ەسىمىن دە وزگەرتكەن: قازاق قىزىن العان كورەيالىق ەر ادام يسلام ءدىنىن قابىلدادى

استانا. قازاقپارات - نازىم جۇماتايەۆا بۇدان 7 جىل بۇرىن كورەيالىق ازاماتپەن باس قوسقان.
None

ول - قىزىلوردا وبلىسى شيەلى اۋدانىنىڭ تۋماسى. شاڭىراق كوتەرگەنىنە بىرنەشە جىل وتكەننەن كەيىن نازىمنىڭ كورەيالىق كۇيەۋى يسلام ءدىنىن قابىلداۋعا بەل بۋعان.

قازاقستانعا كەلگەن وتباسى مۇسىلمانشا نەكە قيىپ، كەنجە قىزىنا ازان شاقىرىپ ەسىم بەرگەن. نازىمنىڭ كۇيەۋى بۇل شەشىمگە قالاي كەلدى؟ وعان قانداي ەسىم بەرىلدى؟

نازىم بۇدان 8 جىل بۇرىن وڭتۇستىك كورەياعا جۇمىس بابىمەن بارىپ، سول جاقتا قالعان. ءبىر جىلدان كەيىن، 2016 -جىلى، كۇيەۋىمەن تانىسقان. اراعا تاعى ءبىر جىل سالىپ، جۇپ شاڭىراق كوتەرەدى. ال 2018 -جىلى تۇڭعىش قىزى، كەيىن 2020 -جىلى ۇلى، 2022 -جىلى كەنجە قىزى سايانا دۇنيەگە كەلگەن.

نازىمنىڭ ايتۋىنشا، كۇيەۋى بۇعان دەيىن دە قازاقستانعا كەلگەن. ءبىراق بۇل ساپارىندا ءبارى باسقاشا بولدى.

بۇل جولى كۇيەۋى ءبىرجولا مۇسىلمان ءدىنىن قابىلداعان، وعان قوسا، كەنجە قىزىنا ازان شاقىرىپ جاڭا ەسىم بەرىلگەن.

«بۇدان 2 جىل بۇرىن كۇيەۋىمە يسلام ءدىنىن قابىلداۋعا ۇسىنىس جاساپ كوردىم، قارسى پىكىر ايتپادى، كەرىسىنشە، «قابىلداۋعا دايىنمىن» دەدى. سودان جۇرە كەلە سەۋل قالاسىنداعى مەشىتكە بارامىز دەپ كەلىستىك، ءبىراق ۋاقىتىمىز بولماي، بارلىق ءجون-جورالعى استاناعا كەلگەندە عانا جاسالدى. مۇسىلمانشا نەكە قيدىق، قىزىما ازان شاقىرىپ سايانا دەگەن ەسىم بەردىك»، - دەدى ول.

نازىم جۇماتايەۆا ماھرگە التىن سۇراعانىن ايتتى.

نازىمنىڭ ايتۋىنشا، كەنجە قىزى دۇنيەگە كەلگەندە سوحيەن دەگەن ەسىم بەرىلگەن. سوحيەن كورەي تىلىنەن اۋدارعاندا «كىشكەنتاي جۇلدىز، جارىق جۇلدىز» دەگەن ماعىنا بەرەدى. استاناعا كەلگەن جۇپ كەنجە قىزىنا ازان شاقىرىپ، سايانا ەسىمىن بەرگەن.

قىزىنا ەسىم بەرىلگەننەن كەيىن شاڭىراقتىڭ ۇلكەندەرى سايانانى بەسىككە بولەگەن. ولار الدىمەن سالت بويىنشا بەسىكتى الاستاپ، «تىشتىما» ىرىمىن جاساعان. كەيىن ساياناعا ءالديىن ايتىپ، ونى بەسىككە سالعان.

يسلام ءدىنىن قابىلداعان نازىمنىڭ جۇبايى دجون حەدجينگە دە جاڭا ەسىم بەرىلگەن.

«ۇلكەن كىسىلەر ماعان»جىراقتا قامقور بولىپ ءجۇرسىن«دەگەن نيەتپەن كۇيەۋىمە قامقور دەگەن ەسىم بەردى. كۇيەۋىم العاشىندا قامقور دەگەن ەسىمنىڭ ءبىرتۇرلى ەستىلەتىنىن ايتىپ، باسقا ەسىم العىسى كەلگەن، الايدا ماعىناسىن تۇسىنگەننەن كەيىن ويىنان اينىپ قالدى»، - دەدى كەيىپكەر.

بۇدان باسقا وتقا ماي قۇيۋ (جاس وتاۋ شاڭىراعى كوتەرىلگەندە جاسالاتىن جاقسى ىرىمداردى ءبىرى - ەسك.) ءداستۇرى دە جاسالعان.

«وتقا ماي قۇيۋ ءداستۇرىن اكەمنىڭ اعاسىنىڭ ايەلى، ۇلكەن مامام ايتكۇل جاسادى. قازاقستانعا العاش كەلۋى ەمەس، ءبىراق ءبىزدىڭ شاڭىراققا العاش كەلىپ وتىر. سوندىقتان ۇلكەندەر وسىلاي قارسى الدى»، - دەيدى نازىم.

Посмотреть эту публикацию в Instagram

Публикация от Оңтустік Кореядағы қазақ қызы Назым 2 - ші парақша (@_nazym_korea1)

اقپارات دەرەككوزى: Massaget.kz

سوڭعى جاڭالىقتار