قازاقستاننىڭ كۇنباعىس مايى قىمباتتاۋىنا بايلانىستى اۋعانستان بىزدەن ماي الۋدى قويدى

استانا. قازاقپارات - اۋعانستان قازاقستاندىق كۇنباعىس مايىنىڭ قىمبات بولۋىنا بايلانىستى وسى ءونىمدى ساتىپ الۋدى ازايتا باستادى.
None

بۇل تۋرالى استاناداعى قازاقستان-اۋعانستان ىسكەرلىك فورۋمىندا «باشير ناۆيد كومپلەكس» باس ديرەكتورى نۋريددين زاكەر احمادي ايتتى، دەپ حابارلايدى قازاقپارات ءتىلشىسى.

«ءبىز قازاقستانداعى بيزنەس فورۋم مەن كورمەگە قاتىسقانىمىزعا وتە قۋانىشتىمىز. قازاقستان ۇكىمەتى ءبىزدى قولدايدى دەپ سەنەمىز. قازاقستاننان اۋعانستانعا استىق پەن ۇندى ۇلكەن كولەمدە يمپورتتاپ جاتىرمىز. بۇگىنگى فورۋم اياسىندا ءوزارا ءتيىمدى ۇسىنىستاردى كۇتەمىز»، - دەدى نۋريددين زاكەر احمادي.

ونىڭ ايتۋىنشا، اۋعانستان كاسىپكەرلەرى بۇرىندارى قازاقستاننان كۇنباعىس مايىن يمپورتتاعان.

الايدا قازىر بۇل ءونىمدى الۋ ءتيىمسىز بولا باستادى.

«قازىر كۇنباعىس مايى قىمباتتاپ كەتتى. سوندىقتان ءبىز رەسەيدەن، ۋكراينادان ساتىپ الىپ جاتىرمىز. بۇل ەلدەر قازاقستانعا قاراعاندا ارزانىراق بەرىپ جاتىر»، - دەدى اۋعانستان كاسىپكەرى.

بۇل تۇرعىدا ول ەكى جاقتىڭ ساۋدا ماسەلەسىن شەشۋگە باعىتتالعان بىرلەسكەن پالاتا قۇرۋدى ۇسىندى.

ايتا كەتەيىك، استاناداعى قازاقستان-اۋعانستان ىسكەرلىك فورۋمى اياسىندا جالپى سوماسى 190,8 ميلليون دوللاردى قۇرايتىن ەكسپورتتىق كەلىسىمشارتتارعا قول قويىلدى.

قول قويىلعان قۇجاتتاردىڭ ءبىرازى ماي تاسىمالداۋ بويىنشا شارتتاردى قامتىپ تۇر.

سوڭعى جاڭالىقتار