ۇشىقتىڭ ادامدارعا جۇعاتىنى راس پا؟

استانا. قازاقپارات - ادام بىرنارسەدەن جيىركەنسە نەمەسە سۋىق تيگەندە، ۇشىق شىعىپ كەتەدى.

ونى مەديتسينا تىلىندە گەرپەس دەپ اتايدى. Bugin.kz ۇشىقتىڭ نەدەن پايدا بولاتىنىن جانە ونى ەمدەۋ جولدارىن ۇسىنادى.

ۇشىق قاي كەزدە پايدا بولادى؟

ۇشىق - ەرىن ماڭىنا نەمەسە بەتتىڭ باسقا جەرلەرىنە شىعاتىن بورتپە. جالپى بۇل اۋرۋ دەنەدە قاراپايىم گەرپەس ۆيرۋسى بولسا پايدا بولادى.

قاراپايىم گەرپەس ۆيرۋسىنىڭ ەكى جالپى ءتۇرى بار:

1 ءتيپتى HSV (HSV-1) كوبىنەسە بەتكە شىعادى.

2 ءتيپتى HSV (HSV-2) كوبىنەسە جىنىس ايماعىندا پايدا بولادى.

ۇشىعى بار ادام ەرىن بالزامى، سۇلگىسى، ىدىس-اياعى سەكىلدى زاتتارى ارقىلى وزگەگە جۇقتىرۋى مۇمكىن. كوبىنەسە ادامدار بالالىق شاعىندا نەمەسە جاس ءوسپىرىم كەزىندە اۋىرادى.

كەيبىر ادامداردا ۆيرۋستىڭ بەلگىلەرى ءومىر بويى بايقالمايدى. ال بىرەۋلەردە يممۋندى جۇيەسى السىرەگەندە، قاتتى سترەسستەن كەيىن نەمەسە اۋىرىپ جۇرسە، ۇشىق شىعىپ كەتۋى مۇمكىن.

ادەتتە گەرپەس جاعىمسىز بولىپ كورىنگەنىمەن، قاۋىپتى ەمەس. الايدا قاتەرلى ىسىكپەن اۋىراتىن ادامدارعا ۇشىقتىڭ ءوزى دەنساۋلىعىنا جامان اسەر ەتەدى.

ۇشىقتى قالاي ەمدەۋگە بولادى؟

گەرپەس كوبىنەسە وزىمەن-ءوزى كەتىپ قالادى. ال جالپى شىعىپ، جويىلعانشا 5-10 كۇن كەتەدى. بۇل ۆيرۋستان ەشقاشان قۇتىلا المايسىز. ويتكەنى ول جۇيكە جۇيەسىنىڭ جاسۋشالارىندا ءومىر سۇرەدى. سونىمەن قاتار تۇبەگەيلى ەمدەۋ مۇمكىن ەمەس. الايدا ونى كەتىرۋگە ارنالعان ءدارى-دارمەك، ماز تۇرلەرى بار.

ۇشىق ەكەن دەپ، سالعىرت قاراي سالماڭىز. ەگەر ۇزاق ۋاقىت بويى كەتپەسە، دارىگەرگە بارعان ءجون. ماماندار بۇل جاعدايدا ۆيرۋسقا قارسى پرەپاراتتار تاعايىنداي الادى. ءسىزدىڭ اۋرۋدىڭ دەڭگەيىنە قاراي كرەم تۇرىندە نەمەسە ىشەتىن ءدارى تۇرىندە بەرەدى. سونداي-اق دەرتىڭىزدى جەڭىلدەتۋ ءۇشىن انەستەتيكتى گەلدەردى جاعۋعا بولادى. سيمپتومداردى ازايتىپ، اۋرۋدى باسۋ ءۇشىن انتيگەرپەتيكالىق پرەپاراتتار ۇسىنادى.