جامبىلدىق وقۋشىلار ينسۋلت، ينفاركتان قۇتقاراتىن ساعات جاسادى

ول يەسىنىڭ جۇرەك سوعىسى مەن قان قىسىمىن باقىلاۋدا ۇستاپ، ادام ومىرىنە ءقاۋىپ تونگەن جاعدايدا بەلگى بەرەدى، دەپ حابارلايدى ق ر وقۋ-اعارتۋ مينيسترلىگىنىڭ باسپا ءسوز قىزمەتى.
بۇل اقىلدى ساعاتتى دارىندى بالالارعا ارنالعان وبلىستىق مامانداندىرىلعان ليتسەيدىڭ 9-سىنىپ وقۋشىسى دۋلات يسابەك پەن 8-سىنىپ وقۋشىسى اديا تۇرسىنباي ويلاپ تاپقان.
ساعاتقا دەنە تەمپەراتۋراسىن، قانداعى وتتەگى پايىزىن، جۇرەك قاعىسىن باقىلاپ تۇرۋ فۋنكتسيالار ەنگىزىلگەن. سونداي-اق، ول ناۋقاس قۇلاپ قوزعالىسسىز قالعان جاعدايدا تۋىسىنا نەمەسە جەدەل جاردەمگە دابىل جىبەرەدى. ەڭ باستىسى، ناۋقاستىڭ مەكەن-جايىن، جاتقان جەرىن ناقتى كورسەتەدى.
«ناۋقاستارعا ءتۇرلى سەبەپتەرمەن العاشقى كومەك ۋاقىتىنان كەش بەرىلىپ جاتاتىن كەزدەر بولادى. وسىنداي جاعدايلاردىڭ الدىن الۋ جانە ناۋقاستارعا كومەكتەسسەك دەگەن ويمەن العاشقى كومەكتىڭ جەدەل كەلۋىن قامتاماسىز ەتەتىن ساعاتتى جاساپ شىعاردىق»، - دەيدى جاس ونەرتاپقىش دۋلات يسابەك.
وقۋشىلاردىڭ ونەرتابىسىن سىناپ كورۋ ءۇشىن كارديولوگ پەن پاتسيەنتتەردىڭ پورتاتيۆتى اپپاراتپەن ديناميكالىق باقىلاۋى جۇرگىزىلدى. دۋلات پەن اديا الداعى ۋاقىتتا ساعاتتى ادامداردىڭ ۇنەمى تاعىپ جۇرۋىنە ىڭعايلى ەتىپ جاساۋ جولدارىن قاراستىرۋدا.