىز ەتى، جىلقى قازىسى دا پايدالانىلادى. نەگىزىنەن ەت پەن قامىردان تۇراتىن بەسبارماق تارتىلسا، قوناققا قويدىڭ باسى بەرىلەدى. بۇل - قۇرمەتتىڭ بەلگىسى. بۇل قامىردان جاسالعان تاعام قولمەن جەيتىندىكتەن «بەسبارماق» دەپ اتالدى»، دەپ جازادى وزبەكستاندىق ب ا ق.
انكارا تورىندە اباي اندەرى شارىقتادى - «TRT»
2023-جىلى 10- تامىز كۇنى قازاقتىڭ ۇلى اقىنى اباي قۇنانباي ۇلىنىڭ تۋعانىنا 178 جىل تولۋىنا وراي قازاقستاننىڭ تۇركياداعى ەلشىلىگى، انكارا قالاسىنىڭ كەچيورەن مۋنيتسيپاليتەتى، «كوك تۋ» قازاق مادەنيەتى قوعامىنىڭ ۇيىمداستىرۋىمەن «اباي الەمى» اتتى رۋحاني-تاعىلىمدىق ءىس-شارا ءوتتى، دەپ حابارلايدى تۇركيا راديو تەليەۆيزيا پورتالى.
اتالعان اقپارات كوزىنىڭ دەرەگىنە سۇيەنسەك، قازاق جانە تۇرىك زيالىلارى، ستۋدەنتتەر، جەرگىلىكتى تۇرعىندار جانە قازاقستاندىق ازاماتتاردىڭ قاتىسۋىمەن اباي ەسكەرتكىشىنىڭ الدىندا وتكەن شارادا جاستار ابايدىڭ «جەلسىز تۇندە جارىق اي»، «ايتتىم سالەم، قالامقاس»، «قاراڭعى تۇندە تاۋ قالعىپ» اندەرىن شىرقاپ، قارا سوزدەرى مەن ولەڭدەرىن وقىدى.
«انكارا، ستامبۋل، انتاليا سىندى تۇرىك قالالارىندا بوي كوتەرگەن اباي ەسكەرتكىشتەرى باۋىرلاس ەكى ەل اراسىنداعى ىنتىماقتاستىڭ جوعارى دەڭگەيىنىڭ ايقىن كورىنىسى بولا بەرمەك»، دەپ تۇيىندەيدى بۇل اقپاراتتى تۇركيالىق باسىلىم.
قازاقستان ءوز تاۋارىن ەكسپورتتاۋ ءۇشىن يران مەن پارسى شىعاناعى باعىتىن پايدالانۋدى كوزدەپ وتىر - «Parstoday»
قازاقستان اۋىل شارۋاشىلىعى ونىمدەرىن ەكسپورتتاۋ ءۇشىن يران ارقىلى حالىقاراعا تىكەلەي جول اشۋدى كوزدەپ وتىر.
بۇل تۋرالى وسى اپتادا يراندىق «Parstoday» اقپارات اگەنتتىگى حابارلادى.
«Parstoday» اقپارات اگەنتتىگىنىڭ حابارلاۋىنشا، كاسپي تەڭىزىندەگى قازاقستاننىڭ قۇرىق ايلاعى مەن يراننىڭ اميراباد ايلاعى جانە پارسى شىعاناعىنداعى باندار-ابباس ايلاعى ارقىلى جاڭا باعىت اشىلادى. بۇل باعىت ب ا ءا، ءۇندىستان، پاكىستان، قيىر شىعىس، افريكانىڭ شىعىس جاعالاۋلارىنا جۇك جەتكىزۋ ۋاقىتىن ايتارلىقتاي قىسقارتادى.
ايتا كەتۋ كەرەك، سونداي- اق قازاقستان ءۇشىن وسى جول ارقىلى ەۋرووداققا تاۋار ەكسپورتتاۋ مۇمكىندىگى پايدا بولادى.
بەيبىت اتامقۇلوۆ وزبەكستانداعى ەڭ ءىرى مۇراجايلاردىڭ بىرىنە باردى - «ءو ز ا»
وسى اپتادا قازاقستان ەلشىسى بەيبىت اتامقۇلوۆ وزبەكستانداعى ي. ۆ. ساۆيتسكي مۇراجايىنداعى ونەر تۋىندىلارمەن تانىستى، دەپ حابارلايدى «ءو ز ا» اقپاراتتىق اگەنتتىگى.
وزبەكستاندىق باسىلىمنىڭ دەرەگىنشە، 2023-جىل 8- تامىزدا قازاقستان رەسپۋبليكاسىنىڭ وزبەكستان رەسپۋبليكاسىنداعى توتەنشە جانە وكىلەتتى ەلشىسى بەيبىت اتامقۇلوۆ نوكىس قالاسىنداعى ي. ۆ. ساۆيتسكي اتىنداعى مەملەكەتتىك ونەر مۇراجايىنا بارعان.
بەيبىت اتامقۇلوۆ مۇراجايداعى ورىس اۆانگاردىنىڭ جانە جەرگىلىكتى سۋرەتشىلەردىڭ تۋىندىلارى، سونداي- اق قاراقالپاقستان مەن ەجەلگى حورەزم حالىق-قولدانبالى ونەرىمەن تانىسىپ، مۋزەيدەگى ەستەلىكتەر كىتاپشاسىنا جازبا قالدىرعان.
«ي. ۆ. ساۆيتسكي اتىنداعى مەملەكەتتىك ونەر مۇراجايى وزبەكستانداعى ەڭ ءىرى مۇراجايلاردىڭ ءبىرى بولىپ تابىلادى. مۇراجاي كوللەكتسياسى ورىس اۆانگاردىنىڭ كوللەكتسيالارى اراسىندا ماڭىزدىلىعى مەن كولەمى بويىنشا الەمدەگى ەكىنشى، سونداي-اق ازيا ايماعىنداعى ەڭ جاقسى ونەر كوللەكتسياسى رەتىندە تانىلعان»، دەپ جازادى «ءو ز ا» اقپاراتتىق اگەنتتىگى.
اۆتور: بەيسەن سۇلتان