روزا رىمبايەۆا دەپۋتات بولۋىنا نە سەبەپ بولعانىن ءتۇسىندىردى

ون جىلدان بەرى كاسىپكەرلىكتىڭ تاسىن ورگە دومالاتىپ، بىرنەشە ادامعا جۇمىس ۇسىنىپ وتىرعان كەيىپكەرىمىز بۇگىندە ءماسليحات مىنبەرىنەن ماسەلەلەردى كوتەرىپ ءجۇر.
mangystaumedia.kz سىلتەمە جاساپ، سۇحباتتى نازارلارىڭىزعا ۇسىنامىز.
- روزا رىمباي قىزى، ءسىزدى كوپشىلىك دەپۋتات رەتىندە اتىڭىزدى اتاعاندا ەلىمىزگە بەلگىلى ءانشىنىڭ ماڭعىستاۋدا دەپۋتات بولدى دەپ ويلاپ قالعان ساتتەر بولدى. وسى رەتتە ءوزىڭىز تۋرالى ايتا وتىرساڭىز؟
- مەنىڭ اتى-ءجونىم بەلگىلى ونەر جۇلدىزىمەن بىردەي بولعانى راسىمەن دە كەزدەيسوقتىق. تۋعان كۇنىمىزدىڭ اراسى 4 كۇن ەكەن. الايدا اكە-شەشىم انشىگە ۇقساسىن دەپ ازان شاقىرىپ، روزا دەپ قويىپتى. ءوزىم 1993 -جىلدىڭ 24-قازانىندا اقتاۋ قالاسىندا جارىق دۇنيە ەسىگىن اشتىم.
- اتىڭىزعا ساي ءاۋ باستا ءانشى بولامىن دەگەن ارمان- ماقساتىڭىز بولعان شىعار؟
- وسى ورايدا ءبىرى قىزىق جايتتى كەڭىرەك ايتا كەتكىم كەلىپ تۇر. مەنىڭ اتىمدى ادەيىلەپ اتاقتى انشىمىزگە ۇقساسىن دەپ قويدى عوي. سونىمەن بىرگە، روزا اپامىز ەكەۋىمىز دە تاۋىق جىلى تۋىپپىز. ول كىسى 1957 -جىلى دۇنيەگە كەلسە، مەن اراعا 36 جىل سالىپ دۇنيە ەسىگىن اشىپپىن. جۇلدىز بەلگىمىز دە سارىشايان. ەگەر مەن 1-2 كۇن ومىرگە ەرتە كەلگەندە جۇلدىز بەلگىم تارازى بولار ما ەدى… بۇل ۇقساستىقتاردى ءوزىم كەيىن بايقادىم. اتا-انام دا ول جونىندە مەنەن ەستىدى. كەيدە انشىمەن مىنەزىمىز دە ۇقساستىق بار ما ەكەن دەگەن ساۋال تۋىندايدى. ءبىراق مەن ونەر جولىن ەمەس، كاسىپكەرلىك باعىتتى تاڭدادىم. روزا اپامىز سەكىلدى ەلىمىزدىڭ دامۋى جولىندا ءوز ۇلەسىمدى ازدى-كوپتى قوسىپ ءجۇرمىن دەپ ەسەپتەيمىن. ءان ايتۋ تۋرالى ءتۇرلى ماقسات بولعانىمەن، كەيىن تاڭداۋ باسقا ارناعا بۇرىلدى.
- بيىل دەپۋتات رەتىندە ءماسليحات مانداتىن يەلەندىڭىز؟ دەپۋتات بولۋعا نەلىكتەن بەكىندىڭىز؟
- بۇل جاۋاپتى جۇمىسقا ەلدىڭ قولداۋى ارقىلى كەلدىم. بلوگەر بولعانىم راس. حالىق دەمەپ، ماسەلەنى مىنبەردەن ايتساڭىز دەگەن سوڭ ويلانا كەلە، اقتاۋ قالاسىندا №20-سايلاۋ وكرۋگ بويىنشا ساياسي دودادا باق سىنادىق. تۇرعىنداردىڭ داۋىس بەرۋى ناتيجەسىندە حالىق قالاۋلىسى اتاندىق. ەندى سونىڭ جاۋاپكەرشىلىگىن سەزىنىپ، ءۇمىتتى اقتاپ، تۇرعىندار ماسەلەسىن شەشۋگە بىلەك سىبانا كىرىسكەن جايىمىز بار.
- نەگىزىنەن قانداي ماسەلەلەردى كوتەرىپ ءجۇرسىز؟
- كاسىپكەرلىكتى قولداۋ تۋرالى ماسەلەلەردى ايتىپ ءجۇرمىن. ەلىمىزدە جاستار ماسەلەسى، ولارعا قولداۋ كورسەتۋ كەزەك كۇتتىرمەيتىن ماسەلە. مۇمكىندىگىنشە، تۇرعىنداردىڭ دا ارىز-شاعىمىنا نازار اۋدارىپ، وڭتايلى شەشىلۋى ات سالىسىپ جاتقان جايىم بار. دەپۋتات رەتىندە الدا كوپتەگەن جوسپارلارىم بار. سول باعىتتا تاباندى ەڭبەك ەتىپ، ايتۋلى ناتيجەگە قول جەتكىزەمىن دەگەن ويدامىن.
- ءسىز وبلىس بويىنشا ەڭ جاس دەپۋتات ەكەنسىز؟ جالپى، 29 جاستا دەپۋتات بولۋدىڭ جۇگى قانداي؟
- ەندى بۇعان دەيىن ماجىلىستە مەنەن دە كىشى جاستار دەپۋتات بولدى عوي. ال اقتاۋ قالالىق ءماسليحاتىنىڭ بۇل جولعى شاقىرىلىمىندا مەن جاس دەپۋتات رەتىندە سايلاۋشىلاردىڭ جوعارى داۋىسىنا يە بولىپپىن. بۇنىڭ جۇگى ارينە، جەڭىل ەمەس. حالىقپەن ءاردايىم كەزدەسىپ، تۇرعىندار ايتقان ماسەلەگە بەيجاي قاراماۋ كەرەك دەپ سانايمىن.