09:23, 28 - شىلدە 2023 | GMT +5
شىمكەنتتىك دارىگەرلەر سىركە قىشقىلىن ءىشىپ قويعان ءسابيدى امان الىپ قالدى
شىمكەنت. قازاقپارات - شىمكەنتتىك دارىگەرلەر سىركە قىشقىلىن ءىشىپ قويعان ءسابيدى امان الىپ قالدى، دەپ حابارلايدى قازاقپارات ءتىلشىسى.
وقيعا 11-شىلدە كۇنى بولعان. جەدەل جاردەم قىزمەتىمەن ۋلى سۇيىقتىق ءىشىپ قويعان 2 جاسار بالا اۋىر حالدە ت. ورىنبايەۆ اتىنداعى گيپەرباريالىق وكسيگەناتسيا ورتالىعىنا جەتكىزىلگەن.
اتا- اناسىنىڭ ايتۋىنشا، ۇلكەندەردىڭ قاراۋىنسىز قالعان ءسابي ءۇي اۋلاسىندا ويناپ ءجۇرىپ، ابايسىزدا سىركە قىشقىلىن ءىشىپ قويعان.
«اۋىر حالدە اۋرۋحاناعا جەتكىزىلگەن بالانىڭ اۋىز قۋىسى تولىقتاي كۇيىپ قالعاندىقتان، جاساندى تىنىس الۋ اپپاراتىنا قوسىلدى. دارىگەرلەر بۇلدىرشىنگە شۇعىل كومەك كورسەتىپ، ءسابيدىڭ ءومىرىن ساقتاپ قالدى. قازىرگى ۋاقىتتا ونىڭ جاعدايى قاناعاتتانارلىق. بالا قازىرگى ۋاقىتتا وزدىگىنەن تاماقتانا الادى» - دەلىنگەن شىمكەنت قالاسى دەنساۋلىق ساقتاۋ باسقارماسىنىڭ باسپا ءسوز قىزمەتى تاراتقان اقپاراتتا.
