شىعىس قازاقستان وبلىسىندا قىزدار توبەلەسىنە قاتىستى سوت ۇكىمى شىقتى

استانا. قازاقپارات – ش ق و كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىندا كامەلەتكە تولماعان ەكى قىز بەن جاسوسپىرىمگە قاتىستى قىلمىستىق ءىس قارالدى.

سوت ءىسى ەكى باپ نەگىزىندە جالعاستى: ق ر قىلمىستىق كودەكسى 293-بابى، 2-بولىگى، 1-تارماعى (الدىن الا ءسوز بايلاسقان توپتىڭ بۇزاقىلىعى)؛ 194-باپ، 2-بولىگى، 1، 2-تارماعى (الدىن الا ءسوز بايلاسقان توپتىڭ كۇش كورسەتە وتىرىپ بوپسالاۋى) جانە تاعى ءبىر جاسوسپىرىمگە قاتىستى ق ر قىلمىستىق كودەكسى 293-بابى، 2-بولىگى، 1-تارماعى (الدىن الا كەلىسكەن توپتىڭ بۇزاقىلىعى) بويىنشا قارالدى.

سوت ءىسى كەزىندە 1-ناۋرىزدا ADK River ويىن-ساۋدا ورتالىعىندا كامەلەتكە تولماعان ەكى قىزدىڭ ءبىر ادامدى سوققىعا جىعىپ، دەنە جاراقاتىن كەلتىرگەندەرى انىقتالدى. كەلەسى كۇنى الدىن الا ءسوز بايلاسقان ەكى قىز تاعى سول جاسوسپىرىمگە الىمجەتتىك كورسەتكەن. دەنەسى مەن بەتىنە سوققى جۇمساپ، كۇش كورسەتۋ ارقىلى قوقان لوقى ۇيىمداستىرعان.

«ادامنىڭ ار-نامىسىن تاپتاپ، كەمسىتۋ جولىمەن تەلەفونعا ءتۇسىرىپ، جابىرلەنۋشىنىڭ ءىش كيىمىن شەشۋگە ماجبۇرلەدى»، - دەلىنگەن سوت قۇجاتىندا.

كامەلەتكە تولماعان قىزدار بۇل ارەكەتتەرىنىڭ سوڭىندا 50 مىڭ تەڭگە اقشا تالاپ ەتكەن. ونى تاۋىپ بەرمەسە، بەينەجازبانى جان-جاققا بولىسەتىندىكتەرىن ايتقان.

ايىپتالۋشىلار بوپسالاۋدان باسقا، كىنالارىن بىرتىندەپ مويىندادى. بۇل رەتتە قورعاۋشى تاراپ ءبىر باپ بويىنشا اقتاۋدى سۇراعان. سوت پىكىرىنشە، ايىپتالۋشىلاردىڭ كىناسى ۇسىنىلعان زاتتاي دالەلدەر، بەينەجازبا، جابىرلەنۋشى مەن كۋاگەرلەر جاۋابى نەگىزىندە دالەلدەندى.

«ق ر قىلمىستىق كودەكسى 293-بابى، 2-بولىگى ورتاشا اۋىر قىلمىسقا، ق ر قىلمىستىق كودەكسى 194-بابى، 2-بولىگى اۋىر قىلمىسقا جاتادى. سوت ايىپتالۋشى ا. مەن ت. -نىڭ كامەلەتكە تولماۋىن جازانى جۇمسارتۋعا سەبەپشى ەكەنىن ايتتى. ار-نامىسىن تاپتاۋ، قاتىگەزدىك، بىرەۋدى قورلاۋعا دەگەن قۇمارلىق، كەرىسىنشە، جازانى اۋىرلاتۋعا نەگىز بولدى. ايىپتالۋشىلاردىڭ جەكە دەرەكتەرى مەن بولعان جاعداي ەسكەرىلە كەلە، ا. مەن ت. -عا ق ر قىلمىستىق كودەكسىنىڭ 292-بابى، 2-بولىگى، 1-تارماعى نەگىزىندە ءبىر جىلعا بوستاندىعىن شەكتەۋ، ق ر قىلمىستىق كودەكسىنىڭ 194-بابى، 2-بولىگى، 1-2 تارماقتارىنا سايكەس ءۇش جىلعا باس بوستاندىعىنان ايىرۋ، سوڭعى شەشىمدە ءۇش جىلعا باس بوستاندىعىنان ايىرۋ جازاسى كوزدەلدى. ايىپتالۋشى و. -عا ءبىر جىلعا بوستاندىعىن شەكتەۋ تۇرىندەگى جازا قولدانىلادى»، - دەلىنگەن ش ق و كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىنىڭ باسپا ءسوز قىزمەتى ۇسىنعان مالىمەتتە.

ۇكىم ءالى زاڭدى كۇشىنە ەنگەن جوق. سونداي-اق، ايىپتالۋشىلاردان مورالدىق زيان كەلتىرگەندەرى ءۇشىن 9 ميلليون تەڭگە كولەمىندە وتەماقى ءوندىرىلدى.

اقپارات دەرەككوزى: Massaget.kz