ءبۇلدىرشىندى تەۋىپ جىبەرگەن شەتەلدىك ەلدەن قۋىلادى - دينارا زاكيەۆا

الماتى وبلىسىنىڭ قاراساي اۋدانىنداعى ساۋدا ورتالىعىندا 4 جاسار قىز بالانى ەر ادام تەۋىپ ۇشىرعان. جەدەل-ىزدەستىرۋ ءىس-شاراسى بارىسىندا ءتارتىپ ساقشىلارى 1998-جىلعى تۇركيا رەسپۋبليكاسىنىڭ ازاماتىن انىقتاپ، پوليتسياعا جەتكىزدى. كۇدىكتى جاۋاپ الۋ بارىسىندا وقيعانى بايانداپ، ءوز كىناسىن تولىق مويىندادى.
«كەشە ماعان ساۋدا ورتالىعىندا قىز بالانىڭ تەپكىدەن قۇلاعانى تۋرالى اقپارات كەلىپ ءتۇستى. بۇل جايت «بۇزاقىلىق» بابى بويىنشا تىركەلدى. ارەكەتتى جاساعان ادام ۇستالىپ، ۋاقىتشا ۇستاۋ يزولياتورىنا قاماۋعا الىندى. الماتى وبلىسىنىڭ پوليتسيا دەپارتامەنتىمەن بايلانىستامىن. بۇل فاكت بويىنشا سوت شەشىمى كۇشىنە ەنگەننەن كەيىن، جازاسىن مۇندا وتەگەننەن كەيىن ونى ق ر شەكاراسىنان شىعارۋعا باعىتتالعان سوت پروتسەسى باستالادى»، - دەپ جازدى دينارا زاكيەۆا الەۋمەتتىك جەلىدەگى پاراقشاسىندا.
سونىمەن قاتار، ۋاكىل زاڭنامادا بالالارعا قاتىستى قىلمىستىڭ وسىنداي قۇرامىنا بايلانىستى باپ جوق ەكەنىن اتاپ ءوتتى. سوندىقتان، ايىپتالۋشى «كامەلەتكە تولماعانعا قاتىستى جاسالعان ءىس- ارەكەت» دەگەن اۋىرلاتۋشى بىلىكتىلىك بەلگىسى دە جوق «بۇزاقىلىق» بابى بويىنشا جاۋاپقا تارتىلادى.
«وسىعان بايلانىستى ءبىز قازىر ىشكى ىستەر مينيسترلىگىمەن بىرلەسىپ، زاڭناماعا بالالارعا جاسالعان زورلىق-زومبىلىققا قاتىستى ءتيىستى باپتاردى ەنگىزۋ جۇمىسىن باستادىق. جالپى، تۇزەتۋلەر بالالاردىڭ قاۋىپسىزدىگىن قامتاماسىز ەتۋگە قاتىستى ءارتۇرلى سالامەن بايلانىستى. زاڭناماعا ۇسىنىستار پاكەتىن ق ر پارلامەنتىنە وسى كۇزدە بەرۋدى جوسپارلاپ وتىرمىز»، - دەدى بالا قۇقىقتارى جونىندەگى ۋاكىل.