سەكىرگەندەردە باسقا امال بولعان جوق - ورتەنگەن ءۇيدىڭ تۇرعىندارى كەشە نە كورگەنىن ايتىپ بەردى

الماتى. قازاقپارات - الماتىدا «اقكەنت» شاعىناۋدانىنداعى 16 قاباتتى ءۇيدىڭ تۇرعىندارى الاپات ورتتەن قالاي امان قالعانىن ايتىپ بەردى، دەپ حابارلايدى قازاقپارات ءتىلشىسى.
None

29 جاستاعى تىلەۋجان احمەتقان ءورت كەزىندە تەك ءوزىن عانا ەمەس، كورشىلەرىن دە ويلاعان.

ول الدىمەن پاتەردەن ايەلى مەن بالالارىن شىعارىپ، كەيىن كورشىلەرىنە كومەككە بارعان.

«ەكىنشى قاباتتا تۇرامىن. ەڭ الدىمەن پاتەردە كۇيىكتىڭ ءيىسىن سەزدىم، كەيىن كىرەبەرىستەن قارا ءتۇتىندى كوردىم. بىردەن بالالارىم مەن ايەلىمدى سىرتقا شىعاردىم، كەيىن باسقالارعا دا كومەكتەسەمىن دەپ شەشتىم. ەشتەڭە ويلاعان جوقپىن، قورقىنىش سەزىمى دە بولعان جوق. كورشىلەردىڭ دەمالۋ ءۇشىن تەرەزەدەن باسىن شىعارىپ تۇرعانىن كوردىم، جىلاعان بالالاردىڭ داۋىسىن ەستىدىم. وعان شىداپ تۇرا المادىم. جوعارعى قاباتتان تۇرعىنداردى قۇتقارۋ ءۇشىن پودەزگە قايتا جۇگىردىم. قارا تۇتىننەن ەشتەڭە كورىنبەدى، ءبىراق كورشىلەرىمنىڭ پاتەرىنە كىرىپ، باسپالداقپەن بىرنەشە ادامدى سىرتقا شىعاردىم، اۋزىم مەن مۇرنىمدى جاۋىپ الدىم. قازىر كورشىلەر مەنىڭ 20 عا جۋىق تۇرعىندى شىعارعانىمدى ايتادى، ونىڭ كوپشىلىگى - بالالار»، - دەيدى تىلەۋجان.

ول سونداي-اق جاقسى كورشىدەن ايىرىلىپ قالعانىن ايتتى.

«اسەلدى تانيتىنمىن. وتە مەيىرىمدى، كومەكتەسۋگە دايىن تۇراتىن ەلگەزەك قىز ەدى. ونىڭ اپايى قازىر اۋرۋحانادا جاتىر. ول دا جاقسى ادام. اسەلگە كومەكتەسە الماعانىما وكىنەمىن. قازىر باسقا زارداپ شەككەن تۇرعىندار ءۇشىن دۇعادامىز، ولاردىڭ تەز ساۋىعىپ كەتۋىن تىلەيمىن»، - دەدى تىلەۋجان احمەتقان.

جاسۇلان ەسىمدى تۇرعىن دا ءورت كەزىندەگى ءىس-ارەكەتى جايىندا ايتىپ بەردى. ول ءۇيدىڭ 16-قاباتىندا تۇرادى.

«باسىندا نە بولىپ جاتقانىن تۇسىنبەدىم. پاتەردە ءتۇتىننىڭ ءيىسى سەزىلدى. پودەزگە شىعىپ قاراسام كوك ءتۇتىن ەكەن. ازداپ ۇرەيلەندىم. بالالارىم ءتۇتىن يىسىنەن ۋلانىپ قالا ما دەپ قورىقتىم. سوسىن بۇكىل ەسىكتەردى دىمقىل ورامالمەن جاۋىپ، بالالاردى بالكونداعى ءورت ءسوندىرۋ باسپالداعى ارقىلى تومەن تۇسىرەمىن دەپ شەشتىم. 15-قاباتقا تۇسكەندە 14-قاباتتىڭ ليۋگىن اشقىم كەلدى. ءبىراق ول سىم تەمىرمەن بايلانعان ەكەن. ونى جۇلىپ الىپ، ارى قاراي تومەنگە ءتۇستىم. 13-قاباتقا جەتكەندە كۇشىم ازايدى. ول جەردە جوتەلىپ تۇرعان بالالى ايەلدى كوردىم. ارى قاراي جول بولماعان سوڭ ءوز پاتەرىمىزگە قايتا كوتەرىلدىك. كىلەمگە سۋ توگىپ وتىردىق. ءتىپتى بالالاردى ىشىنە وتىرعىزايىن دەپ توڭازىتقىشتىڭ ءىشىن بوساتىپ قويدىم. كەيىن قۇتقارۋشىلار كەلدى. اللاعا شۇكىر، امان قالدىق»، - دەيدى جاسۇلان.

