تولىق باكپەن جولعا شىقپاۋ قاجەت: مينيسترلىك ىستىقتا كولىكپەن ساپارلايتىندارعا كەڭەس بەردى

استانا. قازاقپارات - ىشكى ىستەر مينيسترلىگى اپتاپ ىستىق كۇندەرى جولعا شىققاندا قانداي ەرەجەلەردى قاپەردە ۇستاۋ كەرەكتىگىن ەسكە سالدى، دەپ حابارلايدى قازاقپارات ءتىلشىسى.

اپتالىق ونلاين- بريفينگى بارىسىندا ۆەدومستۆو وكىلى شۇعىلا تۇرلىبەك ىشكى ىستەر مينيسترلىگى ىستىق كۇندەرى كولىكپەن جولعا شىققاندارعا مىنا ەرەجەلەردى ۇستانۋعا شاقىردى:

- الىس قاشىقتىقتاعى ساپارعا تاڭەرتەڭ نەمەسە كەشكە ىستىق باسىلعان كەزدە شىعۋ؛

- مەديتسينالىق كومەك قوبديشاسى مەن سۋدى جۇك سالعىشقا ەمەس، وزىڭە جاقىن جەردە ۇستاۋ؛

- قاتتى ىستىق كەزەڭدە كوكتايعاقتا قوزعالعانداي اقىرىن، ساق ءجۇرىڭىز. سەبەبى جوعارى تەمپەراتۋرا جاعدايىندا اسفالت ءوزىنىڭ قاسيەتتەرىن جوعالتادى جانە تايعاق بولادى؛

- سالقىنداتۋ جۇيەسىن ۇنەمى باقىلاپ، قوزعالتقىشتىڭ سالقىنداتۋ جۇيەسىنە كۇش تۇسىرمەۋ؛

- باكتى تولىق تولتىرماڭىز. ويتكەنى، جوعارى تەمپەراتۋرادا ديزەل وتىنى مەن بەنزيننىڭ كولەمى ۇلعايادى، بەلسەندى بۋلانۋ جۇرەدى. سونىقتان مۇنداي جاعدايلاردا ءورت شىعۋى مۇمكىن. وسىعان بايلانىستى ساپار الدىندا جارامدى ءورت سوندىرگىشتىڭ بار-جوعىن تەكسەرۋ قاجەت؛

- جۇرەك- قان تامىرلارى جانە سوزىلمالى اۋرۋلارى بار جۇرگىزۋشىلەر وسىنداي ۋاقىتتا جولعا شىقپاعانى ءجون؛

- جاعدايىڭىز كۇرت ناشارلاسا، كولىكتى دەرەۋ توقتاتىپ، باسقا جۇرگىزۋشىلەردىڭ نازارىن اۋدارىڭىز نەمەسە جەدەل جاردەم شاقىرىڭىز، قۇتقارۋ قىزمەتىنە، پوليتسياعا قوڭىراۋ شالىڭىز.