ەرتەڭنەن باستاپ پورتال ارقىلى گرانتقا قۇجات قابىلداۋ باستالادى

استانا. قازاقپارات - عىلىم جانە جوعارى ءبىلىم مينيسترلىگىنىڭ جوعارى جانە جوعارى وقۋ ورنىنان كەيىنگى ءبىلىم كوميتەتى ءتوراعاسىنىڭ ورىنباسارى نۇربەك ساپارقوجايەۆ قازاقپارات ءتىلشىسىنىڭ ساۋالىنا جاۋاپ بەرە وتىرىپ، بيىل گرانتقا قۇجات قانداي ءتارتىپ بويىنشا قابىلداناتىنىن ءتۇسىندىرىپ بەردى.

«بيىل ءبىز گرانتقا قۇجات قابىلداۋدى ەكى ءتۇرلى ءادىس ارقىلى جۇزەگە اسىرامىز. ءبىرىنشىسى - ول Еgov.kz ەلەكتروندىق ۇكىمەت پورتالى ارقىلى قابىلداۋ. وسى جۇيەنىڭ كومەگىمەن تالاپكەر ءوزىنىڭ قۇجاتتارىن جۇكتەپ، جولدايدى. كەيىن قاجەتتى مالىمەتتەر جيناقتالىپ، ءبىزدىڭ ۇلتتىق تەستىلەۋ ورتالىعىنىڭ بازاسىنا تۇسەدى. ياعني، پورتال مەن ورتالىقتىڭ اقپاراتتىق جۇيەسى ءوزارا بايلانىستى بولادى. بارلىق پروتسەس ونلاين رەجيمدە وتەدى. ەرتەڭنەن باستاپ Еgov.kz پورتالىندا گرانتقا قۇجات قابىلداۋ بويىنشا ارنايى قىزمەت ىسكە قوسىلادى» - دەدى نۇربەك ساپارقوجايەۆ ءتىلشى ساۋالىنا جاۋاپ بەرە وتىرىپ.

سپيكەردىڭ مالىمدەۋىنشە، ەگەر پورتالدا اقاۋ نەمەسە ينتەرنەت ساپاسى ناشار بولسا، وندا تالاپكەرلەر وزدەرىنىڭ قۇجاتتارىن وقۋ ورنىنىڭ قابىلداۋ كوميسسياسىنا اپارىپ، تاپسىرا الادى.

«قۇجات قابىلداۋدىڭ ەكىنشى جولى - جوعارى وقۋ ورىندارىنىڭ قابىلداۋ كوميسسياسىنا بارىپ، ۇيرەنشىكتى جولمەن قۇجات تاپسىرۋ. ول دا ۇلتتىق تەستىلەۋ ورتالىعىنىڭ اقپارتتىق جۇيەسى ارقىلى جۇزەگە اسادى. ءبىز كەشە جوعارى وقۋ ورىندارىنىڭ تەحنيكالىق حاتشىلارى، توراعالارىمەن جينالىس وتكىزدىك. ونىڭ بارىسىندا ءتۇسىندىرۋ جۇمىستارى جۇرگىزىلدى. بۇل پروتسەسكە بارلىعى دايىن دەپ ويلايمىز»، - دەپ ءمالىم ەتتى نۇربەك ساپارقوجايەۆ.

كوميتەت ءتوراعاسىنىڭ ورىنباسارى تەحنيكالىق اقاۋلار بولعان جاعدايدا، ونى جويۋ بويىنشا جۇمىس ىستەيتىن شتاب قۇرىلعانىن ءمالىم ەتتى.

«ءبىز ارنايى شتاب قۇردىق. ول قانداي ماسەلە بويىنشا كىمگە حابارلاسۋ كەرەك، قانداي ولقىلىقتار شىقتى، دەگەن سۇراقتارمەن اينالىسادى. شتابتىڭ بايلانىس نومىرلەرىن جوعارى وقۋ ورىندارىندا جۇمىس ىستەيتىن قابىلداۋ كوميسسيالارىنا جولدادىق. ولار بىزبەن تىكەلەي بايلانىستا بولادى»، - دەپ تۇيىندەدى نۇربەك ساپارقوجايەۆ.

