ءتاڭىردىڭ جانى: ۆاشينگتوندا قازاقستاندىق ءسان كورسەتىلىمى ءوتتى - فوتو

ۆاشينگتون. قازاقپارات - ۆاشينگتون قالاسىنداعى ازيا ونەرىنىڭ ۇلتتىق مۇراجايىندا قازاق قولونەرىنىڭ داستۇرلەرىن كورسەتەتىن وتاندىق ءۇش شەبەردىڭ ۇلتتىق كيىمدەر توپتاماسى ۇسىنىلدى، دەپ حابارلايدى قازاقپارات مەنشىكتى ءتىلشىسى.

«ءتاڭىردىڭ جانى» ءسان كورسەتىلىمىن سميتسوندىق قولونەرشىلەر باستاماسى، قازاقستان قولونەرشىلەر وداعى جانە Chevron كومپانياسى ۇيىمداستىردى.

قازاقستاندىق ديزاينەرلەر قازاق توقىما جانە زەرگەرلىك ونەرىنىڭ باي پاليتراسىن ۇسىندى.

ايجان بەكقۇلوۆانىڭ توپتاماسىندا تۇركى حالىقتارىنىڭ قولدان جاسالعان كيىمدەرى ۇسىنىلدى. قازاقستاننىڭ وڭتۇستىك- شىعىس بولىگىنەن تابىلعان جارتاستاعى بەينەلەر - پەتروگليفتەر نەگىزىندە جۇننەن جاسالعان جانە كۇنباعىس قۇدايلارىنىڭ پىشىنىنە يە باس كيىمدەر قىزىعۋشىلىق تۋدىردى.

ايجان سەمبىعاليەۆا ماڭعىستاۋ وبلىسىنىڭ تابيعاتى مەن ۇلتتىق قورىقتارىنان شابىت الىپ، ءوز توپتاماسىن وسى ايماق جانە ونىڭ توقىما داستۇرلەرىنە ارنادى.

تىلەك سۇلتان اتا-بابالار كيگەن كيىمىنەن شابىت الدى. ول ءوز توپتاماسى ءۇشىن ءتۇرلى كوستيۋمدەر، زەرگەرلىك بۇيىمدار مەن تۇستەر پاليتراسى بويىنشا ەرەكشەلەنەتىن قازاق تايپالارىنىڭ ءداستۇرلى كيىمدەرىن زەرتتەدى.

2012 -جىلدىڭ ءساۋىر ايىندا قۇرىلعان قازاقستان قولونەرشىلەر وداعى ءداستۇرلى ونەردى ساقتاۋ جانە ناسيحاتتاۋ ميسسياسىن اتقارادى.

ماتەريالدىق ەمەس مادەني مۇرانى قورعاۋ ءۇشىن ماڭىزدى مانگە يە وداق قولونەرشىلەردىڭ كاسىبي ءوسۋىن جانە قازاقستانداعى كرەاتيۆتى يندۋستريانى دامىتۋدى ارتتىرۋعا ۇمتىلادى. ولاردىڭ «قازاقستانداعى ءداستۇرلى قولونەردى جاڭعىرتۋ، ساقتاۋ، قولداۋ جانە دامىتۋ» فلاگماندىق جوباسى Chevron، يۋنەسكو جانە قازاقستان مادەنيەت مينيسترلىگىنەن دەمەۋشىلىك كومەك الادى.

2020 -جىلى سميتسوندىق فولكلور جانە مادەني مۇرا ورتالىعىنىڭ قولونەرشىلەر باستاماسى تاجىريبە الماسۋ ءۇشىن بىردەي قولونەر داستۇرلەرىن ۇستاناتىن قازاقستاندىق جانە امەريكالىق سۋرەتشىلەردى بىرىكتىرۋ ءۇشىن قازاقستان قولونەرشىلەر وداعىمەن، Chevron كومپانياسىمەن جانە ا ق ش مەملەكەتتىك دەپارتامەنتىمەن سەرىكتەستىك قۇردى.