قوستانايدا شارۋاشىلىقتان يتاليالىق پرۋس پەن شەگىرتكە ءۇيىرى انىقتالدى

قوستاناي. قوستاناي ءوڭىرىنىڭ «زارەچنوە» تاجىريبەلىك- وندىرىستىك شارۋاشىلىعىنىڭ اۋماعىندا يتاليالىق پرۋس پەن تابىندىق ەمەس شەگىرتكەلەردىڭ ءۇيىرى انىقتالدى.

ول جەرگە قوستاناي وبلىستىق اۋماقتىق ينسپەكتسياسىنىڭ جەتەكشىسى دارحان ابدىكارىموۆ باستاعان ماماندار توبى باردى، دەپ حابارلايدى قازاقپارات.

ەگىستىكتەردى زەرتتەۋ ناتيجەسى قوستاناي اۋدانىنىڭ ازداعان اۋماعىندا زيانكەس تارالعانىن كورسەتتى. سونداي- اق جاندىكتەردىڭ تارالۋ قاۋپىنىڭ تومەندىگىنە قاراماستان، بۇل اۋداندا جانە قوستاناي قالاسىندا اۋماقتارعا حيميالىق وڭدەۋ جۇرگىزۋ تۋرالى شەشىم قابىلداندى.

اۋىل شارۋاشىلىعى مينيسترلىگىنىڭ مالىمەتىنشە بۇگىندە قوستاناي وبلىسىندا تابىن شەگىرتكە زيانكەستەرىنىڭ بولۋىنا بايلانىستى 1,7 ميلليون گ ا جەر زەرتتەلگەن. يتاليالىق پرۋسقا قارسى قورعانىس شارالارى 290,9 مىڭ گ ا جەردە، ازيالىق شەگىرتكەگە قارسى 6,5 مىڭ گا جەردە جۇرگىزىلدى. وبلىسقا بارلىق قاجەتتى پرەپارات الدىن الا جەتكىزىلدى.

جالپى، تابىن شەگىرتكەلەرىنىڭ دامۋى مەن تارالۋى سيكلدىك سيپاتقا يە. اۋا رايى مەن كليماتتىق جاعدايلارعا بايلانىستى ءار جىلدارى زيانكەستەر سانىنىڭ كوبەيىپ، ازايىپ وتىرادى.

ماسەلەن، شەگىرتكەلەردىڭ ەڭ اۋقىمدى تارالۋى 2000 -جىلى تىركەلگەن بولاتىن: 7,1 ميلليون گ ا اۋماققا تارادى. 2015 -جىلدان 2019 -جىلعا دەيىن حيميالىق وڭدەۋ الاڭىنىڭ 3,2 ميلليون گەكتاردان 567,6 مىڭ گەكتارعا دەيىن تومەندەۋى بايقالدى.

2020 -جىلدان باستاپ قازىرگى ۋاقىتقا دەيىن تابىن زيانكەستەرى كوپ تارالا باستاعان.