وڭتۇستىك كورەيادا ادام جاسىن ەسەپتەۋدىڭ جاڭا جۇيەسى ەنگىزىلدى
- كورەيلەردە ادام جاسى ۇرىقتىڭ قۇرساقتا ءومىر سۇرگەن كەزىنەن باستاپ ەسەپتەلەدى. بۇل ءداستۇرلى ساناۋ ەجەلدەن بار. مۇنداي ەسەپتەۋ قىتاي مەن جاپونيادا جانە ۆەتنامدا دا بولدى. ءبىراق بۇل ەلدەر 20- عاسىردا حالىقارالىق ادىسكە كوشتى. ال كورەيادا حالىقارالىق جانە ءداستۇرلى جۇيە قاتار قولدانىلعان. ادام كورەي ءداستۇرى بويىنشا ءوز جاسىن ايتقان. حالىقارالىق جاستى انىقتاۋ ءۇشىن 1 جاستى الىپ تاستاپ وتىرادى. زاڭگەرلەردىڭ ايتۋىنشا، جاھاندىق نورمالار ەنگىزىلگەننەن كەيىن ۇلكەن وزگەرىستەر بولمايدى.
كو مين سوك، ادۆوكات:
- ستاندارتتى حالىقارالىق جۇيە سوت جانە اكىمشىلىك سالاسىندا بۇرىننان قولدانىلىپ كەلەدى. ياعني، مەكتەپكە بارۋ جاسى، زەينەتكەرلىك جاس دەگەندەي. بىزدە جاستى ەسەپتەۋدىڭ حالىقارالىق جۇيەسى الدەقاشان قابىلدانعان. سوندىقتان وزگەرىس تۇرعىنداردىڭ ومىرىنە قاتتى اسەر ەتپەيدى.
زاڭناماداعى جاڭالىقتاردى شەتەل ۋنيۆەرسيتەتتەرىندە وقيتىن نەمەسە وقۋعا تۇسەتىن كورەي ازاماتتارى سەزىنەتىن بولادى. ويتكەنى، بۇل جاعدايدا ولارعا حالىقارالىق جۇيە بويىنشا جاسىن كورسەتۋ كەرەك.
يۋليا چون، ستۋدەنت:
- ورىس دوستارىم مەنىڭ جاسىمدى ۇنەمى سۇرايتىن. مەن كورەي جانە پاسپورتتاعى جاسىمدى ايتامىن. جاڭا جۇيە ۇلكەن وزگەرىستەر اكەلمەيدى. ادامدارعا بۇل جۇيەگە ۇيرەنۋ ءۇشىن ۋاقىت كەرەك. ال ەكىنشى جاعىنان، ورتاق ەرەجەنىڭ جۇمىس ىستەپ جاتقانىنا قۋانىشتىمىن.
كورەيادا جاس ايىرماشىلىعىنا بايلانىستى داۋ- داماي بولدى. كوروناۆيرۋسقا قارسى ۆاكسينالاۋ كەزىندە جەرگىلىكتى دارىگەرلەر 30 جاسقا دەيىنگى ادامدارعا Astrazenekа پرەپاراتىن قولدانۋدى شەكتەدى، ءبىراق جاستى قانداي جۇيەمەن انىقتايتىنىن كورسەتپەدى. 2004 -جىلى دا ءسۇت ونىمدەرىن وندىرەتىن كاسىپورىن باسشىلىعى مەن كاسىپوداق اراسىندا كەلىسپەۋشىلىك بولعان. ۇجىمدىق شارتتا 56 جاستان اسقان قىزمەتكەرلەردىڭ جالاقىسىن تومەندەتۋگە مۇمكىندىك بەرەتىن تارماق بولدى. ال بىلتىر جوعارعى سوت ادام جاسىن ەسەپتەۋدە حالىقارالىق جۇيەگە سۇيەنۋ كەرەك دەپ شەشتى.
كو مين سوك، ادۆوكات:
- 6 جاسقا دەيىنگى بالالار اۆتوبۋسقا تەگىن وتىرادى. اكىمشىلىك بۇل نورمانى حالىقارالىق ستاندارت بويىنشا ەنگىزدى، ءبىراق بۇل حابارلامادا كورسەتىلمەگەن. كەيبىرەۋلەر 6 جاسقا تولماعان بالا ءۇشىن اقشا تولەيتىن جاعداي بولدى.
دەگەنمەن، كەيبىر جاعدايلاردا جاس ساناۋدىڭ ەسكى جۇيەسى ساقتالادى. ادامعا حالىقارالىق ستاندارتتار بويىنشا 19 جاسقا تولعان جىلدىڭ 1 -قاڭتارىنان باستاپ الكوگولدىك ىشىمدىك ىشۋگە نەمەسە تەمەكى شەگۋگە رۇقسات ەتىلەدى. ەر ازاماتتار 18 جاسقا تولعان جىلدىڭ 1- قاڭتارىنان باستاپ اسكەرگە بارا الادى.
www.24.kz
