پرەمەر-مينيستر سپورت نىساندارى جايىندا: جوندەلگەن ستاديوندار قايتا قيراپ جاتىر

بۇل تۋرالى ۇكىمەت وتىرىسىندا پرەمەر-مينيستر ءاليحان سمايىلوۆ ايتتى، دەپ حابارلايدى قازاقپارات ءتىلشىسى.
«بۇقارالىق سپورتتى دامىتۋ بويىنشا ءتۇرلى باعدارلامالار مەن جوبالارعا قاراماستان، كوپتەگەن جۇيەلى ماسەلەلەر شەشىمىن تاپقان جوق. ماسەلەن، اقپاراتتىق كەڭىستىكتى مونيتورينگتەۋ ناتيجەسىندە شىلدە ايىنىڭ وزىندە عانا وسى سالاداعى پروبلەمالارعا قاتىستى حالىقتان كوپ شاعىم تۇسەتىنى انىقتالدى. وكىنىشكە قاراي، جەرگىلىكتى بيلىك تۇرعىندار كوتەرگەن ماسەلەلەردى شەشۋگە ءتيىستى دەڭگەيدە ارەكەت جاساماي وتىر. ماسەلەن، پاۆلودار وبلىسى باياناۋىل اۋدانى مايقايىڭ كەنتىندە 2020 -جىلى جوندەلگەن ستاديون قۇلاپ جاتىر. 3 جىل ىشىندە بۇل وبەكت جارامسىز بولىپ قالدى دەسە دە بولادى: فۋتبول الاڭى مەن جۇگىرۋ جولدارىنان باستاپ تريبۋنالار مەن كيىم اۋىستىراتىن بولمەلەرگە دەيىن جارامسىز كۇيگە تۇسكەن»، - دەدى ءا. سمايىلوۆ.
سونىمەن قاتار ۇكىمەت باسشىسى قاراعاندى وبلىسىنداعى شۇباركول كومىر ۆاحتالىق كەنتىندە سپورت زالى قيراپ قالعانىن سىنعا الدى. بۇل جاعداي وسى نىسانعا ەشكىم كوڭىل بولمەگەنىن كورسەتىپ وتىر.
«اقتوبە وبلىسىنىڭ شيقۇدىق اۋىلىنداعى تەرەكتى مەكتەبىندە سپورتزال جوق. ايتپاقشى، سپورتزالدارى جوق مەكتەپتەر تەك شاعىن اۋىلداردا عانا ەمەس، سونىمەن قاتار ءىرى قالالاردا دا كوپ. دەنە شىنىقتىرۋ مۇعالىمدەرى مەن كاسىبي جاتتىقتىرۋشىلار جەتىسپەيدى. سونىمەن قاتار، جۇرتشىلىق استاناداعى ۇلتتىق سپورت ۋنيۆەرسيتەتىنىڭ جانە الماتى وبلىسىنداعى وليمپيادالىق دايارلىق ورتالىعىنىڭ قۇرىلىسى ۇزاققا سوزىلىپ كەتكەنىنە نارازى. سپورتتى دامىتۋ جانە سالاماتتى ءومىر سالتىن ناسيحاتتاۋ باعىتىندا ءبىز اۋقىمدى جۇمىستار جاساپ كەلەمىز. الايدا، كەيبىر ماسەلەلەر بويىنشا ءبىر ورىندا تۇرىپ قالدىق. وكىنىشكە قاراي، بىزدە دەنە شىنىقتىرۋ مەن سپورتتى باسقارۋدىڭ ءتيىمدى ءبىرتۇتاس جۇيەسى جوق. بۇل ماسەلە، اسىرەسە، جەرگىلىكتى جەرلەردە وتە وزەكتى»، - دەدى پرەمەر-مينيستر.