سپيكەردىڭ سوزىنشە، 13-20 -شىلدە ارالىعىندا تالاپكەرلەردەن قۇجات قابىلدانادى.

نۇربەك ساپارقوجايەۆ گرانت كونكۋرسىنا قاتىسۋ ءۇشىن قانداي قۇجاتتار قاجەت ەكەنىن ايتىپ بەردى.

«نەگىزىنەن تالاپكەرگە قاتىستى دەرەكتەر سۇرالادى. اتاپ ايتقاندا، مەكتەپ ءبىتىرۋشىنىڭ اتى- ءجونى، تۋعان جىلى، سەرتيفيكاتى جانە جەكە باسىنا قاتىستى تاعى قوسىمشا مالىمەتتەرى جۇكتەلەدى. قاجەتتى بارلىق جولاقتار تولتىرىلىپ، قۇجاتتار جەتكىلىكتى بولسا، تاپسىرۋ باتىرماسىن باسادى. كەيىن تالاپكەرگە قۇجاتىنىڭ قابىلدانعانى تۋرالى انىقتاما شىعادى» - دەپ ءمالىم ەتتى نۇربەك ساپارقوجايەۆ ءتىلشى ساۋالىنا جاۋاپ بەرە وتىرىپ.

تالاپكەرلەردەن گرانتقا قۇجات قابىلداۋ تۇنگى ۋاقىتتاردا دا جۇرگىزىلەدى.

«تالاپكەرلەردەن گرانتقا قۇجات قابىلداۋ تۇنگى ۋاقىتتاردا دا جۇرگىزىلەدى. دەگەنمەن مىنا ماسەلەگە توقتالعىم كەلەدى: ەگەر ادامداردىڭ بارلىعى تۇنگى ۋاقىتتى تاڭداپ، جاپپاي قۇجات تاپسىرسا، وندا پورتالدىڭ جۇكتەمەسى كوبەيەدى. تيىسىنشە، اقاۋ شىعۋى ىقتيمال. جۇكتەمە ارتىپ كەتسە، وندا پورتال بارلىق قۇجاتتى قابىلداي المايدى. سوندىقتان ءبىز تالاپكەرلەرگە مىنانى ايتقىمىز كەلەدى: قۇجات تاپسىرۋ كەزىندە ول كوپ جۇتەلىپ جاتسا، وندا قايتا- قايتا تاپسىرا بەرۋدىڭ قاجەتى جوق. مۇنداي جاعدايلار بىزدە بولدى. وندا ءبىر تالاپكەر كۇتپەي، بەتتى بىرنەشە رەت اشىپ، جۇكتەي بەرگەن» - دەپ ءمالىم ەتتى نۇربەك ساپارقوجايەۆ ءتىلشى ساۋالىنا جاۋاپ بەرە وتىرىپ.

ەگەر تالاپكەر قۇجاتتى قايتا- قايتا جۇكتەپ، بىرنەشە رەت ءوتىنىش بەرگەن بولسا، وندا كونكۋرستىق كوميسسيا قۇجاتتاردىڭ ەڭ سوڭعى نەمەسە تولىق اقپارات كورسەتىلگەن نۇسقاسىن ىرىكتەپ الادى.

ەسكە سالايىق، بۇعان دەيىن گرانتقا تۇسۋگە قانشا بالل جەتكىلىكتى سانالاتىنى تۋرالى جازىپ ەدىك.

قوسا كەتسەك، بيىل باكالاۆرياتقا 73 مىڭنان اسا گرانت ءبولىنىپ وتىر.

اۆتور:

ءاليحان اسقار