ەۋروپاعا ۆيزالىق رەجيمدى جەڭىلدەتۋدە قولداۋ كورسەتۋدى سۇرادىق – ءس ءى م
بۇگىن ۆەدومستۆو باسشىسى قازاقستانعا رەسمي ساپارمەن كەلگەن شۆەيتساريا سىرتقى ىستەر فەدەرالدىق دەپارتامەنتىنىڭ باسشىسى ينياتسيو كاسسيسپەن كەزدەستى.
«كەزدەسۋ بارىسىندا تۋريستىك سالادا جارنامالىق ناۋقانداردى ۇيىمداستىرۋ ارقىلى بىرلەسكەن ءىس- شارالاردى جۇزەگە اسىرۋدىڭ ماڭىزدىلىعىن اتاپ وتتىك. ەكى ەل ازاماتتارى اراسىنداعى بايلانىستاردى كەڭەيتۋ جولدارىن دا ورتاعا سالدىم. كوپتەگەن ەۋروپالىقتارمەن قاتار، شۆەيتساريا ازاماتتارى دا بەس جىلدان استام ۋاقىتتان بەرى قازاقستانعا تۋريستىك نەمەسە ىسكەرلىك ۆيزا راسىمدەمەي كەلە الادى. وسىعان بايلانىستى، كاسسيس مىرزادان قازاقستان ازاماتتارى ءۇشىن ۆيزالىق رەجيمدى جەڭىلدەتۋ جونىندەگى رەسمي كونسۋلتاتسيالاردا قولداۋ كورسەتۋدى سۇرادىم»، - دەدى مۇرات نۇرتىلەۋ ەلوردادا وتكەن بريفينگتە.
سىرتقى ىستەر ءمينيسترى قوس ەلدىڭ مۇددەسىن قامتيتىن سالالارداعى ەكىجاقتى قارىم- قاتىناستاردىڭ بولاشاعى زور دەگەن ورتاق ويعا كەلگەندەرىن اتاپ ءوتتى.
«قوس تاراپتىڭ بىرەگەي ماقساتى - استانا مەن بەرن اراسىنداعى سان- قىرلى ارىپتەستىك ءورىسىن كەڭەيتۋ باعىتىندا نىق قادامدار جاسالاتىنىنا كۇمانىم جوق. وسى كەزدەسۋدىڭ قورىتىندىسى ەكى ەل اراسىنداعى بايلانىستاردى كۇشەيتۋگە قوسىمشا سەرپىن بەرەتىنىنە سەنىمدىمىن»، - دەدى م. نۇرتىلەۋ.
بۇعان دەيىن ي. كاسسيس شۆەيتساريانىڭ حالىقارالىق سۋ ءبولۋ ماسەلەسىندە قازاقستانعا جاردەم كورسەتۋگە دايىن ەكەنىن ايتقان ەدى.
سونداي- اق، شۆەيتساريانىڭ قازاقستان ەكونوميكاسىنا سالعان ينۆەستيتسياسى 32,6 ميلليارد دوللاردان استى.
