ەلىمىزدە ۆەيپ پەن ەلەكتروندى تەمەكىگە تولىق تىيىم سالىنۋى مۇمكىن

استانا. قازاقپارات - ءماجىلىس دەپۋتاتتارى ۇلت ساۋلىعىنا قاۋىپ توندىرەتىن ۆەيپ پەن ەلەكتروندى تەمەكى ماسەلەسىن بىرنەشە جىلدان بەرى ۇدايى كوتەرىپ كەلەدى، دەپ حابارلايدى قازاقپارات.
None

دەپۋتاتتار ەدىل جاڭبىرشين، جۇلدىز سۇلەيمەنوۆا، عالىمجان ەلەۋوۆ، داۋلەت تۇرلىحانوۆ جانە گۇلدارا نۇرىموۆا وسى ماسەلەگە قاتىستى ۇكىمەت باسشىسىنا بىرنەشە دەپۋتاتتىق ساۋال جولداپ، «AMANAT» پارتياسى جانىنداعى ءبىلىم بەرۋ جانە دەنساۋلىق ساقتاۋ ماسەلەلەرى جونىندەگى رەسپۋبليكالىق كەڭەستە كەڭىنەن تالقىلاعان بولاتىن،

دەپۋتاتتاردىڭ ايتۋىنشا، ۆەيپ پەن ەلەكتروندى تەمەكىنىڭ ۇلت ساۋلىعىنا كەلتىرەتىن زالالى كادىمگى تەمەكىدەن اسىپ تۇسپەسە، كەم ەمەس. سوندىقتان وعان بولاشاق ۇرپاقتىڭ دەنساۋلىعى ءۇشىن زاڭنامالىق شارالارمەن قارسى تۇراتىن ۋاقىت جەتتى.

كەڭەس ءتوراعاسى جۇلدىز سۇلەيمەنوۆا اتاپ وتكەندەي، پارتيالىقتار بۇعان دەيىن دە جاڭا جامان ادەتكە قارسى كۇرەسۋ ءۇشىن ۇكىمەتكە ءبىرقاتار جۇيەلى ءىس- شارا ۇسىنعان بولاتىن.

«تۇركىستاندا وتكەن ۇلتتىق قۇرىلتايدا پرەزيدەنت قاسىم- جومارت توقايەۆ ۆەيپ جانە ءتۇرلى ەلەكتروندى تەمەكىلەردى ۇلت ساۋلىعىنا قاۋىپ توندىرەتىن كەسەل دەپ اتاپ ءوتتى. ول ەلەكتروندى تەمەكىنىڭ بارىنە قولجەتىمدى جانە ونىڭ زيانسىزدىعى تۋرالى ءتۇرلى جارنامانىڭ كوبەيىپ كەتكەنىنە الاڭداۋشىلىق ءبىلدىردى. مەملەكەت باسشىسى وسى قاۋىپتى ۇردىسپەن كۇرەسۋ ءۇشىن جۇيەلى جانە شۇعىل شارالار قابىلداۋ قاجەت ەكەنىن ايتتى. وسىعان بايلانىستى ءبىز دەنساۋلىق ساقتاۋ، وقۋ- اعارتۋ مينيسترلىكتەرىنىڭ، پروكۋراتۋرانىڭ، «اتامەكەن» ۇ ك پ جانە باسقا دا مەكەمەلەردىڭ وكىلدەرىمەن جان جاقتى تالقىلادىق»، - دەدى ج. سۇلەيمەنوۆا.

AMANAT پارتياسى جانىنداعى ءبىلىم بەرۋ جانە دەنساۋلىق ساقتاۋ ماسەلەلەرى جونىندەگى رەسپۋبليكالىق قوعامدىق كەڭەس وتىرىسىندا قازاقستان پارلامەنتى ءماجىلىسىنىڭ ەكولوگيا جانە تابيعي رەسۋرستار كوميتەتىنىڭ ءتوراعاسى، ءماجىلىس دەپۋتاتى ەدىل جاڭبىرشين ۆەيپ جانە ەلەكتروندى شىلىمداردىڭ سۇيىقتىعىنا، ولاردى تاۋار رەتىندە ەنگىزۋگە جانە ونىڭ اينالىمىنا تولىق تىيىم سالۋ تۋرالى ۇسىنىستى ۇكىمەتكە جولدادى.

وسى ماسەلەگە قاتىستى پىكىر بىلدىرگەن وقۋ- اعارتۋ ۆيتسە- ءمينيسترى ەدىل وسپان ۆەيپ شەگۋدى جاستار اراسىندا بەلەڭ العان وزەكتى ماسەلەلەردىڭ قاتارىنا قوسۋعا بولاتىنىن ايتتى.

«وكىنىشكە قاراي، بۇگىندە جاستار ءتۇرلى جامان ادەتكە بوي الدىرۋعا بەيىم. ناشاقورلىق، ويىن قۇمارلىق، بۋللينگ جانە كيبەربۋللينگپەن قاتار ۆەيپينگ تە ۇلكەن پروبلەماعا اينالدى. قازاقستان تۇتىنۋشىلار ليگاسىنىڭ اقپاراتى بويىنشا، استانا مەن الماتىدا سوڭعى 6 ايدا ۆەيپ ساتىلىمى %372 عا ءوستى. ەلىمىزدە ۆەيپ ساتاتىن 6 مىڭنان استام ساۋدا نۇكتەسى بار. ولارعا تولىقتاي تىيىم سالۋدى ءماجىلىس دەپۋتاتتارى مەن ەلىمىزدىڭ دەنساۋلىق ساقتاۋ مينيسترلىگىنىڭ وكىلدەرى قولدادى. بۇل جەردە ءبىز بالالارىمىزدىڭ بولاشاعىن باستى ورىنعا قويىپ وتىرمىز»، - دەدى ول.

دەنساۋلىق ساقتاۋ مينيسترلىگىنىڭ مالىمەتىنشە، قازاقستاندا 2018 -جىلى جۇرگىزىلگەن زەرتتەۋدىڭ ناتيجەسىنە سايكەس، 15 جاستاعى ۇلداردىڭ %14 ى جانە قىزداردىڭ %6 ى ۆەيپ شەگىپ كورگەن. بۇل زەرتتەۋدى 2022 -جىلى قايتالاعان كەزدە ۆەيپتى تۇتىنۋ كورسەتكىشى %3,6 عا كۇرت وسكەنى انىقتالدى.

ايتا كەتۋ كەرەك، وقۋشىلار اراسىنداعى «انالار كەڭەسىنىڭ» وكىلى، قوعامدىق كەڭەس مۇشەسى بايان احاتاي ۆەيپكە قارسى قوزعالىستى بەلسەندى تۇردە كوتەرىپ كەلەدى.

بىرنەشە جىلدان بەرى جۇمىلا اتقارعان جۇمىستىڭ ناتيجەسىندە ۇكىمەتتىڭ ۆەدومستۆوارالىق كوميسسياسى قازاقستان پارلامەنتى ءماجىلىسى دەپۋتاتتارىنىڭ ۆەيپ جانە ەلەكتروندى شىلىمداردىڭ سۇيىقتىعىنا، ولاردى تاۋار رەتىندە ەنگىزۋگە جانە ونىڭ اينالىمىنا تولىق تىيىم سالۋ تۋرالى نورماسىن قولدادى.

سوڭعى جاڭالىقتار