بيلىگى مەن قارجىسى جوق اۋىل اكىمدەرى پروبلەمانى شەشۋگە قاۋقارسىز - اۋىلدىق وكرۋگ اكىمى

اتىراۋ. قازاقپارات - اۋىلدىڭ قازىرگى احۋالى، شەشىمىن تاپپاي كەلە جاتقان وتكىر ماسەلەلەر، اۋىل اكىمىنىڭ ءرولى مەن مارتەبەسى جانە ولاردىڭ قىزمەتتەرىندەگى كەدەرگىلەر.
None

وسى جانە باسقا دا وزەكتى ماسەلەلەر «AMANAT» پارتياسىنان سايلانعان اۋىلدىق وكرۋگ اكىمدەرىنىڭ پارتيا حاتشىسى ەلدار جۇماعازييەۆپەن كەزدەسۋى بارىسىندا تالقىلاندى، دەپ حابارلايدى قازاقپارات پارتيانىڭ باسپا ءسوز قىزمەتىنە سىلتەمە جاساپ.

اتىراۋ قالاسىندا وتكەن جيىنعا بەينە بايلانىس ارقىلى ۇلتتىق ەكونوميكا مينيسترلىگىنىڭ ءوڭىر دامۋىنا جاۋاپتى وكىلدەرى دە قاتىستى.

اۋىلدا جىلدار بويى شەشىمىن تاپپاي، بىتەۋ جارا سياقتى سىزداپ جاتقان ماسەلەنىڭ، بىتپەي تۇرعان كوپ شارۋانىڭ ءبىر ۇشى اكىمگە كەلىپ تىرەلەتىنى انىق. مۇندا بيۋدجەت ماردىمسىز، مامان تاپشى، قول قىسقا، تەحنيكا جەتپەيدى دەگەن سىڭايداعى كوپ كەدەرگى بار.

ماسەلەن، قۇرمانعازى اۋدانى، تەڭىز اۋىلدىق وكرۋگىنىڭ اكىمى قايسار ماحسۋتوۆ كوممۋنالدىق شارۋاشىلىق مەكەمەسىن قۇرىپ، شتات بىرلىگىن قوسا وتىرىپ، اۋىلدىق وكرۋگ اكىمىنە بەرۋ قاجەت دەپ ەسەپتەيدى. ونىڭ ايتۋىنشا، بۇل سالاداعى مەملەكەتتىك ساتىپ الۋ جۇيەسى ءتيىمسىز بولىپ تۇر.

«اۋىلعا ۋنيۆەرسال تراكتور، ءورت سوندىرەتىن جانە ۆاكۋم-اسسەنيزاتور جانە اۋىر جۇك كولىكتەرى اۋاداي قاجەت. قازىر اۋىل وكرۋگتەرىندە ءبىر عانا تراكتوردان بار، ءبىراق ولار ديزەل وتىنىمەن قامتاماسىز ەتىلمەگەن. تاعى ءبىر ماسەلە وكرۋگتە ارنايى ماماندار جوق. جەرگە شەشىم شىعارۋ، مەملەكەتتىك ساتىپ الۋ سياقتى وزگە دە جاعدايلاردا - زاڭگەر، سالىق كوزدەرىن قالىپتاستىرۋ ءۇشىن - سالىق مامانى، كوشە جارىعىن، ەلەكتر جەلىلەرى مەن ترانسفورماتورلاردى قاراۋ ءۇشىن ەلەكتريك شتات بىرلىكتەرى قاجەت»، - دەدى ول.

سونداي-اق، اكىمدەر اۋىل اۋماعىندا ورنالاسقان كەن ورىندارى مەن ۋاقىتشا جۇمىس جاساۋشى كومپانيالارعا (مىسالى، جول سالۋشى) تابىس سالىعىن جانە قورشاعان ورتانى لاستاعانى ءۇشىن سالىناتىن ايىپپۇلداردى اۋىلدىق وكرۋگتىڭ ەسەپ شوتىنا اۋدارتۋدى سۇرادى. بۇل اۋىلدى اباتتاندىرۋ، كوگالداندىرۋ، الەۋمەتتىك ءالسىز توپتاردى قولداۋ سياقتى كوپتەگەن ماسەلەنى جەرگىلىكتى دەڭگەيدە شەشۋگە مۇمكىندىك بەرەر ەدى.

سونىمەن قاتار، اكىمدەر بۇرىنعى، ءبىر كوزدەن ساتىپ الۋ مۇمكىندىگىن قايتىپ بەرۋدى سۇرايدى. اۋىلدىق وكرۋگ كولەمىندە 3 مىڭ ايلىق ەسەپتىك كورسەتكىشتەن اسپاي جاسالاتىن جۇمىس پەن قىزمەتتەر «مەملەكەتتىك ساتىپ الۋ تۋرالى» زاڭنىڭ 39-بابى 42-تارماعىندا كورسەتىلگەن. ءبىراق، ءبىر كوزدەن الۋ ءتاسىلى وسى زاڭنىڭ 41-بابى 1-تارماعىمەن شەكتەلگەن. بۇل ءوز كەزەگىندە جەرگىلىكتى جەردەگى كاسىپكەرلىكتى دامىتۋعا جانە اتقارىلاتىن جۇمىس پەن قىزمەتتەردىڭ ۋاقىتىلى، ساپالى ورىندالۋىنا كەدەرگى بولىپ وتىر.

جيىندا كوتەرىلگەن تاعى ءبىر ماسەلە اكىمدەردىڭ مارتەبەسىنە قاتىستى بولدى. قىزىلقوعا اۋدانى تاسشاعىل اۋىلدىق وكرۋگىنىڭ اكىمى گۇلشارا ءنادىر قىزى بۇل ماسەلەنى زاڭمەن رەتتەۋ قاجەت دەپ ەسەپتەيدى.

«قولىندا بيلىگى مەن قارجىسى جوق اۋىل اكىمدەرىنىڭ ءسات سايىن كەزدەسەتىن تۇرعىندار پروبلەماسىن تۇبەگەيلى شەشۋگە ەش قاۋقارسىز ەكەنى اۋىر دا بولسا شىندىق. سوندىقتان، بۇل ماسەلە ارنايى زاڭدا ناقتىلاپ كورسەتىلۋى كەرەك دەپ سانايمىز. بۇل - تەك مەنىڭ عانا ەمەس، اۋىلدىق وكرۋگ اكىمدەرىنىڭ ورتاق ۇسىنىسى»، - دەدى گۇلشارا ءنادىر قىزى جيىنعا قاتىسقان ارىپتەستەرىنىڭ ويىن تۇيىندەپ.

پارتيا حاتشىسى ەلدار جۇماعازييەۆ ماسەلەنىڭ بىرتىندەپ شەشىلەتىنىن ايتتى.

«جۇمىس بارىسىندا كەدەرگى كوپ ەكەنىن بۇگىنگى كەزدەسۋ كورسەتتى. پارتيا جانىنان ارنايى توپ قۇرىپ، ايتىلعان بارلىق ماسەلەنى بىرتىندەپ شەشۋگە كىرىسەمىز. قالاي بولعاندا دا، سىزدەردىڭ حالىق يگىلىگى ءۇشىن ءتيىمدى جۇمىس ىستەۋلەرىڭىزگە بارلىق مۇمكىندىكتى جاساۋمىز كەرەك»، - دەدى ول.

سوڭعى جاڭالىقتار