سىنعان تەرەزەلەر، شاشىلعان ماتراستار: اقكەنتتەگى وقيعا ورنىنىڭ قازىرگى جاعدايى

وقيعادان كەيىن اقكەنت تۇرعىندارى قاتتى شوشىپ قالعان. ولاردىڭ سوزىنشە، مۇندا 96 پاتەر بار، شامامەن 250-300 ادام تۇرادى.
ال بۇگىن ءۇيدىڭ الدىندا پوليتسيا كولىگى تۇر. كەيبىر تۇرعىندار كەشەگى وقيعادان كەيىن زاتتارىن الىپ كوشىپ جاتىر. ولاردىڭ سوزىنشە، ۇيگە زاقىم كەلمەگەنىمەن، ءتۇتىن كىرگەن.
كەيبىر تۇرعىندار اشىق الاڭدا، كوك شوپتە وتىر. قازىر تەكسەرىس جۇرگىزىلىپ، اكىمدىك وكىلدەرى تۇرعىنداردى تۇراتىن جەرى بار-جوعىنا قاراي تىركەپ جاتىر.
كەشە ءورت شىققان اۋماقتا شاشىلعان اياقكيىمدەر، ماتراستار كورىنەدى.
سونداي-اق، پاتەرلەردىڭ تەرەزەلەرى سىنعان. جەردە اينەكتەر دە شاشىلىپ جاتىر.
ال تۇرعىندارعا ارنالىپ، №178-مەكتەپتىڭ سپورت زالى جاساقتالعان. كەشە تۇرعىندار وقيعا بولعان ۇيگە تۇنەمەگەن. كەيبىرەۋلەر تۋىستارىنا، جاقىن ماڭداعى دۇكەندەرگە، كولىكتەرىنە قونىپ شىققان.
ايتا كەتەيىك، بۇل اۋداندا ءالى دە جاڭا تۇرعىن ۇيلەر سالىنىپ جاتىر.
ەسكە سالايىق، كەشە الماتىداعى اقكەنت شاعىناۋدانىنداعى تۇرعىن ۇيدە ءورت شىققانى حابارلاندى. كەيىن ورتتەن زارداپ شەككەندەر سانى انىقتالدى.
اقكەنت تۇرعىن ءۇي كەشەنىنىڭ تۇرعىنى ءديدار ءورت تۋرالى ايتتى. ول - ورتتەن امان قالعان تۇرعىنداردىڭ ءبىرى. ال تىلەۋجان احمەتجان ەسىمدى جىگىت ورتتەن 6-7 ادامدى قۇتقارىپ العان. ەر ادام 1 جاسار بالانى، كورشىنىڭ وتباسىن، ءبىر جىگىتتى جانە پوليتسيا قىزمەتكەرىن امان الىپ قالدى.
ال تۇركيا ازاماتى شۇكۇر گيۋناي اقكەنتتەگى ءورت كەزىندە 16-قاباتتا قالعان بالالاردى قۇتقارعان.