الماتىعا تاياۋ شىعىستان تۋريستەر كوپتەپ كەلە باستادى - فوتو
«الماتى تاياۋ شىعىس ەلدەرىنەن كەلگەن كاسىپكەر تۋريستەر مەن قاراپايىم ساياحاتشىلار اراسىندا ۇلكەن تانىمالدىلىققا يە بولا باستادى. ءبىز وماننان كەلگەن قوناقتاردى قۇشاق جايا قارسى الامىز، ولاردىڭ ساپارى جاعىمدى ءارى ەستە قالارلىق بولاتىنىنا سەنىمدىمىز. قابىلدانعان شارالاردىڭ ارقاسىندا الماتىعا تۋريستىك دەستيناتسيا رەتىندە قىزىعۋشىلىق ارتىپ كەلەدى، ءبىز بۇل جۇمىستى جالعاستىرىپ جاتىرمىز»، - دەدى الماتى قالاسى تۋريزم باسقارماسىنىڭ باسشىسى عاليا توقسەيىتوۆا.
ول «الماتى- ماسكات» باعىتى بويىنشا جاڭا رەيستى اشۋدىڭ ماقساتى قازاقستان مەن وماننىڭ تۋريستىك الەۋەتىن دامىتۋ، ەكى ەلدىڭ اراسىنداعى ساۋدا- ەكونوميكالىق جانە مادەني بايلانىستاردى نىعايتۋ ەكەنىن ايتتى.
ونىڭ سوزىنشە، تۋريزم باسقارماسى الماتى قالاسىن حالىقارالىق نارىقتاردا بەلسەندى تۇردە ىلگەرىلەتۋدە. مىسالى، تاياۋ شىعىس ەلدەرىنەن تۋريستەردى تارتۋ ءۇشىن كاتار، ب ا ءا، ساۋد ارابياسى جانە وماننىڭ ءىرى قالالارى بويىنشا روۋد- شوۋ ۇيىمداستىرىلدى. بىلتىر الماتى تۋريزم باسقارماسىنىڭ وكىلدەرى Dubai - Arabian Travel Market 2022 كورمەسىنە قاتىستى.
ايتا كەتەرلىگى، پاندەميا توقتاعان ساتتەن باستاپ الماتىدا تۋريستەر كوبەيە باستادى. 2022 -جىلى مەگاپوليسكە كەلگەن ءاربىر ءتورتىنشى تۋريست شەتەلدىك. 2022 -جىلى الماتىدا شەتەلدىك تۋريستەر سانى 417 مىڭ ادامعا جەتتى. بيىل ءبىرىنشى توقساندا قالاعا باسقا ەلدەردەن 400 مىڭنان استام تۋريست كەلگەن.
بۇگىندە الماتىدان الەمنىڭ كەز كەلگەن جەرىنە ۇشۋعا بولادى. ۇشۋ كەستەسىندە 23 ەلگە رەيس بار. اتاپ ايتساق، رەسەي، گرۋزيا، وڭتۇستىك كورەيا، ب ا ءا، ۇلى بريتانيا جانە ت. ب. شەتەلدىڭ 38 قالاسىنا تىكەلەي رەيستەر اشىلعان.
