قازاقستاندا تاعى ءبىر قاۋىپسىز ەمەس بالالار ويىن الاڭى انىقتالدى - فوتو

ستەپنوگور قالاسىنىڭ پروكۋراتۋراسى كامەلەتكە تولماعانداردىڭ قاۋىپسىزدىگىن قامتاماسىز ەتۋ بويىنشا تالداۋ جۇرگىزدى.
ستەپنوگور اۋماعىندا 35 الاڭ بار، ولاردىڭ جاي-كۇيى قاناعاتتانارلىقسىز. ال كەيبىر جاعدايدا ولاردى ودان ءارى پايدالانۋ بالالاردىڭ جاراقاتتانۋىنا جانە اسا اۋىر زارداپتارعا اكەپ سوعۋى مۇمكىن.
«مىسالى، وسى جىلدىڭ ءساۋىر ايىندا 9-شاعىن اۋدانىنداعى ويىن الاڭىندا كامەلەتكە تولماعان جاس ءوسپىرىمنىڭ دەنە جاراقاتىن العانى جانە وعان مەديتسينالىق كومەك كورسەتىلگەنى انىقتالدى، دياگنوز: «ۇستىنگى يەكتىڭ جاراقاتى». دەنە جاراقاتىن شىبىققا ءىلىنۋ ارقىلى العان»، - دەدى اقمولا وبلىسى پروكۋراتۋراسىنىڭ باسپا ءسوز قىزمەتىنەن.
سونداي-اق پروكۋراتۋرا قىزمەتكەرلەرى وسىنداي ءتورت بالالار ويىن الاڭىن انىقتادى. اتالعان الاڭداردا بالالاردىڭ دەنە جاراقات الۋ دەرەكتەرى بار.
«جۇرگىزىلگەن تالداۋ بارىسىندا جەرگىلىكتى اتقارۋشى ورگاندار تاراپىنان وزگە دە زاڭ بۇزۋشىلىقتارعا ورىن بەرىلگەنى انىقتالدى. قاداعالاۋ اكتىسىمەن اقاۋى بار بالالار الاڭدارى ءتيىستى جۇمىستار جۇرگىزۋ ارقىلى سايكەستىككە كەلتىرىلدى. وسىعان وراي 7123 كامەلەتكە تولماعان بالالاردىڭ قۇقىقتارى قورعالدى جانە 1 لاۋازىمدى تۇلعا تارتىپتىك جاۋاپقا تارتىلدى»، - دەپ تولىقتىردى ۆەدومستۆودان.
ايتا كەتسەك، بۇدان بۇرىن اقمولا وبلىسىنداعى بالالار لاگەرىندە ساموگون اپپاراتى، پنەۆماتيكالىق قارۋ تابىلعانىن جازعان ەدىك.