ا ق ش سوتى مۇحتار ابليازوۆ ب ت ا بانك اقشاسىن ۇرلاپ، امەريكاعا جىلىستاتقانىن راستادى

استانا. قازاقپارات - نيۋ-يوركتىڭ وڭتۇستىك وكرۋگى بويىنشا ا ق ش وكرۋگ سوتى دجون گ. كوەلتل Triadou SPV S. A- عا قارسى شاعىمعا وراي «ب ت ا بانكى» ا ق پايداسىنا 193 ميلليون دوللاردان استام سوماعا شەشىم شىعاردى، دەپ حابارلايدى قازاقپارات ءتىلشىسى.
None

سوت جاۋاپكەر Triadou SPV - ابليازوۆتىڭ كۇيەۋ بالاسى يلياس حراپۋنوۆ قۇرعان جانە باقىلايتىن جالعان كومپانيا ەكەندىگىن راستادى.

كومپانيا ب ت ا- دان ۇرلانعان قاراجات تۇرىندە 70 ميلليوننان استام ا ق ش دوللارىن الىپ، ونى نيۋ-يوركتەگى جانە امەريكا قۇراما شتاتتارىنىڭ باسقا جەرلەرىندەگى جىلجىمايتىن مۇلىككە ينۆەستيتسيا رەتىندە سالعان.

«سوتتا ۇسىنىلعان دالەلدەر Triadou اتىنان قۇراما شتاتتارىنا سالىنعان قاراجات ب ت ا بانكتەن ابليازوۆتىڭ وزگە دە جالعان كومپانيالار ارقىلى ۇرلاعان 115,3 ميلليون دوللارمەن تىكەلەي بايلانىستى ەكەنىن كورسەتەدى»، - دەپ جازىلعان سوت قورىتىندىسىندا.

سوت بارىسىندا ءىلياس حراپۋنوۆ اناسىنىڭ Triadou SPV كومپانياسىن ءۇشىنشى تۇلعاعا - فيليپپ گلاتتسكا ساتقانىن ايتقان.

الايدا سوت «گلاتتستىڭ Triadou SPV كومپانياسىن ساتىپ العانى جالعان، اقشانى ءىلياستىڭ ءوزى بەرگەن. سوت پروتسەسى باستالعاننان كەيىن دە ءىلياس حراپۋنوۆ Triadou SPV كومپانياسىنا باقىلاۋ جاساۋىن جالعاستىرعان» دەگەن قورىتىندىعا كەلدى.

سوت پەن القابيلەر كۋاگەرلەردى، ونىڭ ىشىندە ءابليازوۆ پەن ونىڭ سىبايلاستارىن، سونىمەن قاتار كۋاگەر ساراپشىلاردى تىڭدادى.

سوت ب ت ا بانكى ۇسىنعان دالەلدەمەلەر ابليازوۆتىڭ ب ت ا كورپوراتيۆتىك بيزنەس باسقارماسىن «وفشورلىق كومپانيالارعا جالعان نەسيە بەرۋ» ارقىلى ميلليارد دوللار ۇرلاۋ ءۇشىن پايدالانعان دەگەن قاۋلى قابىلدادى.

«نيۋ-يورك سوتى مەن القابيلەرگە مۇحتار ءابليازوۆتىڭ بتا بانكىن ميلليارد دوللارعا الداعانىن جانە ۇرلانعان اقشانى ا ق ش- قا جىلىستاتقانىن دالەلدەي الدىق. بۇل ءىس ادىلدىكتى قالپىنا كەلتىرۋ جولىنداعى ب ت ا بانكىنىڭ ماڭىزدى قادامى بولدى جانە ابليازوۆ پەن ونىڭ ىمىرالاستارىن جاۋاپكەرشىلىككە تارتۋ ءۇشىن شەشۋشى مانگە يە»، - دەدى Boies Schiller Flexner LLP باسقارۋشى سەرىكتەسى جانە ب ت ا كەڭەسشىسى مەتتيۋ ل. شۆارتس.

بۇعان دەيىن باس پروكۋراتۋرا مۇحتار ابليازوۆتى ەلگە قايتارۋعا بار كۇشىن سالاتىنىن ايتقان ەدى.

بىلتىر جەلتوقساندا فرانسيا مۇحتار ابليازوۆكە ساياسي باسساۋعا بولۋدان باس تارتتى.

امەريكا القابيلەر سوتى اقشا ۇرلاۋ فاكتىسى بويىنشا مۇحتار ءابليازوۆقا $218 ميلليون ايىپپۇل سالدى.

سوڭعى جاڭالىقتار