پرەزيدەنتتىك جاستار كادر رەزەرۆىنە بيىلعى ىرىكتەۋ قاشان باستالاتىنى بەلگىلەندى

پرەزيدەنت اكىمشىلىگىنىڭ باسشىسى و. بەكتەنوۆتىڭ توراعالىعىمەن قازاقستان رەسپۋبليكاسى پرەزيدەنتىنىڭ جانىنداعى جاستار كادر رەزەرۆى جونىندەگى ۇلتتىق كوميسسيانىڭ وتىرىسى ءوتتى.
پرەزيدەنتتىك جاستار كادر رەزەرۆى - مەملەكەت باسشىسىنىڭ تالانتتى جاستار ءۇشىن پارمەندى الەۋمەتتىك ليفت بولىپ تابىلاتىن العاشقى جاريا باستامالارىنىڭ ءبىرى.
مەملەكەت باسشىسىنىڭ تاپسىرماسى بويىنشا پرەزيدەنتتىك جاستار كادر رەزەرۆىنە ىرىكتەۋ ەكى جىلدا ءبىر رەت وتەدى. بۇدان بۇرىن ءتيىستى رەزەرۆ 2019 جانە 2021 -جىلدارى جاساقتالدى. ولاردىڭ ىشىنەن 264 رەزەرۆشى مەملەكەتتىك ورگاندار مەن كۆازيمەملەكەتتىك سەكتورداعى ءارتۇرلى لاۋازىمدارعا تاعايىندالدى. 31 رەزەرۆشى ساياسي لاۋازىمداردى، 6 - «ا» كورپۋسىنىڭ اكىمشىلىك لاۋازىمدارىن اتقارادى.
ۇلتتىق كوميسسيانىڭ وتىرىسىندا 1-قىركۇيەكتە باستالىپ، بيىلعى جىلدىڭ سوڭىنا دەيىن جالعاساتىن پرەزيدەنتتىك جاستار كادر رەزەرۆىنە جاڭا ىرىكتەۋدى ۇيىمداستىرۋ ماسەلەلەرى تالقىلاندى.
ىرىكتەۋ شەڭبەرىندە كانديداتتاردىڭ ماتىندىك جانە ساندىق اقپاراتپەن جۇمىس ىستەۋ، سيتۋاتسيالىق تاپسىرمالاردى شەشۋ قابىلەتىن، سونداي-اق قۇزىرەتتەرىن باعالانادى جانە ولار ءبىرقاتار اڭگىمەلەسۋدەن وتەدى.
ىرىكتەۋدەن ءساتتى وتكەن ادامدار مەملەكەتتىك قىزمەتتىڭ جانە كۆازيمەملەكەتتىك سەكتوردىڭ جاۋاپتى لاۋازىمدارىنا كونكۋرستان تىس تاعايىنداۋ قۇقىعىمەن ءۇش جىل مەرزىمگە رەزەرۆكە الىنادى.
ءىس- شارا بارىسىندا مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقبايەۆ الداعى ىرىكتەۋدى وتكىزۋگە دايىندىق تۋرالى باياندادى.
ىرىكتەۋدى وتكىزۋ ءتارتىبى مەن مەرزىمدەرى تۋرالى تولىق اقپارات مەملەكەتتىك قىزمەت ىستەرى اگەنتتىگىنىڭ سايتىندا جاريالانادى.
وتىرىستىڭ قورىتىندىسى بويىنشا اتالعان ءىس- شارانى ساپالى ىسكە اسىرۋ جانە جاستاردى ىرىكتەۋگە قاتىسۋ ءۇشىن كەڭىنەن تارتۋ بويىنشا تاپسىرمالار بەرىلدى.