ەلىمىزدە ءداستۇرلى مەديتسينانىڭ قاي تۇرلەرى ليتسەنزيالانعان

استانا. قازاقپارات - مەديتسينا ءبىر ورىندا تۇرماي، دامىپ جاتقانى بەلگىلى. كۇردەلى اۋرۋلاردى ەمدەۋدىڭ زاماناۋي تەحنولوگيالارى ەنگىزىلىپ كەلەدى.
None

دەگەنمەن، ەمدەۋدىڭ حالىقتىق ادىستەرى، ياعني ءداستۇرلى مەديتسيناعا سەنەتىندەر دە جەتەرلىك. وسى ورايدا، قازاقپارات ءتىلشىسى دەنساۋلىق ساقتاۋ مينيسترلىگىنە ساۋال جولداپ، ءداستۇرلى مەديتسينانى ليتسەنزيالاۋ ماسەلەسىن كوتەرگەن ەدى. سونىڭ ىشىندە حيدجاما تۋرالى دا جاۋاپ الدى.

«قازاقستاننىڭ دەنساۋلىق ساقتاۋ جۇيەسىندە كلينيكالىق حاتتامالارعا، مەديتسينالىق كومەك كورسەتۋدى ۇيىمداستىرۋ ستاندارتتارىنا نەگىزدەلگەن مەديتسينا رەسمي دەپ تانىلادى. ءداستۇرلى مەديتسينا - عاسىرلار بويعى داستۇرلەرگە نەگىزدەلىپ، مەديتسينالىق قولدانۋعا رۇقسات ەتىلگەن پروفيلاكتيكا، دياگنوستيكا، ەمدەۋ جانە وڭالتۋ ادىستەرىنىڭ جيىنتىعى. قازاقستان رەسپۋبليكاسىنىڭ زاڭناماسىندا ءداستۇرلى مەديتسينانىڭ ناقتى تۇرلەرى بويىنشا مەديتسينالىق قىزمەت كورسەتۋدە ليتسەنزيانىڭ بولۋى مىندەتتەلەدى. وعان گومەوپاتيا، گيرۋدوتەراپيا، مانۋالدى تەراپيا، رەفلەكسوتەراپيا، ءشوپ مەديتسيناسى جانە تابيعي ءدارى-دارمەكتەرمەن ەمدەۋ جاتادى. وسىلايشا، ءداستۇرلى تەراپيانى قوسا العاندا، مەديتسينالىق قىزمەتتى ناقتى ماماندىق بويىنشا سەرتيفيكاتى بار مەديتسينا قىزمەتكەرلەرى عانا جۇزەگە اسىرۋعا قۇقىلى»، - دەلىنگەن مينيسترلىك جاۋابىندا.

سونداي-اق، مينيسترلىك ازاماتتاردىڭ حالىق ەمشىلەرى قىزمەتىنە جۇگىنەتىنىن راستاپ وتىر.

«الايدا، حالىق ەمشىلىگى مەديتسينالىق قىزمەت ەمەس جانە ونىڭ كەسىرىنەن دەنساۋلىققا زيان كەلگەن جاعدايدا قىلمىستىق جاۋاپكەرشىلىك قاراستىرىلعان. مىسالى، حالىق ەمدەرىنىڭ ءبىر ءتۇرى - حيدجاما (قان شىعارۋ). ول مەديتسينالىق تەحنولوگيا ەمەس جانە جۇقپالى اۋرۋلاردىڭ، ونىڭ ىشىندە ايتۆ، ۆيرۋستىق گەپاتيتتەر مەن باسقا دا دەرتتەردىڭ تارالۋ قاۋپى بار، ياعني زاڭسىز قىزمەت»، - دەپ ءتۇسىندىردى ۆەدومستۆودان.

«حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكستە «ءداستۇرلى مەديتسينا. ەمدەۋ» دەيتىن ارنايى باپ بار. بۇل دەگەنىمىز - ءداستۇرلى مەديتسينانىڭ عاسىرلار بويعى تاجىريبەسىنە نەگىزدەلگەن الدىن الۋ، دياگنوستيكا، ەمدەۋ جانە وڭالتۋ ادىستەرى.

«بۇگىندە ەمشىلەر ءداستۇرلى مەديتسينامەن دايىندىعى جانە قوسىمشا ءبىلىمى بولماسا دا اينالىسا الادى. بۇل كوبىنە اۋرۋدىڭ اسقىنۋىنا الىپ كەلەدى. اقىرىندا پاتسيەنتتەردىڭ دەنساۋلىعىنا تەرىس اسەر ەتەدى»، - دەيدى دەنساۋلىق ساقتاۋ مينيسترلىگىنەن.

سوڭعى جاڭالىقتار