قاراعاندىدا جاپپاي اۋرۋحاناعا تۇسكەن بالالاردىڭ نەدەن ۋلانعانى بەلگىلى بولدى
بۇل تۋرالى ۇكىمەت وتىرىسىندا دەنساۋلىق ساقتاۋ ءمينيسترى اجار عينيات ءمالىم ەتتى، دەپ حابارلايدى قازاقپارات ءتىلشىسى.
«قاراعاندى وبلىسىنىڭ ارناۋلى الەۋمەتتىك قىزمەت كورسەتۋ ورتالىعىنان اۋرۋحاناعا تۇسكەن 14 بالانىڭ جەتەۋى ساۋىعىپ، اۋرۋحانادان شىعارىلدى. قازىرگى تاڭدا ولار سول ورتالىقتاعى دارىگەرلەردىڭ باقىلاۋىندا. التى بالا رەانيماتسيا بولىمشەسىندە جاتىر، ءتورت بالانىڭ جاعدايى وڭ ديناميكامەن اۋىر جاعدايدا قالىپ وتىر. ەكى بالانىڭ جاعدايى وتە اۋىر كۇيدە. جاعدايدىڭ اۋىرلىعى نەۆرولوگيالىق جانە ينتوكسيكاتسيالىق سيندرومىنا، تىنىس الۋ جەتكىلىكسىزدىگىنە بايلانىستى بولىپ وتىر»، - دەدى ا. عينيات.
ونىڭ ايتۋىنشا، وسى وقيعا بويىنشا رەسپۋبليكالىق جانە وبلىستىق دەڭگەيدەگى مامانداردىڭ كەڭەيتىلگەن كونسيليۋمدارى كۇن سايىن ۇيىمداستىرىلىپ جاتىر.
«مينيسترلىك زارداپ شەككەن بالالاردىڭ جاعدايىنا مونيتورينگ جۇرگىزۋدى جانە مەديتسينالىق كومەك كورسەتۋدى جالعاستىرىپ جاتىر. دەنساۋلىق ساقتاۋ مينيسترلىگىنىڭ سانيتاريالىق- ەپيدەميولوگيالىق باقىلاۋ كوميتەتى ەپيدەمياعا قارسى جانە تەكسەرۋ ءىس-شارالارىن جالعاستىرىپ وتىر. الدىن الا ەپيدەميلوگيالىق تەكسەرۋ، زەرتحانالىق زەرتتەۋ ناتيجەلەرى اۋرۋدىڭ تارالۋ سيپاتى تاماقتان ۋلانۋدان بولماعانىن، سونداي-اق ينفەكسيالىق اۋرۋلاردىڭ جوقتىعىن كورسەتتى. بۇل جاعدايدىڭ بولۋى سەبەبىنە توقتالساق، دارىگەر ماماندار توكسيكالىق زاتتان قاتتى ۋلانۋ دەپ پايىمدايدى. قازىر سوت-مەديتسينالىق ساراپتاما ءجۇرىپ جاتىر. بالالاردىڭ جاعدايى مينيسترلىكتىڭ ەرەكشە باقىلاۋىندا»، - دەدى مينيستر.
ەستەرىڭىزگە سالا كەتەيىك، 30-شىلدەدە قاراعاندى وبلىسىنىڭ بالالارعا ارناۋلى الەۋمەتتىك قىزمەت كورسەتۋ ورتالىعىندا بىرنەشە بالا ۋلانىپ، ونىڭ بىرەۋى قايتىس بولدى، التاۋى جانساقتاۋ بولىمىندە جاتىر.
ق ر دەنساۋلىق ساقتاۋ ءمينيسترى اجار عينيات حابارلاعانداي، ىشەك ينفەكسياسىنا جۇرگىزىلگەن سىناق تەرىس ناتيجە بەردى.
