ابايدىڭ ەسىمىمەن اتالعان قانشا كوشە، مەكتەپ بار

استانا. قازاقپارات - مادەنيەت جانە سپورت ءمينيسترى اسحات ورالوۆ اباي كۇنىنە وراي ءبىرقاتار ستاتيستيكالىق مالىمەتپەن ءبولىستى، دەپ حابارلايدى قازاقپارات.

«اباي - كەيىنگى تولقىن اقىندار مەن جازۋشىلاردى، سۋرەتشىلەر مەن عالىمداردى شىعارماشىلىققا شابىتتاندىرعان ۇلتىمىزدىڭ ءبىرتۋار تۇلعاسى. ەسىمى الەمگە ءماشھۇر، ۇلى ويشىلدىڭ قۇندى ەڭبەكتەرى ونداعان شەت تىلىنە اۋدارىلعان.

اباي قۇنانباي ۇلىنا قويىلعان ەسكەرتكىشتەر تاشكەنت، ماسكەۋ، بىشكەك، رەنن، بەيجىڭ، كاير، بۋداپەشت، تەگەران، ىستانبۇل، نيۋ-دەلي، جەنيەۆا، پاريج، سارايەۆو، تبيليسي، بەرلين، سەۋل، حاركوۆ جانە باكۋ شاھارىنىڭ كوركىن كىرگىزدى.

ال قازاقستاندا اقىننىڭ ەسىمىمەن اتالاتىن 1441 كوشە، 12 داڭعىل، 99 مەكتەپ، 4 كوللەدج جانە 1 تەاتر بار»، - دەپ جازدى مينيستر الەۋمەتتىك جەلىدە.

سونداي-اق ا. ورالوۆتىڭ مالىمەتىنشە، ابايدىڭ قۇرمەتىنە 1 قالا، 3 اۋدان جانە 28 ەلدى مەكەن اتالعان. ال وتكەن جىلى پرەزيدەنت قاسىم-جومارت توقايەۆتىڭ جارلىعىمەن اباي وبلىسى قۇرىلدى، ونىڭ اكىمشىلىك ورتالىعى - سەمەي قالاسى. مەملەكەت باسشىسىنىڭ باستاماسىمەن اتالىپ وتەتىن «اباي كۇنى» ەلىمىزدىڭ ءار وڭىرىندە ابايدىڭ ءومىرى مەن شىعارماشىلىعىنا ارنالعان مادەني جانە عىلىمي ءىس-شارالار ۇيىمداستىرىلادى.