قازاقستان ازاماتتارى قاي ەلدەرگە ۆيزاسىز بارا الادى
«قازىرگى كەزدە قازاقستان رەسپۋبليكاسىنىڭ ازاماتتارى ۇلتتىق تولقۇجاتپەن الەمنىڭ 29 ەلىنە ۆيزاسىز بارا الادى. سونىمەن قاتار، ءبىرقاتار ەلدەرمەن ديپلوماتيالىق جانە قىزمەتتىك پاسپورتتاردىڭ يەلەرىن ۆيزادان ءوزارا بوساتۋ تۋرالى كەلىسىمگە قول جەتكىزىلدى»، - دەلىنگەن قازاقستان سىرتقى ىستەر مينيسترلىگىنىڭ «قازاقپارات» اگەنتتىگىنە بەرگەن جاۋابىندا.
قازاقستاندىقتار وزبەكستانعا بارعاندا سول مەملەكەتتىڭ اۋماعىندا 5 كۇننەن استام بولعان جاعدايدا، ال ازەربايجان، بەلارۋس، قىرعىزستان، تاجىكستاندا 30 كۇننەن استام بولعان جاعدايدا قۇزىرەتتى ورگانداردا تىركەلۋگە مىندەتتى.
بۇدان بولەك، گونكونگ، يران، ومانعا 14 كۇنگە دەيىن، باربادوسقا 28 كۇنگە دەيىن، ارگەنتينا، برازيليا، مالايزيا، مالديۆ رەسپۋبليكاسى، بىرىككەن اراب امىرلىكتەرى، سەربيا، فيليپپين، ەكۆادورعا 30 كۇنگە دەيىن، البانيا، كولۋمبيا، كوستا-ريكا، مولدوۆا، موڭعوليا، رەسەي، ۋكرايناعا 90 كۇنگە دەيىن، ارمەنيا، سەنت-ۆينسەنت جانە گرەنادينگە 180 كۇنگە دەيىن، سونداي-اق گرۋزياعا 1 جىل ارالىعىنا دەيىن ۆيزاسىز ساپارلاۋعا بولادى.
قازاقستان ازاماتتارى تۇركيادا 90 كۇنگە دەيىن ۆيزاسىز جۇرە الادى. كورەياعا دا 30 كۇنگە دەيىن ۆيزاسىز ساپارلاۋعا مۇمكىندىك بار. ءبىراق، 2022 -جىلدىڭ 1-ساۋىرىنەن بەرى ازاماتتىڭ كورەياعا كىرۋىن اۆتوريزاتسيالايتىن «K-ETA» ەلەكتروندىق جۇيەسى جۇمىس ىستەپ تۇر.
اتاپ ايتقاندا، اۋەجايعا جەتكەننەن كەيىن ۆيزا بەرەتىن ەلدەردىڭ قاتارىندا مىسىر مەن تايلاند بار. تايلاند قازاقستان ازاماتتارىنا ۆيزانى ۇشىپ بارعاننان كەيىن 30 كۇنگە بەرەدى.
