ۇلتتىق بانك تامىزدا بازالىق مولشەرلەمەنى تومەندەتۋ مۇمكىندىگىن قاراستىرادى

استانا. قازاقپارات - ينفلياتسيانىڭ تومەندەۋ ءۇردىسى تۋرالى ايتۋعا ءالى ەرتە. بۇل جايىندا ۇلتتىق بانك ءتوراعاسى عالىمجان ءپىرماتوۆ ايتتى، دەپ حابارلايدى قازاقپارات ءتىلشىسى.

«ەلدەگى ينفلياتسيالىق ۇدەرىستەردە بايقالعان جانە كۇتىلەتىن وڭ وزگەرىستەرگە قاراماستان، ينفلياتسيا تومەندەۋىنىڭ سەنىمدى تۇراقتى ءۇردىسى تۋرالى ايتۋعا ءالى ەرتە. بۇل ىشكى ينفلياتسيالىق فاكتورلاردىڭ جانە بولاشاقتا باعا ءوسۋى ءۇشىن ىقتيمال تاۋەكەلدەردىڭ بولۋىنا بايلانىستى. ينفلياتسيالىق كۇتۋلەردىڭ جوعارى دەڭگەيدە ورنىعۋىن، جانار- جاعارماي مەن تۇرعىن ءۇي كوممۋنالدىق قىزمەتتەر باعاسىنىڭ ارتۋىنان بولعان جاناما اسەرلەردىڭ ىسكە اسۋىن، فيسكالدىق ىنتالاندىرۋدىڭ كۇشەيۋىن، مۇناي سۇرانىسىنا اسەر ەتەتىن جاھاندىق رەتسەسسيانىڭ بولۋ مۇمكىندىگىن جانە گەوساياسي جاعداي بەلگىسىزدىگىنىڭ ءوسۋىن نەگىزگى تاۋەكەلدەرگە جاتقىزۋعا بولادى. ءبىز بۇرىن ايتىلعان ريتوريكاعا سايكەس ارەكەت ەتەمىز»، - دەدى عالىمجان ءپىرماتوۆ.

ونىڭ ايتۋىنشا، جوعارىدا اتالعان فاكتورلار مەن تاۋەكەلدەر اقشا- كرەديت ساياساتىن بايقاپ ىسكە اسىرۋدى قاجەت ەتەدى. بازالىق مولشەرلەمەنىڭ اعىمداعى دەڭگەيى تۇراقتى ينفلياتسيانى باياۋلاتۋ ۇدەرىسىن قولداۋعا، مەملەكەتتىك شىعىستاردىڭ ءوسۋىن تەڭگەرۋگە جانە ينفلياتسيالىق كۇتۋلەردىڭ جوعارى دەڭگەيدە تۇراقتاپ قالۋىنىڭ الدىن الۋعا مۇمكىندىك بەرەدى.

«ينفلياتسيانىڭ تومەندەۋى بازالىق مولشەرلەمەنىڭ تومەندەۋىنە مۇمكىندىك تۋعىزا باستاعانىن كورىپ وتىرمىز. كەلەسى شەشىم بولجامداردى جاڭارتۋمەن جانە جاڭا دەرەكتەردى تالداۋمەن قاتار قابىلداناتىن بولادى. وسىعان بايلانىستى ءبىز تامىز ايىندا بازالىق مولشەرلەمەنى تومەندەتۋ مۇمكىندىگىن قاراستىراتىن بولامىز. ءبىزدىڭ بارلىق ءىس- ارەكەتىمىز كەلەشەكتە ينفلياتسيا بويىنشا بەلگىلەنگەن 5 پايىز ماقساتىنا بىرتىندەپ قول جەتكىزۋگە باعىتتالعان»، - دەدى ۇلتتىق بانك ءتوراعاسى.