ءۇيدىڭ باسقا تۇرعىندارى 14-قاباتتان جوعارىدا تۇراتىن ادامدارعا ءۇيدىڭ جانىندا قۇرىلىس سالىپ جاتقان تۇرىك ازاماتتارى تەرەزەدەن شىعۋعا كومەكتەسكەنىن ايتتى.

ولار ءوز تەحنيكاسىمەن كەلىپ، بىرنەشە بالانى شىعارۋعا كومەكتەسكەن.

سونداي-اق ەمحانادا تەراپەۆت دارىگەر بولىپ ىستەيتىن جاقسىلىق راۋان دا كورشىلەرىنە كومەككە كەلگەن.

ول وتباسىمەن بىرگە تومەن تۇسكەن، سوسىن زارداپ شەككەندەرگە كومەككە اسىققان.

«14-قاباتتا تۇرام. ۇيگە كەلگەن سوڭ ءتۇتىننىڭ ءيىسىن سەزدىم. ساعات 17:10 دا ليفتىمەن پاتەرىمە كوتەرىلدىم، ول كەزدە ءالى ەشتەڭە جوق ەدى. پاتەرىمنىڭ ەسىگىن اشىپ جاتقان كەزدە ليفت توقتاپ قالدى. سوسىن ءتۇتىننىڭ ءيىسىن سەزدىم. ۇيگە كىرىپ، ەكى بالام مەن ايەلىمدى الىپ باسپالداقپەن تومەن تۇستىك. قارا ءتۇتىن بولدى، ەشتەڭە كورىنبەدى. ءبىراق، كوشەگە شىعا الدىق. كەيىن باسقا ادامدارمەن بىرگە 6-7-قاباتتان سەكىرگەلى جاتقان ادامدارعا كومەكتەسە باستادىم. ولاردى بيىكتەن سەكىرمەۋگە شاقىردىق، ءبىراق ولار ءبىزدى تىڭدامادى. ولار ءتىپتى قارا جەرگە سەكىرۋگە دايىن ەدى. سول ءۇشىن ءبىرىنشى قاباتتاعى پاتەرلەردەن كىلەم شىعارىپ، جايىپ، ولاردى توسىپ الۋعا دايىندالدىق. ءبىر ايەل سەكىردى. ول كىسىنىڭ سالماعى اۋىرلاۋ ەدى. جەرگە تۇسكەندە جامباسى سىنىپ كەتكەندەي بولدى. ول كىسىنى جەدەل جاردەم كولىگىنە سالىپ جىبەردىك. ەكىنشى ايەل التىنشى قاباتتان سەكىردى. ول كىسى سەكىرگەن كەزدە اياعى تەرەزەگە ءىلىنىپ بارىپ قۇلادى. ول كىسىنى بىردەن جەدەل جاردەم الىپ كەتتى. قازىر جاعدايى قانداي ەكەنىن بىلمەيمىن. مەن شامامەن 4 ادامعا كومەك كورسەتىپپىن»، - دەدى جاقسىلىق راۋان.

ول سونداي-اق تۇرعىنداردىڭ نەلىكتەن تەرەزەدەن سەكىرۋگە بارعانى جايلى پىكىر ءبىلدىردى.

«مەنىڭشە، ولاردا باسقا تاڭداۋ بولعان جوق. تومەندە تۇرىپ پاتەرلەردى قارا ءتۇتىن باسقانىن كوردىم، دەمالاتىن تازا اۋا بولعان جوق. بۇدان باسقا جول بولسا، ەشكىم 6-7-قاباتتان سەكىرمەس ەدى»، - دەدى ول.

