قازاقستاندىق ونەرتاپقىش كۇيزەلىستەن شىعۋعا كومەكتەسەتىن قۇلاققاپ ويلاپ تاپتى
جوبانى 5 جىل بويى عالىمدارمەن بىرلەسىپ زەرتتەگەن. گادجەت كوپشىلىك نازارىنا يننوپروم حالىقارالىق كورمەسىندە ۇسىنىلدى. سيفرلىق مەديتاتسيا.
قازاقستاندىق ونەرتاپقىشتار يننوپروم حالىقارالىق كورمەسىندە نەيروقۇلاققاپتار ۇسىندى. قۇرىلعىدا 10 رەجيم بار، 6 سەكۋندتان 3 مينۋتقا دەيىن ۋاقىت ارالىعىندا ادامنىڭ جۇيكە جۇيەسىن تىنىشتاندىرىپ، تىنىعىپ الۋعا مۇمكىندىك بەرەدى.
قانات نۇرىمبەكوۆ، جوبا اۆتورى:
- ءبىز ادامدارعا كۇيزەلىستەن شىعۋعا، از ۋاقىت ىشىندە كومەكتەسۋگە مۇمكىندىك بەرەتىن ءادىس ىزدەدىك. ناتيجەسىندە وسىنداي نەيروقۇلاققاپتار ويلاپ تاپتىق. بۇل گادجەت مەملەكەتتىك قىزمەتشىلەرگە دە، مەديتسينالىق مەكەمەلەرگە دە، ءتىپتى بارلىق جەردە جاقسى كومەكتەسەدى. جوبانى ىسكە اسىرۋ ءۇشىن 5 جىل ۋاقىت كەتتى.
قازىر ماماندار اسفەندياروۆ اتىنداعى ۇلتتىق مەديتسينا ۋنيۆەرسيتەتىنىڭ بازاسىندا زەرتتەۋ جۇرگىزىپ جاتىر. ازىرلەۋشىلەر گادجەتتى رەلاكساتسيا بولمەلەرىندە قولدانىلاتىن مەديتسينالىق قۇرىلعى رەتىندە ۇسىنۋدى جوسپارلاپ وتىر.
جۇلدىز جاندالەيەۆا، جوبا اۆتورى، پسيحولوگ:
- دەنساۋلىققا اسەر ەتپەيدى. جوبانى ءبىز پسيحولوگيا تۇرعىسىنان عانا ەمەس، مەديتسينا جاعىنان دا زەرتتەدىك. عالىمدارمەن بىرگە جۇمىس ىستەدىك. شەتەلدەن دە ماماندار تارتتىق. ءبىز ءۇشىن ەڭ باستىسى - ادامداردىڭ دەنساۋلىعى. ءالى دە ءبىرقاتار زەرتتەۋ جۇرگىزەمىز.
www.24.kz
