قۇتقارۋشىلار اپتاپ ىستىققا بايلانىستى الماتىلىقتارعا ەسكەرتۋ جاسادى

الماتى. قازاقپارات - الماتى قالالىق توتەنشە جاعدايلار دەپارتامەنتى اپتاپ ىستىققا بايلانىستى الماتىلىقتارعا ەسكەرتۋ جاسادى، دەپ حابارلايدى قازاقپارات ءتىلشىسى.

قازگيدرومەتتىڭ مالىمەتىنشە، 19-شىلدە كۇنى اۋا تەمپەراتۋراسى 42 گرادۋسقا دەيىن ىسيدى.

وسىعان وراي الماتى قالاسىنىڭ توتەنشە جاعدايلار دەپارتامەنتى قالا تۇرعىندارى مەن قوناقتارىن تاۋدا ءورت قاۋىپسىزدىگى ەرەجەسىن ساقتاۋعا جانە دالاعا كوپ شىقپاۋعا كەڭەس بەردى.

سونداي-اق ۆەدومستۆو وكىلدەرى تومەندەگى قاۋىپسىزدىك شارالارىن ساقتاۋدى ۇسىنادى:

- تاۋعا دەمالۋعا بارعان جاعدايدا تۇتانعان تەمەكى قالدىقتارىن تاستاماڭىز؛

- ءبىر جەلىگە بىرنەشە ەلەكتر قۇرىلعى قوسپاڭىز، ويتكەنى ەلەكتر جەلىسىنىڭ شامادان تىس جۇكتەلۋى قىسقا تۇيىقتالۋعا جانە ورتكە اكەلۋى مۇمكىن.

- بالالاردى اۆتوكولىك ىشىنە از ۋاقىتقا بولسا دا قالدىرماڭىز. قاتتى ىستىقتان بالا ەسىنەن تانىپ قالۋى مۇمكىن.

- قالا تۇرعىندارى مەن قوناقتارىن كۇن ساۋلەسىنىڭ اسەرىنەن ساقتانۋ ءۇشىن سەرۋەنگە شىقپاۋعا شاقىرامىز.

«ءورت قاۋىپتى كەزەڭدە الماتى قالاسى ت ج د الدىن الۋ شارالارىن كۇشەيتتى. تاۋلى ورماندى جەرلەردە ءورتتىڭ الدىن الۋ ماقساتىندا بەكىتىلگەن پاترۋلدەۋ كەستەسىنە سايكەس دەمالىس جانە مەرەكە كۇندەرى ورمان شارۋاشىلىعى مەكەمەلەرى مەن جەرگىلىكتى پوليتسيا وكىلدەرى بىرلەسكەن رەيد وتكىزەدى»، - دەپ اتاپ ءوتتى دەپارتامەنتتەن.