باس پروكۋراتۋرا فرانسيانىڭ ءابليازوۆتى ەلدەن شىعارۋ ۇيعارىمىنا پىكىر ءبىلدىردى
«قازاقستان رەسپۋبليكاسىنىڭ باس پروكۋراتۋراسى فرانسيا بيلىگىنىڭ م. ءابليازوۆتى ەلدەن شىعارۋ تۋرالى شەشىم قابىلدادى دەلىنگەن اقپاراتقا قاتىستى بۇل دەرەكتى راستايتىن نەمەسە تەرىستەيتىن سەنىمدى مالىمەتىنىڭ جوق ەكەندىگىن حابارلايدى»، - دەپ اتاپ ءوتتى اتالعان ۆەدومستۆو اگەنتتىكتىڭ رەسمي ساۋالىنا وراي.
باس پروكۋراتۋرا شەتەلدىك ازماتتاردى ەلدەن شىعارۋ ماسەلەسى، ولاردىڭ كوشى-قون زاڭناماسىن ساقتاۋى فرانسۋز رەسپۋبليكاسىنىڭ عانا ىشكى ءىسى ەكەندىگىن اتاپ وتەدى.
مەملەكەتتىك ورگاننىڭ اتاپ وتۋىنشە، مۇحتار ءابليازوۆ ۇيىمداسقان قىلمىستىق توپتىڭ قۇرامىندا ءبىرقاتار اۋىر جانە اسا اۋىر قىلمىس جاساعانى ءۇشىن قازاقستاننىڭ قۇقىق قورعاۋ ورگاندارى تاراپىنان ىزدەۋدە ءجۇر. باس پروكۋراتۋرا وكىلەتتى ورگان رەتىندە ءابليازوۆتى ەكستراديتسيالاۋ بويىنشا قىلمىستىق پروتسەسسۋالدىق زاڭنامادا جانە حالىقارالىق شارتتاردا كوزدەلگەن شارالاردى قابىلداپ جاتىر.
«بۇعان قوسا، ق ر قىلمىستىق پروتسەسسۋالدىق كودەكستىڭ 201-بابى 1-تارماعىنا سايكەس، اتالعان سوتقا دەيىنگى تەرگەۋ، ونىڭ ىشىندە قىلمىستىق ءىس بويىنشا حالىقارالىق قۇقىقتىق ىنتىماقتاستىققا قاتىستى مالىمەتتەر جاريا ەتۋگە جاتپايدى. سوندىقتان سىزدەردىڭ ساۋالدارىڭىزعا قاتىستى جان-جاقتى اقپارات قازىرگى ۋاقىتتا بەرىلمەيدى»، - دەپ تۇسىندىرەدى ۆەدومستۆودان.
