قازاقستان فۋتبول فەدەراتسياسى ريكاردو كاكامەن كەلىسىمشارتتى ۇزارتتى
«ليتۆادا وتكەن الەم چەمپيوناتىندا قازاقستان قۇراماسىنىڭ تابىسى ەلىمىزدە فۋتزالدىڭ دامۋىنا ۇلكەن سەرپىلىس بەردى. سوڭعى جىلدارى ءبىزدىڭ فۋتزال جاڭا دەڭگەيگە كوتەرىلگەنى انىق. بۇل باعىتتا كاكانىڭ قوسقان ۇلەسى زور. الايدا، بۇل جەتىستىكتەرمەن توقتاپ قالماۋ ماڭىزدى. ءبىزدىڭ قۇراما نەگىزگى ىرىكتەۋ كەزەڭىندە جاقسى ناتيجە كورسەتىپ، توپتان ءبىرىنشى ورىنمەن شىقتى. العا قويىلعان ماقسات 2024 -جىلى وزبەكستاندا وتەتىن الەم چەمپيوناتىنا جولداما الۋ. ءبىزدىڭ باپكەرمەن وسى مىندەتتى ورىنداي الامىز دەپ سەنەمىن»، - دەپ اتاپ ءوتتى قازاقستان فۋتبول فەدەراتسياسىنىڭ پرەزيدەنتى ادىلەت بارمەنقۇلوۆ.
ءوز كەزەگىندە ريكاردو كاكا جان- جاقتى قولداۋ مەن سەنىم ءۇشىن العىس ءبىلدىردى.
«باستى مىندەتتەردىڭ ءبىرى ورىندالدى - ەليتالىق كەزەڭگە شىقتىق. ەندىگى مەجە 2024 -جىلعى الەم چەمپيوناتىنا جولداما الۋ. العا قويىلعان ماقساتتاردى جۇزەگە اسىرۋ ءۇشىن بار كۇشىمىزدى سالامىز»، - دەدى ول.
ايتا كەتەيىك، ريكاردو كاكا 2018 -جىلدان بەرى قازاقستان قۇراماسىن جاتتىقتىرىپ كەلەدى. ونىڭ جەتەكشىلىگىمەن 2021 -جىلى وتكەن الەم چەمپيوناتىندا ءتورتىنشى ورىن الدىق. بۇل تورتكۇل دۇنيە دوداسىنداعى ەڭ ۇلكەن جەتىستىگىمىز سانالادى.
