تاشكەنتتە ەكى قازاقستاندىق بوكسشى جەڭىسكە جەتىپ، بىرەۋى جەڭىلىپ قالدى

قازاقستاندىق بوكسشى رامازان ورىنباسار ۇلى (0-1) كاسىبي مانسابىنداعى ەكىنشى جەكپە-جەگىن وتكىزىپ، 22 جاستاعى وزبەكستان بوكسشىسى جاسۋر زوحيدوۆپەن (3-0، 3 ك و) جۇدىرىقتاستى.
ايقاس جەتى راۋندقا جوسپارلانعانىمەن، العاشقى ءۇش مينۋتتا قازاقستاندىق بوكسشى تاحنيكالىق نوكاۋت الدى. ورىنباسار ۇلى اۋىر سوققىنى وتكىزىپ الىپ، كانۆاسقا قۇلاپ كەتتى. رەفەري نوكداۋن ەسەپتەدى، سودان كەيىن قازاقستاندىق بوكسشىنىڭ بۇرىشى اق ورامال تاستاپ، جەكپە-جەكتى جالعاستىرۋدان باس تارتتى.
تاعى ءبىر قازاقستاندىق بوكسشى دامير قۇلجابايەۆ كاسىبي مانسابىنداعى ەكىنشى جەكپە-جەگىن 20 جاستاعى وزبەكستاندىق سپورتشى افزالبەك باحتيەروۆقا (0-5) قارسى وتكىزدى.
اسا جەڭىل سالماقتاعى جەكپە-جەك ءتورت راۋندقا جوسپارلانعان بولاتىن. ءبىراق ەكىنشى راۋندتىڭ سوڭىندا قۇلجابايەۆ ءدال سوققى جاساپ، قارسىلاسىن كانۆاسقا جىبەردى. رەفەري ساناۋدى باستاپ ەدى، قارسىلاسى ەسىن جيىپ، ايقاس جالعاستى. ءبىراق ءۇشىنشى راۋند باستالماس بۇرىن باحتيەروۆتىڭ بۇرىشى ايقاستى جالعاستىرۋدان باس تارتاتىندارىن مالىمدەدى.
وسىلايشا، دارىن قۇلجابايەۆ كاسىپقوي بوكستاعى ەكىنشى جەڭىسىنە جەتسە، افزالبەك باحتيەروۆ التىنشى رەت جەڭىلىپ قالدى.
تاشكەنت تورىندە جۇدىرىقتاسقان تاعى ءبىر قازاقستاندىق سامات جەتىبايەۆ (5-0، 3 ك و) كاسىبي مانسابىنداعى التىنشى ايقاسىن وتكىزدى.
ونىڭ قارسىلاسى - 35 جاستاعى وزبەك بوكسشى شاحريەر يساكوۆ (4-2، 4 ك و). جەڭىل سالماقتاعى جەكپە-جەك سەگىز راۋندقا جوسپارلانعانىمەن، بەسىنشى راۋندتا قازاقستاندىق بوكسشى قارسىلاسىن تەحنيكالىق نوكاۋتقا جىبەرىپ، جەڭىسكە جەتتى.
سامات جەتىبايەۆ قاتارىنان التىنشى ايقاسىندا جەڭىسكە جەتىپ، جەڭىلمەي كەلە جاتقان بولسا، شاحريەر يساكوۆ ءۇشىنشى رەت قارسىلاسىنا ەسە جىبەردى.