قازاقستاندا باسپانا ارزاندادى

استانا. قازاقپارات - ءبىرىنشى كرەديتتىك بيۋرو شىلدە ايىندا باسپانا نارىعىندا باعالار قالاي وزگەرگەنىن ءمالىم ەتتى، دەپ حابارلايدى قازاقپارات ءتىلشىسى.

اقپاراتقا سۇيەنسەك، ەكىنشى نارىقتا ءۇي باعاسى ارزانداپ كەلەدى. وسىنىڭ الدىنداعى ايداعى كورسەتكىشكە قاراعاندا، ءبىر شارشى مەتردىڭ قۇنى 1,7 پايىزعا تومەندەپ، 494,4 مىڭ تەڭگەنى قۇرادى.

كەيىنگى 5 ايدىڭ تورتەۋىندە باعا ءتۇسىپ جاتىر (مامىردا وزگەرگەن جوق). اتاپ ايتقاندا، وسىنداي جاعداي 2015 -جىلدان بەرى العاش بايقالىپ وتىر.

«جالپى كورسەتكىشتىڭ ديناميكاسىنا نەگىزگى ۇلەستى 5 ءىرى قالا قوستى. استانادا ەكىنشى نارىقتاعى ۇيلەردىڭ باعاسى ەداۋىر تومەندەپ جاتىر (%3,4). سونىمەن قاتار الماتى (%1,5) ، كوكشەتاۋ (%1,3) جانە قوستاناي (%1) قالالارىندا دا ەداۋىر ءتۇستى. ال وسكەمەندە بۇل كورسەتكىش (%0,5) ايتارلىقتاي جوعارى ەمەس»، - دەلىنگەن بيۋرو مالىمەتىندە.

جالپى، جىل باسىنان قايتا ساتىلىمعا تۇسكەن باسپانا 3,7 پايىزعا، ءبىر جىلدا 0,7 پايىزعا ارزاندادى.

سونىمەن قاتار جاڭا باسپانا قۇنى دا تۇسكەن. دەگەنمەن، سونشالىقتى كوپ ەمەس -%0,1. قازىر شارشى مەترى 486,2 مىڭ تەڭگە شاماسىندا.

باسپانانىڭ ارزانداۋى 4 ءىرى قالادا بايقالدى، ياعني پاۆلودار (%2,2)، قوستاناي (%1,7)، الماتى (%0,6) جانە كوكشەتاۋ (%0,9) قالالارىن اتاپ وتۋگە بولادى.

بۇدان بولەك، باسپانانى جالعا الۋ قۇنى وسكەن. شىلدەدە جالعا الىنعان ۇيدەگى شارشى مەتردىڭ قۇنى 4,7 مىڭ تەڭگەنى قۇرادى، بۇل ونىڭ الدىنداعى ايدىڭ دەڭگەيىنەن 1,9 پايىزعا جوعارى.

جالعا الۋ قۇنى ەڭ كوپ قاراعاندىدا ءوستى -%3,9. ودان كەيىنگى ورىندا الماتى -%3,1. باعانىڭ كوتەرىلۋى پەتروپاۆلدا %0,6 جانە شىمكەنتتە %0,1 دا بايقالدى. قالعان قالالاردا، ونىڭ ىشىندە استانادا باعا وزگەرگەن جوق.

جىل باسىنان بەرى جالعا الۋ اقىسى 1,5 پايىزعا تۇسكەن. الايدا ءبىر جىل قورىتىندىسى بويىنشا ونىڭ قۇنى 28,6 پايىزعا ءوستى.