ەلىمىزدەگى دونور ازدىعى ادام ءومىرىن ساقتاپ قالۋعا كەدەرگى بولىپ وتىر - دارىگەرلەر
كەزدەسۋ بارىسىندا مەديتسينالىق مەكەمە وكىلدەرى سەناتورلارعا كلينيكانىڭ قىزمەتى تۋرالى حاباردار ەتتى جانە وتاندىق مەديتسينانىڭ قازىرگى دەڭگەيى بۇيرەك، باۋىر، جۇرەك، وكپە، ۇيقى بەزىن ترانسپلانتاتسيالاۋعا مۇمكىندىك بەرەتىنىن اتاپ ءوتتى.
دارىگەرلەر سونىمەن قاتار قازاقستانداعى دونورلاردىڭ ازدىعى مەديتسينالىق ترانسپلانتاتسيانى دامىتۋ مەن ادامداردىڭ ءومىرىن ساقتاپ قالۋعا كەدەرگى بولىپ كەلە جاتقانىنىنا نازار اۋداردى. بۇل ماسەلەنىڭ سىندارلى جانە زاڭنامالىق تۇرعىدا شەشىمى تابىلۋى كەرەك.
سەناتور ايگۇل قاپباروۆا دونورلار تاپشىلىعى شىن مانىندە كۇردەلى جاعداي ەكەنىنە توقتالا كەلىپ، مۇنداي ماڭىزدى ماسەلەلەر پارلامەنت سەناتىندا دا جان- جاقتى زەردەلەنەتىنىن اتاپ ءوتتى. ال نۇرلان بەكنازاروۆ مەديتسينا سالاسىنداعى وزەكتى ماسەلەلەر ءارقاشان پارلامەنتشىلەردىڭ ەرەكشە باقىلاۋىندا ەكەنىن اتاپ ءوتتى.
«پارلامەنت سەناتى دەنساۋلىق ساقتاۋ سالاسىن دامىتۋعا ەرەكشە نازار اۋدارىپ وتىرادى. جىل سايىن رەسپۋبليكالىق بيۋدجەتتى جاساقتاۋ كەزىندە دەنساۋلىق ساقتاۋعا بولىنەتىن قارجىنىڭ جەتكىلىكتى كولەمدە ۇلعايتۋدى قاداعالايمىز. مەملەكەت مەديتسينا قىزمەتكەرلەرىن الەۋمەتتىك قورعاۋ مەن قولداۋدى كۇشەيتۋ جونىندە شارالار جۇرگىزىپ كەلەدى. مەملەكەت باسشىسىنىڭ تاپسىرماسى بويىنشا جىل سايىن مەديتسينا قىزمەتكەرلەرىنىڭ جالاقىسى كوتەرىلۋدە»، - دەدى سەناتور نۇرلان بەكنازاروۆ.