لاۋرا ەسىمدى تۇرعىن جولداسىمەن بىرگە 4 ايلىق ءسابيىن قالاي قۇتقارىپ قالعانىن ايتتى.

ايتۋىنشا، ۇل بالانى ويىنشىق سەبەتكە جاتقىزىپ، ونى اۆتوكولىككە ارنالعان تروسسقا بايلاپ، 5-قاباتتىڭ تەرەزەسىنەن تومەن تۇسىرگەن.

«5 پەن 6-قاباتتىڭ اراسىندا قارا ءتۇتىن بولدى. 5-قاباتتا تۇرعان سوڭ ونى جاقسى سەزدىم. قاتتى شوشىدىم. ول كۇنى جولداسىمنىڭ جۇمىستان ەرتە كەلگەنى جاقسى بولدى. كوشەگە شىققالى جاتقانبىز، ءبىراق ءسال كىدىردىك. ونىمىز دۇرىس بولعان سەكىلدى، سەبەبى ليفتىدە تۇرىپ قالۋىمىز مۇمكىن ەدى. ول كەزدە نە بولارىن ەلەستەتە المايمىن. 4 ايلىق بالامىزدى ويىنشىق سەبەتكە وتىرعىزىپ، ونى اۆتوكولىككە ارنالعان تروسسقا بايلاپ، بالكوننان تومەن قاراي تۇسىردىك. تومەندە ادامدار سەبەتتى توسىپ الدى. سوسىن مەن كورشى ۇيدە تۇراتىن قۇربىما قوڭىراۋ سوعىپ، بالاما قاراي تۇرۋىن سۇرادىم. ءوزىمىز ۇيدەن شىعۋعا تىرىستىق. بالامدى ۋايىمدادىم. اۋىز، مۇرنىمىزدى دىمقىل ورامالمەن جاۋىپ الدىق، كورشىلەر، ودان سوڭ قۇتقارۋشىلار بىزگە كومەككە كەلدى. ءبارىمىز اۆتوباسپالداق ارقىلى تومەن تۇستىك. ەسىمنەن تانىپ قالا جازدادىم، تومەن تۇسكەن كەزدە ارەڭ قوزعالدىم. قۇدايعا شۇكىر، ءبارىمىز امان-ەسەن تۇستىك»، - دەدى لاۋرا.

ايتا كەتەيىك، اتالعان 16 قاباتتى ءۇيدىڭ تۇرعىندارى - جۇمىس ىستەيتىن جاستارعا ساتىپ الۋ قۇقىعىنسىز جالعا بەرىلەتىن باسپانا باعدارلاماسىمەن پاتەر العان جاس وتباسىلار.

باعدارلاما بويىنشا تۇرعىن ءۇي تەك 5 جىلعا بەرىلەدى.

ەسكە سالايىق، ءبىز بۇعان دەيىن الماتىدا 16 قاباتتى ۇيدە ءورت تۇتانعانىن حابارلاعان ەدىك.

قىزىل جالىن ساعات 18:46 كەزىندە وقشاۋلانىپ، ءسوندىرىلدى.

امالى قالماعان تۇرعىندار بالالارىن تەرەزەدەن لاقتىردى. زارداپ شەككەندەردىڭ ىشىندە 2 جۇكتى ايەل بار.

كەيىن الماتى قالالىق دەنساۋلىق ساقتاۋ باسقارماسى ءبىر ادامنىڭ قازا تاپقانىن حابارلادى.

ورتتەن زارداپ شەككەن تۇرعىندار تاماق جانە جاتىن ورىنمەن قامتاماسىز ەتىلدى.

مارقۇم اسەل بەكمۇحامەتوۆانىڭ وتباسىنا قاجەتتى كومەك كورسەتىلەدى. جەرلەۋ ءراسىمى الماتى وبلىسى ەڭبەكشىقازاق اۋدانى قاراجوتا اۋىلىندا وتەدى.

«اقكەنت» تۇرعىن ءۇي كەشەنىن سالۋشى كومپانيا اسەل بەكمۇحامبەتوۆانىڭ وتباسىنا ەكى بولمەلى پاتەر بەرەتىن بولدى.

وسى ورتكە قاتىستى ەكى قىلمىستىق ءىس قوزعالدى.

اۆتور:

دۋمان ارعىنگەلدى

سوڭعى جاڭالىقتار