الانياداعى جول اپاتى: ەكى قازاقستاندىق تۋريسكە وتا جاسالدى

استانا. قازاقپارات - تۇركيانىڭ الانيا اۋماعىندا بولعان جول اپاتىنان ەكى قازاقستاندىق جاراقات الدى، ولارعا وتا جاسالدى، دەپ حابارلايدى قازاقپارات ق ر سىرتقى ىستەر مينيسترلىگىنە سىلتەمە جاساپ.
None
Фото: haberglobal.com.tr

وقيعانىڭ بارلىق ءمان-جايىن انىقتاۋ ءۇشىن ق ر كونسۋلى الانياعا بارعان ەدى.

«30-شىلدە كۇنى تاڭەرتەڭ الانيادا قازاقستاننىڭ 12 ازاماتى مىنگەن شاعىن اۆتوبۋس جول-كولىك وقيعاسىنا ۇشىرادى. تۇرىك پوليتسياسىنان الىنعان الدىن-الا مالىمەت بويىنشا، اۆتوبۋس جۇرگىزۋشىسى جوعارى جىلدامدىقپەن الدىنداعى جۇك كولىگىن سوققان. سوقتىعىسۋ سالدارىنان زارداپ شەككەندەر بار، ولار شۇعىل تۇردە جاقىن ماڭداعى اۋرۋحانالارعا جەتكىزىلدى»، - دەلىنگەن مينيسترلىك حابارلاماسىندا.

ازاماتتارىمىزدىڭ جاي-كۇيىن انىقتاۋ ءۇشىن قازاقستاندىق كونسۋل دەرەۋ الانياعا بارىپ، مەديتسينالىق مەكەمەلەرگە بارىپ، زارداپ شەككەن وتانداستارمەن كەزدەستى.

«ميكرواۆتوبۋستا بولعان 12 قازاقستاندىقتىڭ ەكەۋى اۋىرلىعى ورتاشا جاراقات العان. ولارعا وتا جاسالىپ، بارلىق قاجەتتى مەديتسينالىق كومەك كورسەتىلەدى. قالعان 10 وتانداستىڭ، ونىڭ ىشىندە 4 بالانىڭ جاعدايى قاناعاتتانارلىق، ومىرىنە ەش قاۋىپ جوق. بارلىعىنىڭ مەديتسينالىق ساقتاندىرۋى بار. انتالياداعى قازاقستاندىق ديپلوماتتار ءبىزدىڭ ازاماتتارمەن تۇراقتى بايلانىستا جانە ءتيىستى جۇمىس جۇرگىزۋدە»، - دەيدى سىرتقى ىستەر مينيسترلىگى.

ەسكە سالايىق، تۇركيالىق ب ا ق-تىڭ حابارلاۋىنشا، قازاقستاندىق تۋريستەردى تاسىمالداعان ميكرواۆتوبۋس الانياداعى Okurcalar Mahallesi D-400 تراسساسىندا جۇك كولىگىنە سوقتىعىسقان. سالدارىنان كولىك جۇرگىزۋشى مەن گيد (ۋكراينا ازماتى) وقيعا ورنىندا كوز جۇمدى.

اپات ورنىنا پوليتسيا مەن مەديتسينا بريگادالارى دەرەۋ جىبەرىلگەن. كولىكتە بولعان 12 تۋريستىڭ التاۋى اۋىر جاراقاتپەن جەرگىلىكتى اۋرۋحانالارعا جەتكىزىلدى.

اۆتور:

ايجان سەرىكجان قىزى


سوڭعى جاڭالىقتار