جازدىڭ ىستىعى اسىرەسە جۇكتى ايەلدەرگە اۋىر ءتيىپ جاتىر - دارىگەر

انكارا. انادولى - قازاقپارات - گينەكولوگيا جانە اكۋشەريا مامانى، پروفەسسور فارۋك بۋيرۋ جۇكتى ايەلدەردىڭ جازدىڭ ىستىعىندا ەرەكشە قينالاتىنىن ايتادى.

ويتكەنى اعزاسىنا ەكى ەسە كوپ جۇك تۇسەدى، دەپ حابارلايدى قازاقپارات انادولى اگەنتتىگىنە سىلتەمە جاساپ.

دارىگەر ءوز مالىمدەمەسىندە جۇكتىلىك كەزىندە پروگەستەرون گورمونى جوعارى بولاتىندىقتان دەنە تەمپەراتۋراسى 0,3-0,5 گرادۋسقا ارتىپ، سىرتقى ىستىق قاتتىراق سەزىلەتىنىن جەتكىزدى.

«اياعى اۋىر ايەلدەر قوسىمشا جۇك كوتەرىپ ءجۇر. بۇل ىشىندەگى نارەستەگە دە، جيناعان ارتىق سالماعىنا دا بايلانىستى. سونىمەن قاتار قان كولەمى مەن جۇرەك سوعىسى جيىلىگىنىڭ ارتۋى سەكىلدى جۇكتى ايەلدەردىڭ بويىنداعى كەيبىر قالىپتى وزگەرىستەر جاعىمسىز سالدارعا اكەلۋى مۇمكىن. قىزۋى كوتەرىلىپ- تومەندەيدى. بۇعان ىستىق اۋا رايى قوسىلعاندا ايەل كادىمگىدەي قينالادى»، - دەيدى ول.

فارۋك بۋيرۋ جۇكتى ايەلدەرگە اپتاپتى جايلى وتكىزۋ ءۇشىن كوپ سۋ ىشۋگە كەڭەس بەردى.

«ءتاتتى جانە گازدالعان سۋسىنداردى ىشۋگە بولمايدى. بۇل اسقازاندى بۇزادى ءارى ارتىق كالوريا. شاي مەن كوفەنى كوپ ءىشۋ دە اعزاداعى سۋدى تەز جوعالتۋعا سەبەپ بولادى. جۇكتى ايەلدەردىڭ ءبىرىنشى تاڭداۋلى سۋسىنى سۋ بولۋى كەرەك. جاز ايلارىندا جۇكتى ايەلدەر اعزاداعى سۋدى كوپ جوعالتادى. ونى مولىنان سۋ ءىشۋ ارقىلى الماستىرۋ وتە ماڭىزدى. سونداي-اق ولارعا مينەرالدى سۋ، ءسۇت، ايران، ءتاتتى ەمەس ليموناد، جەمىس شىرىنىن ىشۋگە بولادى»، - دەيدى دارىگەر.

جۇكتىلىك كەزىندە ارتىق سالماق جيناماۋدىڭ ماڭىزىنا نازار اۋدارعان بۋيرۋ كومىرسۋدان باس تارتىپ، جاڭا پىسكەن جەمىس-جيدەك، كوكونىس، كوك-سوكتى كوبىرەك جەۋدى ۇسىندى.

ونىڭ ايتۋىنشا، جۇكتى ايەلدەر جازدىڭگۇنى ساعات 11.00-16.00 اراسىندا كوشەگە شىقپاعانى ابزال. شىعا قالعان كۇندە كولەڭكەدە ءجۇرىپ، باس كيىم كيىپ، كوزىلدىرىك تاققانى دۇرىس.

اياعى اۋىر ايەل اشىق ءتۇستى ماقتا نەمەسە زىعىر كيىم كيسە، وكپەسى قىسىلمايدى.

باسسەين نەمەسە تەڭىزدەن كەيىن دىمقىل شومىلۋ كيىمىمەن وتىرماعانى ءجون، ايتپەسە ينفەكتسيا جۇقتىرۋى مۇمكىن.

بۋيرۋدىڭ ايتۋىنشا، جازدا جۇكتى ايەلدەر باستان وتكەرەتىن ماسەلەنىڭ ءبىرى - قول مەن اياقتىڭ ءىسىنۋى.

«اسىرەسە جۇكتىلىكتىڭ سوڭعى كەزەڭدەرىندە تاڭەرتەڭ جانە كەشكە قول- اياقتىڭ ءىسىنۋى - اياعى اۋىر ايەلدەردىڭ بارىندە دەرلىك بولاتىن جاعداي. ءىسىنۋ قان قىسىمىنىڭ جوعارىلاۋىمەن بىرگە جۇرسە، بۇل انا ءۇشىن دە، بالا ءۇشىن دە جاعىمسىز سالدارعا اكەپ سوعۋى مۇمكىن. ەڭ الدىمەن قان قىسىمىن جانە زاردە البۋمين بار-جوعىن تەكسەرۋ كەرەك. ياعني، بۇل اۋرۋدىڭ بەلگىسى مە، الدە پاتولوگيا ما، سونى انىقتاپ العان دۇرىس. ەگەر بۇل قالىپتى ءىسىنۋ بولسا، تۇزدى تاعامداردان اۋلاق بولۋ كەرەك جانە اسىرەسە كەشكى ۋاقىتتا اياقتى جوعارى كوتەرىپ جاتقان پايدالى»، - دەيدى پروفەسسور.