ورتالىق ازياداعى سۋ تاپشىلىعى قانداي سالدارعا اكەلۋى مۇمكىن - ەركىن تۇقىموۆتىڭ پىكىرى

استانا. قازاقپارات - ازياداعى قاۋىپسىزدىك جانە ىنتىماقتاستىق فورۋمى اياسىندا ب ا ق وكىلدەرىنىڭ ساۋالىنا جاۋاپ بەرگەن ق ر پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتى ديرەكتورى ەركىن تۇقىموۆ سۋ تاپشىلىعى ماسەلەسىنىڭ وزەكتىلىگىنە توقتالدى، دەپ حابارلايدى قازاقپارات ءتىلشىسى.

«سۋ كولەمى ازايىپ بارادى. جاقىندا عانا پرەزيدەنت اكىمدىكتىڭ (استانا - اۆتور تۇسىندىرمەسى) جۇمىسىن سىنعا الدى. ەگەر ەلوردانىڭ حالىق سانى 2 ميلليونعا جەتسە، وندا ءبىز سۋ، ەلەكتر قۋاتىن قايدان الامىز؟ مۇنىڭ بارلىعى ابستراكتالى سۇراق ەمەس. كليماتتىڭ وزگەرۋى دە ءبىزدىڭ كۇن تارتىبىمىزدە تۇرعان ماڭىزدى ماسەلە»، - دەدى ەركىن تۇقىموۆ.

ق س ز ي ديرەكتورى سۋ تاپشىلىعىنا قاتىستى ماسەلەنىڭ وزەكتىلىگىنە ءتۇسىندىرۋ ءۇشىن تاياۋدا ەكى ەل اراسىندا بولعان وقيعانى مىسالعا كەلتىردى.

«جاقىندا سۋ ءۇشىن تاليبان مەن (قازاقستاندا جانە باسقا دا كوپتەگەن ەلدەردە تىيىم سالىنعان) يران اراسىندا شيەلەنىس بولدى. ەندى تاجىكستانمەن امۋداريا بويىنشا ءدال وسىنداي قاقتىعىس بولمايتىنىنا كەپىلدىك قايدا؟ امۋداريا قازاقستان ارقىلى وتپەيدى، ءبىراق ول ارال تەڭىزى عوي. بۇل تىكەلەي قىزىلوردا وبلىسىنا قاتىستى» - دەدى ەركىن تۇقىموۆ.

قوسا كەتسەك، اتالعان فورۋم اياسىندا ءسوز سويلەگەن ب ۇ ۇ قاۋىپسىزدىك كەڭەسىنىڭ تەرروريزمگە قارسى كوميتەتىنىڭ اتقارۋشى ديرەكتورى ناتاليا گەرمان قازاقستاننىڭ «جۋسان» گۋمانيتارلىق ارنايى وپەراتسياسى وزگە مەملەكەتتەرگە ۇلگى ەكەنىن اتاپ ءوتتى.

ەسكە سالايىق، بۇعان دەيىن ەلوردادا ازياداعى قاۋىپسىزدىك جانە ىنتىماقتاستىق فورۋمى ءوتىپ جاتقانىن حابارلاپ ەدىك. وعان ازيا ەلدەرىنەن كەلگەن 60 تان استام ساراپشى قاتىسىپ جاتىر.