كەلەسى جىلى ۇ ب ت تاپسىرۋشىلارعا ءوز قالامسابىن الىپ كىرۋگە تىيىم سالىنادى

استانا. قازاقپارات - كەلەسى جىلدان باستاپ ۇ ب ت تاپسىرۋشىلارعا قالامساپ اۋديتورياعا كىرگەننەن كەيىن بەرىلەدى. ورتالىق كوممۋنيكاتسيالار قىزمەتىندە وتكەن بريفينگىدە ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ وسىنداي وزگەرىس بولۋى مۇمكىن ەكەنىن ايتتى، دەپ حابارلايدى قازاقپارات ءتىلشىسى.

«بيىلعى ەڭ كرەاتيۆتى كوشىرۋ ءتاسىلى دەپ كوستيۋمىنىڭ كەۋدەسىن ويىپ، سمارتفوندى سوعان سالىپ وتكەن. وقۋشىنى ايتۋعا بولاتىن شىعار. وسىنداي تاسىلمەن ول سمارتفوننىڭ ەكرانىنا «تەرەزە» اشىپ قويعان. سول «تەرەزە» ارقىلى اشىپ، جاۋىپ وتىرعان. ارينە، ءبىز مۇنى احۋال ورتالىعى ارقىلى بايقاپ قويدىق. ول تالاپكەردىڭ ۇ ب ت قورىتىندىسى جويىلدى.

ءبىز دەنساۋلىعىندا كىنارات بار بالالارعا ۆيتامين نەمەسە ءدارى الىپ كىرۋگە رۇقسات بەرەمىز. بىزدە ءبىر وقۋشى دارۋمەننىڭ بەتىنە فورمۋلا جازىپ كىرگەن جاعداي بولعان»، - دەگەن ورتالىق ديرەكتورى ۇ ب ت- عا قاتىسۋشىلار قالامساپ ارقىلى دا ءتۇرلى قيتۇرقىلىقتارعا باراتىنىن ايتتى.

«ءتىپتى ارنايى قالامساپتار دا بولدى. وسىعان بايلانىستى ءبىز شەشىم قابىلداماقپىز. كەلەسى جىلى ۇ ب ت وتكىزگەن كەزدە قالامساپتى دا اۋديتوريادا بەرەتىن بولامىز. بيىل ءار وقۋشىعا ءوز قالامىن اكەلۋگە رۇقسات بەرگەنبىز. ءبىراق ونى شپارگالكا جاسىرۋعا پايدالانعان جايتتاردى كوردىك. وسى فاكتىلەردى ەسكەرىپ، وسىنداي شارا قابىلداپ وتىرمىز»، - دەدى رۋسلان ەمەلبايەۆ.

ۇ ب ت ناتيجەسى جويىلعان جانە تەستىلەۋگە كىرگىزىلمەگەن تالاپكەرلەر تامىزدا تەست تاپسىرسا دا، گرانتقا تالاسا المايدى.

«بيىلعى وزگەرىس بويىنشا تالاپكەر ۇ ب ت- نىڭ ءبىرىنشى مۇمكىندىگىندە ەرەجە بۇزسا، ەكىنشى مۇمكىندىگىن پايدالانا الادى. بىلتىر بۇل تۇرعىدا ءتارتىپ قاتاڭ بولاتىن. ەرەجە بۇزدى ما، اۆتوماتتى تۇردە ەكىنشى مۇمكىندىكتەن ايىرىلعان.

ال ءبىر عانا مۇمكىندىككە تىركەلىپ، تەست ناتيجەسى جويىلعان بالالار تامىز ايىنداعى اقىلى ۇ ب ت- عا قاتىسا الادى. بۇل ولارعا شەكتى بالل جيناي العان جاعدايدا جوعارى وقۋ ورنىندا اقىلى نەگىزدە ءبىلىم الۋعا مۇمكىندىك بەرەدى. نەگىزگى ۇ ب ت كەزىندە ناتيجەسى جويىلعان تالاپكەرلەر قاڭتار مەن ناۋرىز ۇ ب ت- سىندا تەست تاپسىرعان بولسا، سول سەرتيفيكاتتى كورسەتىپ، اقىلى نەگىزدە وقي الادى»، - دەپ ءتۇسىندىردى ول.

ورتالىق ديرەكتورى ەرەجە بۇزعان تالاپكەرلەرگە بيىل گرانتتان ۇمىتتەنبەۋىنە بولاتىنىن ايتتى.

«ءبىز ايتىپ وتىرعان 700-دەن استام ادام تامىزدا اقىلى ۇ ب ت تاپسىرا الادى. ءبىراق اقىلى بولىمگە عانا ۇمىتتەنە الادى. سەبەبى گرانتقا تەك جازعى ۇ ب ت سەرتيفكاتى عانا جارامدى»، - دەدى رۋسلان ەمەلبايەۆ.